Atxilotzeko eta espetxeratzeko arriskuan dagoen hiru gazteetako batekin, Ainara Ladronekin hitz egin du ARGIAk. Epailearen erabakiak sortu dien urduritasunez mintzatu da: "Gaur egun desobedientzia oso tresna eraginkorra da, estatuen izaera antidemokratikoa agerian utziz, indarrak biltzeko. Maila pertsonaleko ondorioak presente izanik ere, arazoa politikoa dela ezin dugu ahaztu. Beraz, askatasunaren bidean, lege injustuak gainditzeko gure borroka eta hautua ere kolektiboa izango dira. Jarrera desobedenteak esparru guztietara hedatzeko ekarpena da gurea." 

Hiru gazteak beren ohiko bizimoduarekin aurrera egitea erabaki dute eta, beraz, edozein unetan gerta litezke atxiloketak.

Espetxeratzea, "zigor" gisa

Gaur eguerdiko epaiketaren berri eman digu Saioa Zerain auzipetuak. Bost auzipetuak epailearen aurrean ez zirela ikustean, bertan behera utzi du epaiketak epaileak. "Beren nahia kartzelara joatea baldin bazen, bada lortu dute! Kartzelara joango dira", izan dira epailearen hitzak egoera ikusita. Oso haserre eta zakar jokatu duela dio Zerainek. "Bostok batera epaitu nahi gaituzte kosta ala kosta, eta zigor gisara fiskalak eta epaileak espetxeratzeko agindua eman dute". Izan ere, epailearen esku dago epaiketaren hurrengo data jartzea, eta horren arabera luzatuko litzeteke epaiketara aurkeztu ez diren hiru gazteen espetxealdia.

Epaiketa politiko honetan eta etor litezken guztietan, beren hautua desobedientzia dela berretsi du Zerainek. "A8 moztu genuen garaian bezala, orain ere bostok desobedientziaren bidea hautatu dugu, eta, berriz aukera suertatzean, ekimen desobedentea egingo dugu bostok batera".

9 urteko prozesu judiziala

Bi urte eta erdiko espetxe zigorra eskatu du fiskalak bakoitzarentzat. Bederatzi urtez luzatu den prozesu judizialean, lau aldiz atzeratu diete epaiketaren data. Abenduaren 1ean egitekoa zen epaiketa, baina epaileak, jakinarazpenetan arazoak izan direla argudiatuta, martxoaren 2ra arte atzeratu zuten.

Ainara Ladronek –ez du epaiketan parte hartu– ondorengoa adierazi zigun abenduan atzerapenari buruz: "Gure bizitzarekin jolasten jarraitzen dute. Bederatzi urte luzez espetxe zigorraren mehatxua gainean izan dugu eta orain, beste behin ere, eta gezurra erabiliz, epaiketa atzeratu dute. Horrek berresten du gaur hartu dugun erabakia: fartsa horretan ez dugu parte hartuko".

Espainiako Gobernuak Segi gazte antolakundea terrorista izendatu behar zuela salatzeko A-8 autobidearen trafikoa –Zarautz inguruan– moztu zuten bost gazteek 2007ko otsailean. Ilegalizazioen aroan bete-betean sartuta ginen artean Euskal Herrian, eta horiei aurre egiteko egin ziren protesta ugarietako bat izan zen A-8koa. “Euskal gazteriak militatzeko zuen eta duen eskubidea aldarrikatu nahi genuen”, adierazi dute auzipetuek.

Bi urte eta erdiko espetxe zigorra eskatu du fiskalak bakoitzarentzat. Protesta egin zenetik bederatzi urte igaro dira eta horrek eragin zuzena izan du haien bizitzan eta gaur hiru gazteek desobedientziaren bidea hartzeko erabakian: “Gure bizitza asko baldintzatu du prozesu luze honek. Bederatzi urte luze hauetan atxilotu egin gaituzte, Espainiako Auzitegi Nazionalera eraman gaituzte, eta orain laugarren aldiz epaitu nahi gaituzte... Nahikoa dela erabaki dugu.”

MOBILIZAZIOAK 
Epaiketa eta balizko atxiloketak salatzeko ondorengo mobilizazioen berri eman dute:

- Martxoaren 5ean, larunbata, Zarautzen agerraldia.

- Elgoibar | Martxoak 2, asteazkena, 19:30ean elkarretaratzea herriko plazan.

- Arbizu | Martxoak 2, asteazkena, 19:00etan elkarretaratzea herriko plazan

- Arrieta | Martxoak 2, asteazkena, 20:00etan kontzentrazioa herriko plazan

- Eibar | Martxoak 2, asteazkena, 19:00etan manifestazioa Untzaga plazan.

- Gasteiz | Martxoak 2, asteazkena, 19:00etan elkarretaratzea Andra Mari Zuriaren plazan.