Heba Abu Nadak salbu jarri zituen bere azken olerkietako batzuk urriaren 8an, Israelek “gerra” planteatu zuenean. Erregimen sionista, arrazista eta genozidaren sarraski-planak suntsitu ezingo lituzkeen lekura, sare sozialetako bere jarraitzaileen mugikorretara bidali zituen azken hitz literarioak: “Hiriko gaua iluna da misilen distira izan ezik, isila bonbardaketen soinua izan ezik, beldurgarria erreguaren lasaitasuna izan ezik, beltza martirien argia izan ezik. Gabon”. Egun gutxi batzuk beranduago, Palestinaren interneterako sare osoa indargabetu zuen Israelek.

Poeta gazteak sekula ez zuen esango Israelek erasoaldia urriaren 8an hasi zuenik. Familia errefuxiatu palestinar baten alaba da Heba Abu Nada. Duela 32 urte jaio zen Saudi Arabiako Meka hirian, eta gazte-gaztetatik palestinarra sentitu dela esana zuen. Biokimikan lizentziatu zen Gazako Unibertsitate Islamiarrean, nutrizioari buruzko master bat egin zuen eta unibertsitateko irakasle jardun. Literatur zale amorratua eta idazle fina, literatur arabiarrean promesa gisa ikusten zuten. Besteak beste 2017an, 26 urte zituela, Arabiako Sormena-ri emandako Sharjah saria eskuratu zuen al-Uksujīn laysa lil-mawtā (Oxigenoa ez da hildakoentzat) eleberriagatik.

Urriaren 20ko gauean, Khan Yunis hiria errukirik gabe bonbardatu zuen armada sionistak. Ehunka palestinar hil ziren erasoaldietan; tartean, Heba Abu Nada.

Palestinaren askatasuna eta feminismoa
Heba Abu Nada poetaren antzera, Palestina nazioartean aitortzeko aldarrikatzen zuen Heba Zaqout artistak ere, eta aktibista feminista esanguratsuak ziren biak. 

Zaqout artista akriliko ezaguna izan da Palestinan. 1984an jaio zen Gazan, Al-Aqsa Unibertsitateko Arte Ederretako Fakultatean graduatu zen, eskola publikoan irakasle zebilen, eta artearen kontuetan, Palestinaz harago, nazioarteko hainbat erakusketatan hartu izan zuen parte. Nazio-identitateak, bakeak eta emakumearen subiranotasunak bere koadroen zentralitatea hartu izan dute sarri.