Analisia

Hanburgo, gerra ezkutuaren erakusleiho hautsia

  • Hanburgon "gerra eremuetako irudiak" ikusi ahal izan direla titulatu dute komunikabide askok uztailaren 7an eta 8an ospatutako G20 bileraren kontrako protesten harira. Protestak espektakulu mediatiko, eta ondorioz, ilusio bilakatzeko saiakeran baina, estaltzen saiatzen diren horixe izendatu besterik ez dute egin: gizartea uneoro zeharkatzen duen gerra, gizartea bera uneoro eratzen duen guda.

Lukas Barandiaran San Roman
2017ko uztailaren 19a
Hanburgoko Schanze auzoko istiluak ostiral gauean. (Arg: Left Report)

Albistegietan erakutsi dizkiguten Hanburgoko suen irudiak ezkutuan etengabe ehuntzen doan gerra sekretuaren noizbehinkako leherketa irudiak besterik ez dira. Baina gerra honen Hanburgoko batailan ikusi ditugun bezalako talkak ez dira ohikoak. Gerra honen ezaugarria ez da talka, baizik eta baketzea. Baketzea menperatze dispositiboak hedatu ahal izateko, eta alderantziz, menperatze dispositiboak hedatzea baketu ahal izateko.

Hilabete luzeetako lana egin zuten protesten antolatzaileek halako erronkari erantzun ahal izateko. Hiriko hamaika gune autogestionatu saretu zituzten. Baita gune berriak okupatu ere Alemania eta Europa osotik trenez, hegazkinez, bizikletaz, auto-stop eginez joan ziren kideei egontokia, borondatearen trukean janaria, informazioa, medikuntza eta lege babesa eta arropa eskaintzeko. Saretutako azpiegituraren garrantziaz jabetuta, horiek kolpatzen hasi zuen astea Poliziak.

Salbuespen egoeren idatzi gabeko ezaugarrietako bat baliatu zuten, botere banaketa bertan behera uztea. Liberalismoaren zutabeetako bat zartatuta, haien buruen gainean hasi ziren eraisten demokraziaren festa —hala izendatu zuen G20a hiriko alkateak— irudikatu nahi zuten antzokia. Uztailaren 2an, igandea, Alemaniako epaitegiek manifestarientzako kanpalekuak antolatzea baimendu zuten hainbat tirabiraren ostean. Baina poliziak, botere betearazleak, biolentzia erabiliz kanpalekuak ezartzea ekidin zuen, botere legegilea bereganatuz de facto.

Tira-bira askoren ostean hiriko Altona parkean egin zuten kanpalekua.

Bizi ahal izateko espazioa lapurtzen saiatuta hasi zen Polizia protestak ezabatzen, eta hain zuzen, kalea, espazio publikoa bereganatzeko aldarriarekin zeuden prestatuta astearte eta asteazkenerako protesta nagusiak. Hard Corner —Izkina Gogor— lemapean, bozgorailuetan hiriko irrati libreak berariaz prestatutako irratsaioa sintonizatu eta gertukoekin kaleko izkina oro bereganatzeko deia zabaldu zuten asteartean. Musikak girotuta, lagun talde askok kale-kantoiak hartu zituzten arratsalde horretan. Antzaz horren inozentea den ekimenaren kontra ere egin zuen Poliziak, eta tentsio uneak izan ziren: ehunka agenteren presentzia eta ur-kanoien erabilera.

Poliziaren erasoek zauritu ugari utzi bazituen ere, ondo zehaztuta zegoen erantzun forma bakoitzaren unea zein zen. Ekintzaile erradikalenetik aktibista bakezaleeneraino, performance serioenetik su-emate alaieraino, agenda komuna antolatzeko gai izan ziren, egitarau berean borroka forma denak uztartuz.

Festaren leherketa

Biolentziari aurre egiteko unea pazientzia handiz itxaron zuten askok osteguna arte, Wellcome To Hell —Ongi etorri Infernura— manifestaziora arte. Beltzez jantzitako blokea osatzea zen manifestazio horretarako kontsigna; masa anonimoa izan zedin kolpatzen duena, harrapaezin, iluntasunetik kolpatu eta iluntasunera itzulita. Poliziak aurpegia jarri behar dio arerioari erregistratu, kontrolatu eta atxiki ahal izateko, eta hori izan zen manifestazioa hasi gabe zegoela bortizki lehertzeko erabili zuten aitzakia.

