Urtebete ezer kontsumitu gabe
Kontsumo gizarteari ihes egiten ahal zaiola frogatu du Greta Taubert 30 urteko kazetari alemaniarrak. Urtebete egon da ezer erosi gabe eta Apokalypse jetzt! (Apokalipsia orain!) liburuan bildu du esperientzia.
Urtebetez, trukean oinarritu da Tauberten sistema ekonomikoa, baratzean jardun du elikagaiak lortzeko, berak egindako txanpu, krema eta hortzetako pasta erabili ditu, autoestop eginez Bartzelonako okupa etxe batean pasa ditu oporrak, komun idorrak baliatu ditu, jendeak zaborretara botatako hondakin birziklagarriak bilatu ditu...
Ekintza honen bidez, kontsumo kateen menpekotasunetik urrundu eta bestelako ekonomia eredu solidario eta jasangarriagoaren alde egin nahi izan du Taubertek. Gogoratu du, adibidez, Alemanian 2012an zazpi milioi tona jaki bota zituztela zaborretara (batez beste 81,6 kilo pertsonako).
Abentura abiatu aurretik, Alemaniako Turingia oihanean bizi diren aitona-amonak bisitatu zituen, “haiek gu baino askoz azkarragoak direlako; txerria hiltzen dakite, fruitu kontserbak prestatzen, pattarra destilatzen...”.
Sistemari muzin egiten dioten herritar ugari
Harrituta dago kazetaria, esperientzia honi esker ikusi duelako herritar asko direla sistematik at bizitzen saiatzen direnak, neurri txikiagoan edo handiagoan. “Jende asko dago kontsumo gizartetik independente izaten dakiena, eta ez bakarrik ekologistak edo alternatiboak”. Badira basoan fruitu, sustrai eta belarrak biltzen dituztenak, etxea elkarbanatzen dutenak, hiri-baratzeak atondu dituztenak, aparailuak konpontzeko gai direnak, arropa edo zerbitzuak trukatzen dituztenak, “zuk zeuk egin” filosofiaren aktibistak, komunitarismo jasangarriaren aldekoak...
Komunitatea dirua baino askoz indartsuagoa dela dio, elkarri lagunduz baino ezin dugula biziraun, baita belaunaldien artean ere. “Zeinek daki barazkigintzaz? Nork lagunduko dit aparailua konpontzen?... Ez da baliagarria soilik salbuespen egoeretarako. Bizitza eta ekonomia besteekin partekatzeak pertsonalki aberasten gaitu eta bizitzarekiko bestelako ikuspegia lortzen da. Komunitatean, beldurra desagertzen da”.
Kazetariak gogoratu duenez, “gure sistema ekonomikoak hazkunde mugagabea du oinarri, baina gure mundu ekologikoa mugatua da”. Bere hitzetan, egungo eredu ekonomikoaren mugez kontzientziatzeko balio izan du krisiak eta “jendeak ulertu du erreskate planek edo Europako Egonkortasun Mekanismoak ez dutela ezer konpondu”.
Egun, urtebetez ikasitakoa egunerokoan praktikan jartzen saiatzen da Greta Taubert.
Etxeko garbigailua hautsi eta konponarazten saiatu ginelarik, beste baten erostea hobe genuela erran zigun konpontzaileak. Merkeago genukeela, ez, aise merkeago genukeela berriaren erostea. Lehen batean ez bazen begi bistakoa, argudiatu zitzaigun, baietz, epe ertainean hala... [+]
Hezkuntzan erabilera oso zabala duten Chromebookak gutxi irauteko diseinatuta daudela ondorioztatu du AEBetako Public Interest Research Group erakundeak (PIRG, Interes publikorako ikerketa taldea). Zaharkitze programatua onartezintzat jo dute, eta ikasle bakoitzak gailu bat... [+]
Abendua igaro zaigu, urtarrilean sartu gara eta, beraz, ipar hemisferioan negua hasi zenetik aste batzuk igaro dira dagoeneko, tenperatura epel bezain kezkagarriekin. Gure arbasoek, neguko solstizioan, eguna eta gauaren txandakatzea gurtzen zuten, baita urtearen zikloa edo... [+]
Eguberriak ospatzeko beste modu bat bilatu guran, euskal herritarrek antzina zuten ohituretako bat berreskuratu du Jon Etxebarria Txontxe gorliztarrak. Dioenez, neguko solstizioan, "neguburuan", enborrak erretzen zituzten Eguzkiari indarra emateko, eta kiskalitako zur... [+]
Eraikin bat gorputz bat bezala irudikatzea datsegit. Instalakuntza-hoditeriak zainak bailiran, zutabeak eta habeak hezurdura gisa, fatxada, azal-zuntza bat. Eta eraikinaren arima eta bizi-taupadak pertsonek eragiten dute, espazioa erabiltzen eta zaintzen duten... [+]