Bat-bateko bero kolpeek larri utzitako pertsonak ehundaka dira, eta Britainiar Kolunbian zenbatutako hildakoak 230 ziren jada asteazkenera bitartean, aurreko asteburutik.

Kanadako bero izugarriaren zonaldea eskualde berde, basoz bete eta ohikoan fresko eta euritsu batean gertatzen ari da, Britainiar Kolunbian. Handik hegoaldera, AEBetako Pazidfikoko estatu freskoetan ere (Washington, Oregon) berdintsu ari da gertatzen. Ozeano Barearen beste aldean, berriz, beste bero kolpe izugarriak ari dira gertatzen Siberian. Munduko hotzik latzenetako bat erregistratua duen Siberiako Oimiakon herrian 31 gradu izan dituzte ekain amaiera honetan: 1933an, bertan, -67.7 celsius-eko hotza neurtu zuten.

Aste honetako berialdi hauek, Kanadakoa eta Siberiakoa, ez daude zuzen-zuzenean lotuta, milaka kilometro daude batetik bestera. Baina zientzialari batzuek uste dute aldaketa klimatikoa eskualde artikoetan bereziki ari dela eragiten. Hau da, munduko hozbero ertaina gradu bat edo bi igotzea globalki katastrofikoa da munduaren puntu askotan; baina neurri horretatik gora ari dira udako beroak igotzen artikoaren inguruan.

Artikoan edo edonon, nolanahi ere, gero eta argiagoak dira beroketa globalaren errealitatearen zantzuak.