Dirua –baina diru asko–, sexua, boteretsuen ustelkeria, zerbitzu sekretuak eta hilketa gutxi baina apartak biltzen dituen intrigazko kontakizuna nahi? Ez duzu liburukote bati haginka ekin beharrik: irakurri ingelesezko Wikipedian Jeffrey Epstein sarrera, ondoren Ghislaine Maxwell eta bukatzeko Robert Maxwell. Hona laburpena, atzekoz aurrera.

1991eko azaroan Kanariar uharteetan itota hil zen –hala ebatzi zuen polizia espainiarrak– Robert Maxwell, prentsa britainiarraren jabe handietakoa eta bi legealditan parlamentari laborista izana, 68 urterekin. 1923an Txekoslovakiako familia judu batean sortua, 1940an Holokaustotik ihes egin eta atzerriko armada txekoslovakiarrean borrokatu zen estreina, gero frontean armada britainiarrean jarraitzeko: kapitain graduarekin amaitu zuen II. Mundu Gerra.

Bi urtez zerbitzu sekretu britainiarren interprete lanetan aritu zen Berlin okupatuan, bere harreman sarea josiz Erdi Europan ari ziren KGBko agenteen artean, aldi berean Israel estatu berriaren agintariei lagunduz. Armada utzirik, edizio eta prentsaren munduan barnatu zen, Springer Verlag argitaletxe zientifiko alemanaren banaketa hartuta Ingalaterra eta AEBetarako.

1964ko hauteskundeetan Alderdi Laboristarekin aurkeztu eta parlamentari postua lortuko zuen, 1970a arte edukiko zuena. Laster iritsiko zen Maxwell Communications Corporation holdingaren sorrera eta hortik egin zen Mirror prentsa taldearen jabe: sei egunkari, tartean The Mirror ospetsua. Hedabide handien ugazaba posiziotik muturra sartu zuen futbol kluben munduan eta harremanak josten jarraitu zuen munduko agintarien artean, izan François Mitterrand presidente frantsesarekin edo Errumaniako Nicolai Ceaucescurekin.

Beti Israelgo lagunei lotua, 1986an Maxwellek Tel Aviveko gobernuari diskretuki jakinarazi zion Mordechai Vanunu ingeniari nuklearrak bere egunkarietako bati azaldu zizkiola ordura arte sekretua zen Dimonako erreaktore atomikoaren xehetasun garrantzitsuak. Erreportajea argitaratuko zen, bai, baina aurretik zerbitzu sekretu israeldarrek engainatuta –espia emakumezko eder bat tartean, Cheryl Bentov– Erromaraino eraman, bahitu eta Israelen espetxeratzea lortuta.

Robert Maxwell 1991n hil zenean, “espainolek autopsia txapuzero bat egin zuten”, idatzi berri du garai hartan Kanarietan ibili zen Jacques-Marie Bourget kazetari frantses beteranoak.  “Urtebete beranduago lortu nuen eskuratzea Maxwelli egindako bigarren autopsia, Tel Aviven Shin Bet kontraespioitza zerbitzuak egin ziona eta oso bestelako musika zeukan: aseguru-etxeek behartuta kasurako izendatu zuten forentse britainiarrak garbi adierazi zuen Maxwell asesinatu egin zutela, gorpuak kolpe eta ziztaden markak zeuzkala”.

Ordurako Maxwell kiebra jotzeko puntuan zegoen eta zorrei aurre egiteko dirua lapurtu behar izan zuela bere konpainien enplegatuen pentsio funtsetatik eta dirua itzuli ahal izateko, dio Bourgetek, egindako faboreak kobratzera jo zuen bai israeldarrengana eta bai errusiarrengana.

Maxwellek Kanarietan bere burua bota ote zuen putzura ala –Bourgetek eta beste batzuk uste duten moduan– CIAk eta Mossadek erabaki zuten arriskutsu bihurtzen ari zitzaien adiskidea kalitzea?

