Hirugarren diskoa klabea ei da, eta zuenak ñabardura eta kantu borobilenak ditu…
Egun hirugarren diskoa 80ko hamarkadako lehenaren parekoa da. Lehen, maketarekin egiten zen errodaje guztia. Disko zaila da, ordurako taldeak asko jotzen duelako. Gu estudiora kanta gabe sartu ginen, baina elkar ezagutzen dugu eta guztia jarraian irten zen.
Diskoetxeekin lan egin ostean, autoekoizpenaren alde egin duzue. Gustura? Autoekoizpena helburua edo bidea da?
Lehenik eta behin diskoetxeengana jo genuen, baina beraien arazoak bakarrik ikusten dituzte. Konturatu ginen ez duela inork taldearen alde guk baino gehiago egingo. Eta Kap-en laguntza ezinbestekoa da. Autoekoizpena bidea da. Gaur egun diskoa kaleratzea zuzenean jotzeko promozioa da, taldeak egiten duen inbertsioa.
Aurten gorriak zerekin ezkontzen du?
Ostia txarrarekin, odolarekin eta sexuarekin. Nahi genuke jende askoren pentsaerarekin ere ezkontzea, baina hainbeste hipoteka, auto eta beste, inork ez du gorrian pentsatzen; bankuak dira polizia onena.
Zer ekarri zenuten Kurdistandik?
Hizkuntza gabe musika gai dela konexioa sortzeko. Eta Kurdistanek eta Euskal Herriak asko dutela komunean, uste baino gehiago. Adibidez, izan ginen hiriko alkatea espetxean izan da, eta gure herrikoa ere bai. Orain 40 urteko Euskal Herrian bezala, folklorea zen errebeldeena. Itzuliko gara.
“Bakearen zakua, zakuaren bakua”. Askok ez dute arazo politikoa konpondu nahi…
Bakearen zakua baino ostien zakua da Euskal Herria. Negozio bat da eta konpontzen saiatzen dena espetxera doa. Eta teleberrirako albisterik ez badago, norbait atxilotuko dute.
Technoa dagoen punkyena dela esan duzue askotan…
Bai, baina atzerrian egiten dena, mezuarekin, eta “egizu zure kontu” filosofiarekin. Hona ekarri dutena gazteria despistatzeko da, 80ko hamarkadan heroinarekin egiten zuten bezala.