Bataila luzeak etortzeke zirela jakitun, ez zuten manifestazioa dispertsatzeko asmo soila, erabili zuten biolentzia neurrigabearekin marka bat, ohartarazpen bat utzi nahi izan zuten manifestarien azaletan. Gupidarik gabe, ukabilkadaka, ostikoka, makilkadaka menifestazioa zatitu eta harresi baten kontra harrapatu zuten. Izu momentuak izan ziren, ateratzeko aukera bakarra harresiaren gainetik salto egitea baitzen.

Baina eman zuten hauste kolpea haien kontra itzuli zen; mila zatitan zartatutako manifestazio konpaktutik ihesi ateratakoak ehunka kideko taldeak osatzen joan ziren hirian zehar, eta polizia ez zen gai izan horien kontra aldi berean ekiteko. Soilik ekitean agertzen den arerioa zuen parean Poliziak; anonimotasun beltza janzterakoan agertzen dena, eta Polizia gerturatzerakoan anonimotasuna kentzean desagertzen dena. 20.000 agente gutxi ez, eta errefortzuak eskatu zituen Alemaniako Poliziak ostiral goizean.

Jolasak ostiral arratsaldera arte iraun zuen, goizeko ordu hotzenetan salbu. Egun hartan, goi bilkura hastear zela, talde anonimoez gain, beren gorputzekin hiriko garraiobideak oztopatu zituzten milaka pertsonak, eta goi bilera geldiarazi ez bazuten ere, hainbat kideren parte-hartzea oztopatu zuten, tartean Wolfgang Schauble Alemaniako Ekonomia ministroarena, Melania Trump, Donald Trumpen emaztearena eta Japoniako ordezkaritzarena.

Bien bitartean, ostegun arratsaldetik sakabanatuta ekin zuten kideak ostiral arratsaldean batzen hasi ziren Schanze auzoan, Rote Flora gune okupatu historikoaren inguruetan. Orduantxe izan zuten manifestarien eta polizien arteko talkek bere gorena: auzo osoan zehar suzko barrikadak egin zituzten, haien babesean komertzio handiak arpilatzeari ekin zioten eta ordu luzez gutxienez sei ur-kanoiei, tanketei, hainbat helikopterori eta ehunka poliziari aurre egiteko gai izan ziren milaka anonimo. Goizeko ordu txikitan, nekeak, alkoholak gaiztotutako giroak eta Poliziaren oldarraldiek eraginda, jendea auzotik irteten hasi zen, etxera bidean barrikadek eta arpilatzeek jarraitu zuten bitartean.

Behin giroa lasaitu zenean sartu zen Polizia militarra auzora, metrailetak eskuan, mugitzen zen oro armekin mehatxatuz. Antolatu zuten dispositibo erraldoiari anonimoek aurre egiten ziotela ikusita, beste ohartarazpen bat bidali nahi izan zuten militarrekin.

Ostiraleko gauak ajea utzi zien manifestariei, polizia urduri zegoen, errudun bila. Larunbatean azken ekitaldiek izan ohi duten tentsioa nabaria zen, antzezpenaren amaiera zein handia izango zen ikusteko zain. Horrenbesteraino, ezen gehiegizkoa izan baitzen askorentzat, eta oro har baketsua izan zen larunbateko manifestazio masiboaren ostean —75.000 eta 100.000 pertsona artean antolatzaileen arabera—, gutxi batzuk ausartu ziren aurreko egunetakoa errepikatzen. Gutxi batzuek kontainerrak erre eta eserialdiekin kaleak moztu zituzten. Baina Poliziak ondo ikasi zuen aurreko gauean. Schanze auzoa hartua zuten, eta eseritako manifestari baketsuei aurre egiteko militarrak atera zituzten bigarren gauez, badaezpada ere.

Hanburgo ez da salbuespena

Batzuek festa demokratikoa ospatzen zuten bitartean, gerra demokratikoaren erakustaldia egin zuten kaleetan. 20.000 poliziaren armada –gerra terminologia ez da ausazkoa—, segurtasun indar militarren erabilera protesten aurrean, hirian bilkurak eta manifestazioak egiteko eta hainbat eremu zehatzetara sartzeko debekua, hiriko telekomunikazio guztien erregistroa, hirira sartzen diren pertsonen kontrola, batzuen sartzeko debekua, eta pertsona ugariren atxikitze prebentiboa dira bizi dugun gerraren adibideetako batzuk.

