16.000 haitiar Txiletik kanporatuak izateko arriskuan, "baliabide faltagatik" dokumentazioa heltzen ez delako

  • Txilen bizi diren haitiarrek haien migrazio-egoera erregularizatzeko azken eguna dute uztailaren 22a. Haitiko Gobernuak ez die bidali oraindik horretarako beharrezkoa duten dokumentazioa, eta onartu du “aurrekontu faltagatik” dela.

Iņaut Gonzalez de Matauko Rada @inautogdm
2019ko uztailaren 17a
Haitiarrak beren herrialdera itzultzen. Argazkia: AGENCIA UNO.

Muturreko egoeran dago Haiti berriro ere. 2018ko uztailean hasi ziren protestak petrolioaren prezioaren igoeragatik, eta kaleak borborka daude gaurdaino. Txilen bizi diren haitiarrek aurrekari penalen agiria behar dute haien egoera erregularizatzeko, eta ziurtagiri hori Haitiko Polizia Judizialaren Zuzendaritza Nagusiak eman dezake bakarrik, Russia Today hedabide errusiarrak jaso duenaren arabera.

2018an Txileko presidente bihurtu zenetik, Sebastian Piñerak migrazio-kontrolak asko zurrundu ditu, lan eta erresidentzia bisak lortzeko batez ere. Egoera horrela, uztailaren 22tik aurrera haitiar asko kanporatuko dituztela aurreikusten da. Atzerrian Bizi Diren Haitiarren Ministeritzak joan den ostegunean zabaldu duenez, “kezka” azaldu du Txilen bizi diren haitiarrengatik, baina krisi ekonomikoa dela eta dokumentazioa bidaltzeko arazo handiak daudela baieztatu du.

Egoera ikusgaitza

Haitin bizi den egoera oharkabean pasatzen ari da mendebaldeko hedabide nagusietatik. 2015an hauteskundeak izan ziren Karibeko herrialdean; nahiz eta nazioarteko ikuskariek ontzat eman, Haitiko bermatzaileek irregulartasunak salatu zituzten. Hau dela eta, hauteskundeak errepikatzea lortu zen, eta 2016an egindako hauteskundeetan Jovenel Moïse atera zen presidente. Donald Trumpek Moïse zoriondu zuen garaipenagatik, nahiz eta abstentzioa %82koa izan. Hauteskundeetara deituta zeuden biztanleen %9ak bakarrik bozkatu zuen Moïse.

Amerikako herrialderik txiroena da Haiti. 2017an 0,496eko Giza Garapen Indizea zuen Karibeko irlak (Nazio Batuen Erakundearen kalkuluen arabera), munduan 189 herrialdetik 168.a. Petrocaribe aliantzaren parte zen Haiti, petrolioa prezio merkeagoetan lortuz. 2010eko lurrikararen ostean, Venezuela izan zen Haiti gehien lagundu zuen herrialdea. 2017an, baina, Trumpek zoriondu ostean, gobernu berriaren gaineko presioak hasi ziren, programa sozialak alde batera uzteko, eta batez ere, Petrocaribe aliantza alde batera uzteko. Presioaren eraginez, pixkanaka Venezuelarekin zuen harremana gutxitzen joan ziren, eta horrek petrolioaren prezioaren igoera ekarri zuen.

Esan bezala, orain ere krisi egoera larrian dago murgildua Haiti, eta kaleak etengabe betetzen dira aldaketak eskatzeko.

 

 

 

Kasko urdinak Haitin.

 

 

 

 

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal honetan artxibatua: Haiti

Haiti kanaletik interesatuko zaizu...
Eguneraketa berriak daude