Emakumeak borrokan

Hezkuntzaren oinarri erdaldunak

Mikel Basabe Kortabarria
2018ko azaroaren 25a

Jaurlaritzak Hezkuntzaren aldeko akordioa, akordioaren oinarriak agiria aurkeztu berri du Legebiltzarrean. Oinarri horietatik abiatuta gura du, legealdi honetan, Hezkuntza Lege berria onartu.

Agiria irakurrita, lehenengo kolpea berehalakoa da: Jaurlaritzak gaztelaniaz pentsatu ditu etorkizuneko hezkuntzaren oinarriak. 2018an, Hezkuntza Sailean, gaztelaniaz lan egin eta, ondoren –halamoduzko– itzulpena argitaratu dute euskaraz ere bai.

Bigarren kolpea hizkuntzei eskainitako atalak ematen du: hain da ahula! Pentsa: Jaurlaritzak diosku 2016-17an 16 urte bitarteko ikasleen %95ek D eta B ereduetan ikasi duela EAEn. Era berean dio 20 urteren buruan gazteen %90 elebiduna izango ei dela, nahiz eta horietako gehienak ondoen gaztelaniaz moldatuko diren. Non dago, orduan, D eta B ereduak bertan behera uzteko premia? Are gehiago, Jaurlaritzak dioskunean emaitzek erakusten dutela, gaur egun “hizkuntzak ez direla ondo ikasten”. Eta arazo hori gainditzeko hainbat neurri proposatzen ditu:

    – Irakaskuntza-metodologia aldatzea, ikuspegi komunikatiboa izan dadin ardatza.
    – “Ahozkoari behar besteko arreta ipintzea”.
    – Ikasgai guztiek izan dezatela komunikazio-gaitasuna lantzeko helburua.
    – Premia duten irakasleei laguntza ematea, “C1+ maila eta bereziki ahozkoan abilezia bikaina lortu dezaten”.
    – Administrazioak baliabideak ematea hizkuntza-planak eraginkorrak izan daitezen.
    – Hizkuntzen planifikazioa bateratua izatea, eta hizkuntza guztietako irakasleek lan-taldean jardutea.
    – “Hezkuntza sistemara sartuko diren irakasle berrien profila” zehaztea.

Galdera berez-berez sortzen da: orain artekoa hankaz gora ipini aurretik, zergatik ez dira neurri horiek guztiak orain hartzen? Errazagoa izango da, ba, zuzenean ereduak baztertzera jo beharrean, hobekuntza neurriok berehala aplikatzea ikasle guztien %95 hartzen duten D eta B ereduetan, 3L ez baita, kasurik gehienetan, B eredua baino hobea izango: aldatu euskara eta ingelesa irakasteko metodologiak, eman ahozkoari behar duen garrantzia, hobetu irakasleen euskara-maila (eta egin oposizioetan derrigorrezko euskara-azterketa), eman behar beste baliabide eta zehaztu ikastetxeen hizkuntza proiektuek eremu soziolinguistiko bakoitzean izan beharreko ezaugarri minimoak… egin hori guztia eta ikusi, epe baten buruan, ikasleen euskara-maila hobetzeko balio duen ala ez.

Bestela eginez gero, 3Lra paperean baino ez dauden oinarriekin abiatuz gero, benetako arriskua baitaukagu: hurrengo hamarkadetan hezkuntza-sistemak ahobiziak barik batez ere belarriprestak trebatuko ditu. 

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Iritzia  |  Hizkuntza politika  |  Hezkuntza

Iritzia kanaletik interesatuko zaizu...
ASTEKARIA
Azkenak
EGILEA
Eguneraketa berriak daude