Euskal taldeek BEC bete nahi dute
Azaroaren 10ean Becatu festibala izango da Barakaldoko BEC-en (18:00etan). Berri txarrak, Esne Beltza, Zea Mays, Willis Drummond eta Zuloak taldeek joko dute bertan. Sarrerak 17 eurotan daude salgai Becaturen webgunean; lehiatilan aldiz 20 eurotan eskuratu ahal izango dira. BEC aretoan euskal kulturaren inguruko ekitaldi gutxi antolatzen dela-eta proposatu du jaialdia BEC-ek berak.
BECek Abar Produkzioak-ekin batera antolatu du jaialdia. Ekimen honen xedea BECeko musika aretoan 14.000 pertsona biltzea da.
Gotzon Barandiaran Abar ekoizpen etxeko kideak esan duenez, "Euskal musikariek plazak behar dituzte euren sorkuntza lanak erakusteko. Gure musikaren kalitatea munduko edozeinen parekoa dela erakusteko aukerak behar dituzte euskal musikariek. Plaza estuak, zabalak, borobilak, laukiak, itxiak, libreak, txikiak, handiak eta baita BEC bezalako erraldoiak ere".
