Zinemira-Euskal Zinemaren Panorama, horixe da aurrerantzean Donostiako Zinemaldiak euskal zinemari eskainiko dion saila. Bederatzi film proiektatuko dituzte atal berriaren barruan: Ander (Roberto Caston zuzendariarena), Checkpoint Rock (Fermin Muguruza eta Javier Corcuera), Sukalde kontuak (Aizpea Goenaga), La máquina de pintar nubes (Patxo Telleria eta Aitor Mazo), Itsasoaren alaba (Josu Martinez), Life and Film (Arkaitz Basterra), Rough Winds (Andrea Olabarria), Umurage (Arkaitz Gamarra) eta Zuzendu, mesedez! (J.M. Gutierrez). Bestalde, Imanol Uribe zuzendariak (argazkian) Zinemira saria jasoko du Donostian, hilaren 23an egingo den Euskal Zinemaren Galan.