Goi bilerak iraun bitarteko egunetan izandako protestak baketzeko, hainbat hilabete lehenago hasi ziren dispositiboak prestatzen; aipatutako mekanismoak ez dira egun batetik bestera prestatzen. Protestak hasi baino dezente lehenagotik, eta protesta horien nolakotasuna jakin aurretik hasi ziren menperatze dispositiboak ezartzen; ez zuten legea hausten duenaren kontra erantzun gisa jokatu, baizik eta protestak hasi aurretik jada egoera arrunta bertan behera utzi zuten menperatze dispositiboekin.

Wellcome to Hell manifestazioaren dispositiboko irudi bat. (Arg: CNBC)

Baina Hanburgoko kasu zehatzaz harago, hiriko salbuespen egoera arau bilakatu dute gerra hau irabazten saiatzeko, inguruko adibide askoren arteko batzuek frogatzen duten antzera: Frantziak 2015etik darama formalki salbuespen egoeran, eta salbuespena lege arrunt bilakatzeko asmoa adierazi du Macronek; AEBek salbuespen egoera formalean daramate 2001etik Patriot Act legeak direla eta, eta zer esanik ez Euskal Herrian hamarkada luzeetan bizi eta bizitzen jarraitzen dugun salbuespen egoera informalaz.

Badator biharamuna

Idatziko dute zein justifikazio duten komertzioetako leiho hautsiek. Alta, nahikoa idatzi da G20ak ordezkatzen duen sistemaz, ongi jakina da nor zegoen parean; nahikoa manifestazio pankarten mezuaren atzean, irakurri behar zuenak jada irakurri du. Justifikazio eta azalpenak aspaldi emanda, duela asko erabaki zuen bakoitzak gerra honetan non kokatu nahi zuen.

Bataila igarota, jarraitzen du gerrak. Heiko Maas Alemaniako Justizia ministroak Europako ezker “erradikalen” fitxategi bateratu bat egiteko eskatu du, eta “erradikal” horien kontra baliabide gehiago bideratuko dituela iragarri du. Estatuak bakarrik ez, Bild Zeitung, Alemaniako egunkari handienetako batek laguntza eskatu die bere irakurleei sareetan dauden argazki eta bideoetan “biolentoak” identifikatzeko.

Bitartean, lurpean, Hanburgon altxatutako galtzada-harriek utzitako espazioetan, jarraitzen du ehuntzeak. Ondoko beltzezko anonimoari elkar helduz, ondoko ezezagunari janaria zerbitzatuz, edota besterik gabe, ondokoarekin bizitzaren ezinegona konpartituz hausten dira gure gizartean axolagabetasunak altxatutako hesi ikusezinak. Hala hasi omen zen bizitzak berreskuratzeko guda.

Kanal hauetan artxibatua: Globalizazio neoliberala  |  Polizia

Globalizazio neoliberala kanaletik interesatuko zaizu...
Elitea %1 aberatsena? Mintza gaitezen ondoen bizi den beste %20az ere

2008an krisi handia lehertu zenetik, eta bidenabar Occupy Wall Street mugimenduak metropoli aberatsenetako plazak inarrosi zituenetik, asko zabaldu zen “geu gara %99” ideia, alegia piramide sozialaren gailurreko populazioaren %1 aberatsenak zanpatzen gaituela azpiko gainerako %99ak. Egia osoa pittin bat konplexuagoa da. Gizartearen piramidean garrantzia berezia daukate goiko %20 aberatsenek ere, azken hamarkadotako garapenari etekin gehien atera diotenek.


2018-01-10 | ARGIA
Macriren "eraso neoliberala" salatu eta argentinarrei elkartasuna adierazi diete sindikatu ugarik

Argentinan gertatzen ari denak “biziki larritzen” dituelako, ohar bateratua atera dute LAB, ESK, STEILAS eta Espainiako Estatuko hainbat sindikatuk. Macriren gobernua “eraso neoliberala” egiten ari dela uste dute, eta ondorengoa bilatzen duela: lan baldintzen prekarizazioa, gastu publikoaren murrizketa, sektore publikoaren pribatizazioa, eta honekin batera, askatasunen eta oinarrizko eskubide zibilen deuseztapena. Argentinako herriaren erantzuna azpimarratu nahi dute.


21 urte nahikoa dira! MME nekazaritzatik kanpora!

