"Salletar Anaidiko" Romualdo anaiari eta "Salleko Adiskideak" dantzataldeko Mª Jeus eta Joakini elkarrizketa.
"Salleko Adiskideak" Dantzataldea
Badugu herrian izen hori duen dantzatalde bat azken urteotan. Zenbait aldiz dantzatzen ikusiak ditudan arren, banuen jakin minik talde honi buruz. Bestalde, herrian ez ditugu samaldaka, (zoritxarrez) horretako taldeak. Horregatik bada, interesgarri iruditu zait talde honen berri Z. A.-ko orrialdeetan ematea. Beren berri jakin ahal izateko, Santa Maria kaleko etxape batetara jo dut, Romualdo (Salletar Anaidikoa) lagun harturik. Argi xume batzuen pean, han aurkitu dut hamabosteko bat zoruko hautsak astintzen. Romualdo Anaiak, bi gazte aurkeztu dit berehala: Mª. Jesus eta Joakin. Hirurengandik jaso ditut ondoko xehetasunok:
-- SALLEKO ADISKIDEAK, gaztetxoen dantzatalde bezala ezagutzen dugu. Zenbat gaztetxo biltzen du une honetan eta nola banatuak?
-- 55-60ren bat gaztetxo biltzen du une honetan. Horietatik 30eko bat 13-14 urtekoak eta gainontzekoak 6tik 9ra bitartekoak. Mutilak 22 edo... gainontzekoak neskak. Gainera, 10 txistulari ere baditugu.
-- Zenbat denbora da hasi zinetela eta nolaz?
-- Orain 4 urte edo... hasi zen taldea mutil hutsez. Neskak, orain urte t'erdi edo... erantsi ziren. Loinazko San Martin Ikastetxeko Zuzendariak, herri-gauzak eragin nahirik hartu zuen asmoa eta lehen ikasle izanengan erantzun ona bilatu zuen... -- dio Romualdok --.
-- Nortzuk dituzue Irakasle?
-- Une honetan hiru hauk ditugu: Martin Iraola, Mª. Jesus Alvarez eta Mª Karmen Huizi, baina laugarren bat ez dugu aipatu gabe utzi nahi, Raimundo Gamaio alegia. Orain soldadu den arren, taldeari eragin handia emana da urteotan.
-- Dantza mota asko dantzatzen ahal du talde honek?
-- Bai. Euskal Herriko probintzia gehienetakoak dantzatzen dituzte gaztetxoek. Guztira 30ekoren bat bai...
-- Ez da gutxi, alajaina... Eta, irtera asko egin ahal duzue?
-- Ez. Oso gutxi. Herrian, urtean behin edo beste. Guk askoz ere gehiago nahi genuke. Kanpoan berriz, Legazpia, Andoain, Ormaiztegi, Olaberria... eta ez dakit bestetan izan garen... Ez gara oso ezagunak nonbait eta deirik ia ez dugula jasotzen kontu...
-- Honela prestatzeko, zenbat denbora ematen duzue ikasten eta iaiotzen?
-- Asteko bospasei ordu sartzen ditugu. Udan gutxiago agian, hilabete oso bat jai eta... bestela ere guttiago.
-- Zer helburu duzue aurrera begira?
-- Taldeari eutsi eta ugaldu ahal bada. Oraindaino, saiatu gara dantza bera ez ezik, dantzaren jatorria, dantzatzen den lekua eta abar... zerbait adierazten.
-- Zer eragin du dantzak euskaldungoaren barruan?
-- Euskal kontzientzia batetara bultzatzen du. Dugun zerbaiten jabe egiten da gaztetxoa. Denak ez dira euskaldunak, baina ez direnengan ere beti sortzen du gutartze bat. Bestela ez luke zentzurik.
-- Dantzatik at, beste xederik ba ahal duzue euskaldungoaren barruan?
-- Honekin zerikusia duen zerbait hain zuzen: Txistularitza. Beste bi sail txistua ikasten ari dira asteko hiruzpalau orduz.
-- Zer esan nahi diezue Z. A.-ko irakurleei?
-- Lehenik, honen moduko edozer ekintzetan gertatu ohi denez, diru falta ohi dugula geurekin. Ikastetxeak lagundu digu, baina batzutan, norberak bere jantziak egin behar izan ditu. Azkenaldi honetan, gurasoak eta apur bat kezkatu direlarik hobeki goaz... Dena den, dei diezagutela non-nahitik, ez gara garestiak eta. Bazkari eta bidaia izanez gero... (urrutira joan behar denean) eta zertxobait geu hobetzen joatearren izanez gero..., baina azkeneko hau ez da ezinbestekoa eta berriro diogu: Dei diezagutela. Zuri berriz eskerrik asko berri emateagatik.
-- Ez da zeri gazteok. Ekin eta jarrai. Lanerako sena baduzue eta hortik iraun. Beasainen euskal alor guztiek behar dituzte zuek bezalako langileak. Aurrera bada herria eta herritarrak euskalduntzen.
27
GaiezKulturaDantzaDantzariak
GaiezKulturaDantzaTaldeakSALLEKO AD1