ARGIA.eus

2021eko azaroaren 30a

Haurren pantailaren erabilerari buruzko jardunaldiak egingo dituzte

  • Pantailak 0-6an. Zertarako? solasaldiak antolatu ditu Hik Hasik, Haur Hezkuntzako hezitzaileentzat. Azaroaren 19an Barakaldon eta 20an Zumaian izango dira. Gaiaren inguruko hiru adituk hitzaldiak emango dituzte eta bi ikastetxetako esperientziak ezagutuko dituzte bertaratutakoek.

Leire Artola Arin @aleirea
2021eko azaroaren 16a
Pantailen erabilerak haur txikiengan duten erabileraren inguruan gogoetatuko dute. / Argazkia: Guraso.eus.

Hik Hasik 0 eta 6 urte bitarteko haurren pantailen erabileraren gaineko gogoeta egiteko jardunaldiak antolatu ditu, ostiralean Barakaldoko BECen eta larunbatean Zumaiako Zumaiena ikastetxean. Antolatzaileen esanetan, hezitzaile eta profesionalek gaiarekiko “egonezina” helarazi diete, eta jardunaldi horien xedea izango da informazioa ematea eta gogoeta sortzea. Formakuntza saioetan hainbat galderari helduko diote: “Aski hausnartu ote dugu zertarako eta nola erabili behar ditugun etapa horretan? Ba al dakigu pantailen gehiegizko erabilerak edota erabilera okerrak zer-nolako eragina izan dezakeen haurren garapenean eta erlazioetan?”.

Hiru hitzaldi eskainiko dituzte, eta ondoren bi ikastetxetako esperientziak ezagutaraziko dituzte; hausnarketa eta eztabaida bultzatu nahi dute. Lehen hizlaria Anna Ramis izango da, hezitzailea, pedagogoa eta pantailarekiko mendekotasun goiztiarrean aditua; pantailek Haur Hezkuntzan duten zentzuari buruz jardungo du.

Ondoren, Alvaro Beñaranek hartuko du hitza. Pedagogia Terapeutikoan lizentziatua da eta ASEFOPeko (Praktika Psikomotorreko Eskolen Europako Elkartea) prestatzailea eta presidentea. 6 urte arteko haurrek pantailen aurrean egoteko eta informazio hori kudeatzeko dituzten gaitasun psikikoen gainean hausnartuko du.

Azkenik, Amaia Arroyo HUHEZIko Hezkuntza Bereziko irakasle eta ikertzaileak teknologia digitalari helduko dio: haurrek behar duten gidaritza digitalaren inguruan mintzatuko da. Solasaldiak amaitzeko, Donostiako Axular Lizeoko esperientzia partekatuko dute, eta Eneko Jorajuria irakasleak azalduko ditu ‘10 egunez pantailarik gabe’ erronkaren nondik norakoak. Ipar Euskal Herrian gauzatu dute egitasmo hori, eta elkarrizketa honetan irakurri daitezke Jorajuriak gaiari buruz esandakoak.

Hik Hasiren jardunaldiak presentzialki nahiz online jarraitu ahalko dira, aurrez izena emanda hemen Barakaldorako eta hemen Zumaiarako.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Haurren haziera  |  Zumaia  |  BEC  |  Hik Hasi

Haurren haziera kanaletik interesatuko zaizu...
2021-11-29 | Leire Artola Arin
Eremu erdaldunetako haur euskaldunak eskolan “ez sakabanatzeko” eskatu du Arnas Dezagun egitasmoak

Guraso taldeak salatu du umeei “ukatu” egiten dietela elkarren artean euskaraz egitea, hainbat ikasgelatan sakabanatuta egoten direlako. Haurrok D ereduan ari dira ikasten. Etxetik euskal hiztunak direnak batzea nahi dute, eta baliabideak eskatu dituzte erdal... [+]


Eskolaldi jarraitua, zeinen mesedetan?

Eskolaldi zatitutik jarraitura igarotzeko hainbat ikastetxeren erabakia zalaparta eragiten ari da Nafarroan. Salaketa egin du guraso talde batek: Haur Hezkuntzatik ikasleei eskolaldi jarraitua eginaraztea da jarraian ordu gehiegi sartzea, berandu bazkaltzea, bizikidetza apurtzea... [+]


2021-11-16 | Ehgam
KOSA hausnarketa zikloa
Familia eta hazkuntza ereduak birpentsatzen

Sexu askapenaz gabiltzanean, ez gabiltza soilik gure desira, identitate eta gorputzak askatzearen inguruan. Jendarte egituraren oinarrian koka daitezkeen harreman moten inguruan aritzea ere bada. Zein motatako harreman afektiboak dira gehien baloratzen direnak? Ba al dago... [+]


Ikastolen Elkartea: "Ez diogu zentzurik ikusten kanpo espazioan haurrei musukoaren erabilera derrigortzeari"

Gurasoak, Oinherri, eta orain Ikastolen Elkartea: denek salatu dute ez duela zentzurik 6-12 urteko haurrak derrigortzea jolastokian musukoa janztera. Egoera berria, eragin emozionala eta beste herrialdeetan hartutako erabakiak izan dituzte hizpide ikastolek, eta Jaurlaritzari... [+]


Musukoa patioan
"Erabaki zentzugabe hauek pairatzen jarraitu behar al dute haurrek?"

EAEko Lehen Hezkuntzako haurrak jolastokian eta heziketa fisikoak iraun bitartean ere musukoa mantendu behar izatea salatu du Oinherri herri hezitzaileen sareak: “Ez diogu argudio honi inongo zentzutik topatzen, haurrak herriko... [+]


Irakurrienak
Azken albisteak
Argia buletina
Egunaren laburpena
zure e-postan
Eguneraketa berriak daude