Merkataritzaren Munduko Erakundea eta Elikadura Burujabetza kontzeptu antagonikoak dira. Lehenbizikoaren helburua da urratsez urrats mundu osoan merkatu “libre” bat eraikitzea, baita nekazaritzan ere, ekoizpena oztoporik gabe eramateko munduko leku batetik bestera, produkzio-kostu txikienak dituen tokian kokatuz. Horren ondorioz, munduko eskualde bakoitza espezializatu egiten da bere testuinguruan merkeena den ekoizpena egiten. Lehiaketa horretan, ikuspegi sozialak, lokalak,... [+]


2017-12-13 | Unai Brea
Merkataritzaren Munduko Erakundearen gailurra asteazkenean bukatuko da Buenos Airesen, protesta artean

Abenduaren 10etik 13ra bilduta dago Munduko Merkataritza Erakundea (MME) Buenos Airesen. Gai-ordenan, besteak beste, nazioarteko salerosketetarako arau berriak adostea eta merkataritza elektronikoaren liberalizazioa daude. Milaka lagunek protesta egin dute gailur osoan zehar, MMEri “herrien eta naturaren espoliazioa” arautzeko helburua baizik ez duela leporatuta.


Apple iruzur fiskalean munduko txapeldun izendatu du ATTACek

“Apple, lapurreta mundiala” izenburuarekin azaroaren 9an ATTAC erakundeak zabaldu duenez, 2002tik gaurdaino sagar koskatuaren multinazionalak 16.000 milioi euroko zergak utzi dizkio pagatzeke Europar Batasunari. Berrikitan "Paradise Papers" agirietatik eskuratutako informaizoek berretsi dute Applek segitzen duela iruzur estrategia berean.


Mezulari prekarioak kooperatiban antolatzen Deliverooren aurrean

Bartzelonan ari dira bat osatzen, Parisen beste bat kasik prest daukate, Toulousen ba omen dago bat martxan... Hiri handietan jaki azkarrak jatetxeetatik etxebizitzetara banatzen dituzten bizikletazko mezulariak kooperatibetan antolatzen hasi dira, Deliveroo bezalako konpainiek horietako asko kaleratu ostean. Milioika jende prekariotzara kondenatu dituen 'Gig Economy' delakoaren barruan duintasunez bizirauteko ahalegina da, zailtasun askoren artean ernea.


Dema itzela Irlandan: Apple eta mundu guztia versus gizon bakarra

Planetako jende burutsuenei uneoroko zoriona zerbitzatzen dien Apple multinazionalak Irlandan eraiki nahi du Europako datu biltegirik handiena, 850 milioi euroko inbertsioa datozen 15 urteetan. Ordaindu gabeko zergetan lehendik milaka milioi ostu dizkien arren, irlandar ia guztiek nahi dute Applek berriro hauta ditzan bere negozioetarako. Ez denek, ordea. Bada norbait jarraitzen duena epaitegietan borrokan urrezko sagarraren asmoaren kontra.


Hona demokrazia berria Wall Streetetik etorria: 'Dolar bat = Boto bat'

Dio Ammar Belhimer abokatu eta ekonomialari aljeriarrak finantzen munduko burtsa nagusia den Wall Streetek irudikatzen dituela neoliberalismoaren bi titiak: espekulazioa eta zorpetzea. Ordena neoliberala nagusitu da munduan, bera da 90eko hamarkadatik inolako ez kontra-botererik eta ez araurik onartzen ez duen jainko berria. Munduan ez da salbuespenik geratu finantza merkatuen kontrolpetik.


2017-09-26 | Topatu.eus
Aske utzi dute David Rincon gaztea, ez haatik zigorrik gabe

Urte eta erdiko espetxe zigorra eta hiru urteko baldintzapekoa jarri diote Bilboko gazteari. G20aren aurkako protestetan atxilotu zuten, eta Hanburgon epaitu dute.


Irailaren 25ean epaituko dute David Rincon Hanburgon; manifestaziora deitu dute ostiralean

Herriok Erabaki taldeak prentsaurrekoa eskaini du David Rinconen eta Hanburgon atxilotu zituzten beste gazteen askatasuna aldarrikatzeko. David Rincon irailaren 25ean epaitua izango da Hanburgon; atxiloketa salatzeko eta G20aren aurka manifestaziora deitu dute ostiralerako, Bilbon. Arratsaldeko 19:30ean bilduko dira Arriaga plazan, eta Euskal Herriko herritar guztiei deia luzatu diete bertaratzeko eta parte hartzeko. Hanburgon G20aren kontrako manifestazioetan atxilotu zituztenak epaitegietatik... [+]


Eguneraketa berriak daude