Zein da makillajearen inguruan daukazun lehenengo oroitzapena?

Nire amari potea lapurtzea. 14 urterekin ezpainetako margoak eta basea kentzen nizkion. Gerora nirea erosten hasi nintzen. Gustuko nuen jendea makillatzea, baina zerbait landuagoa eta artistikoagoa egitea ere bai. Itzalekin jolastuz urteak kendu edo gehitu daitezke.

Aurpegia mihise bat da?

Bai, marraztea gustuko dut, baina aurpegia koadro bat baino gehiago. Erronka bat da, aurpegi bakoitza berezia delako.

Zeure buruarekin praktikatzen duzu?

Noski. Asko lantzen dut contouring-a; hau da, argiak eta itzalak erabilita, argitasuna ematea, bolumena jarri edo kentzeko. Neure burua feminizatzea zailagoa da, baina saiatzen naiz karratuagoa egiten edo obalo formakoa. Saiatzean eta kale egitean datza.

Zure lehenengo feminizazioa lagun batekin izan zen; nola gogoratzen duzu momentu hura?

Mutila den lagun batek esan zidan makillatu nahi zuela, baina ondo ikusi nahi zuela bere burua. Izugarri gustatu zitzaidan, eta horrek piztu zidan gogoa. Hortik sortu da Luna Femme.

Nola definituko zenuke Luna Femme?

Amets eta zaletasun bat zen, eta gaur egun amets hori egi bihurtu da. Bere burua nahi duen bezala ikusteko aukerarik izan ez duen jendea zoriontsu egin nahi dut. Zerbait alternatiboa da, baina nik nahiko nuke arrunta izatea eta normalizatzea. Ez nuke nahi normatiboa izatea; zer da norma edo araua?

Non hasten da feminizazio bat?

Gona bat jantzi, ezpainak edota begiak margotzearekin hasten da. Feminitatearekin lotzen den horrekin; beti ere kakotxen artean.

Desinfomazio handia dago? Nola azaltzen duzu zer egiten duzun?

Bai, desinformazio handia dago, eta jendeak gauzak nahasten ditu. Irribarre batekin esaten diet egiten dudana zera dela: generoa edozein dela, feminizatu nahi duen orori lagundu. Jendea ondo sentitzea eta momentu horretaz gozatzea nahi dut. Hor dago gakoa.

Feminizazioetan gertatzen dena, feminizazioetan geratzen dela diozu. Zergatik da garrantzitsua konfidentzialtasuna?

Seguru sentitzeko; feminizatzen direnen lagunekin kalera ateratzen naizenean, ikusten dut oraindik jendeak aurreiritzi eta estigma asko dituela. Kontzientziatu beharra dago.

Nola?

Hitzadiak eman nahiko nituzke, adibidez, eskoletan. Nire seme-alabek galdetzen didatenean: "Ama atera naiteke honekin?" Esaten diet: "Honekin ateratzen bazara jendeak begiratuko zaitu, baina ez du inporta, zuk eramaten duzuna gustuko duzulako, eta zoriontsu zara jantzi duzunarekin".

Zure seme-alabek feminizizazioak eskatzen dizkizute?

Feminizazioa ez hainbeste; batez ere, azazkalak margotzeko eta eyeliner-a egiteko eskatzen didate.

Nola eragiten diote feminizazioek generoaren iruditegi sozialari?

Pertsona bakoitza modu batean edo bestean sentitzen da, batzuk genero batekin konektatzen dute, beste batzuek ezta batekin, edo batzuekin besteekin baino gehiago. Feminizazioek dena aldatzen dute, eta jendeak ez du hori planteatzen. Kanpoko begiradatik jendearen arabera aldatzen da, eta beti egonen da norbait diskordian.

Feminizazioekin genero estereotipoak sustatzen dituzula atxikitzeko joera dago?

Beti galdetzen diet zer nahi duten eta nola sentitu nahi duten. Askotan esaten didate sentitu nahi dutela glamourosa, sexy eta guapa. Beste batzuetan makillaje neutroagoak eskatzen dizkidate, edo bizarra eta ileorde luzea. Badira ere, itxura ez-binarioa bilatzen dutenak. Hortaz, horren arabera lan egiten dut. Gerta liteke batzuk estereotipoetara hurbiltzea, baina jendeak eskatzen duenaren araberakoa da.

Hortaz, beharrak entzutea garrantzitsua da? Entzule ona zara?

Bai, ni oso enpatikoa nahiz, eta asko entzuten dut, jendea gustura egotea nahi dudalako. Gustuko dut jendeak sentitzea gustura egon dela, eta ondo ikusi duela bere burua. Pertsona arrunt bat diva bihurtu nahi dut. Gainera, sortzen den energia ikaragarria da.

Zer-nolako jendea ezagutu duzu?

Jende jatorra; bizitza elkarri kontatzen diogu. Galdetzen diet gaztelerazko zein izenondo nahi duten erabiltzea, noiz nahi duten erabiltzea, ea NANean agertzen ez den izenik duten. Askok ez daukate izena, eta momentuan solasten dugu horren inguruan. Ez esan arren, izen batekin amesten dute denek. Askotan amaieran esaten didate.

Horietako asko Harrotuko armairuan ezagutu dituzu; zein da gehien gozatzen duzun momentua?

Azkenean ez da soilik makillatzea, jendeak ileordeak eta arropa probatzen ditu. Oso polita da jendea etortzen denean, eta gauza pila bat probatzen dituenean, eta nahiz eta gauza bat mila aldiz probatu besteak ere probatzera animatzen dituenean.