Lady Ghislaine

Kontua da Maxwell kareletik uretara erortzen ikusi zuen itsasontziak izena zuela Lady Ghislaine, jauntxoaren  alaba maiteenaren omenez eta Ghislaine Maxwell izan dela... Jeffrey Epsteinen andregaia eta hurbileneko laguntzailea, honek sexu-esklabotzat erabilitako nesketako batzuek salatu dutenez.

64 urterekin hil berri den Jeffrey Edward Epstein ere familia judu bateko semea zen. Gaztetan matematika irakasle hasi ostean, banka eta finantzetara egin zuen jauzi. 1976an hartu zuten Bear Stearns inbertsio banku mitikoan: mitikoa, 2008ko krisi handian eroritako sonatuenetakoa izango zelako. Baina hori askoz geroago gertatuko zen. Tartean, Epstein bilakatu zen finantzetako izar eta azti, 1981ean bere kontura jarri eta IAG Intercontinental Assests Group sortuta, porrot egindako enpresei dirua ateratzen berezituta.

Bere bezeroetako bat izan zen Adnan Khaxoggi enpresaburu saudia, arma trafikoan aberastua eta garai haietako eskandalu handietakoa izan zen Iran-Contra aferan sartuta ibili zena, AEBetako armak bai Nikaraguako kontra-iraultzaileei eta bai iraniarrei salduz, Israel tarteko.

Epsteinek bere inguruan esana zuen inteligentzia zerbitzuetan ere ari zela, erakutsiz pasaporte austriar bat gezurrezko izen bat eta jabearen bizilekutzat Saudi Arabia zeramatzana. Pasaporte hori poliziak aurkitu dio aurtengo uztailean bigarrenez atxilotu eta etxea miatu diotenean. Baina Epsteinek haizea alde izan du urte luzez.

Finantzari espekulatzaile arrakastatsua izan zen, ez beti bere bezeroei zerbitzurik onena egin zielako baizik eta  espekulazioan gertatzen diren istripuetatik –tartean Ponzi ereduko iruzurretatik– beti onik irteten zelako. Inbertsio funtsen munduan izena egina zuen, bezero eta sozioen artean zeuzkan jende boteretsuak, hala nola Ehud Barak Israelgo lehen ministro ohia. Baina justu 2007-2008ko krisitzarraren bezperetan lainotu zen Epsteinen izarra.

2005eko salaketa batetik abiatuta, poliziak bildu zituen Epstein neskato gazte eta adin gabeen predatzailea zela erakusten zuten dozenaka lekukotasun eta kriminalak berak grabatu arazitako argazki eta bideoak ere bai. Epailearekin 11 hilabeteko espetxealdia negoziatu zuen... bere jauregian eta bizimodu oparoari uko egin barik bete zuena, inpunitateak ematen duen harrokeriaz.

Baina emakume gehiagoren salaketek jarraitu zuten bata bestearen ondotik... 2019ko uztailaren 6an Epstein berriro atxilotu zuten arten.

Wikipediak ondo dokumentatuta dioenez, Epsteinek bere eraikinetako puntu askotan zeuzkan jarrita kamerak, antza denez adin txikiko neskekin jende famatuak egiten zituztenak grabatu eta gero xantaia egin ahal izateko: poliziek CD pila batean aurkitu zituzten irudiok, ondo sailkatuta. Jende gehiegi Epstein desagerrarazteko irrikaz. Espetxean lehen erasoa jasan edo suizidio ahalegina eginda, bost egun geroago hil zen, bakarrik ziegan, espetxearen kamerak deskonektatuta eta funtzionarioak lotan zeudela.

Inork ez du ikusi geroztik Ghislaine Maxwell, Robert Maxwellen alaba, Jeffrey Epsteinen andregai izana, herensugeari neskatxa gazte eta adin gabeak zerbitzatzen zizkiona.