Antzerki eta dantza garaikidea Bilbon
BAD Bilboko Antzerki eta Dantza Garaikidearen Jaialdiak 26 talderen 56 ikuskizun eskainiko ditu urriaren 27tik azaroaren 5era bitartean. Ohiko lekuez gain (Bilborock, Arriaga, Fundicion eta Bilbaoeszena), La Merced ikastetxeak eta San Frantzisko auzo etxeak ere hainbat emanaldi jasoko dituzte. Irlanda, Portugal, Frantzia, Brasil, Madril, Katalunia, Valentzia eta Euskal Herriko konpainiak arituko dira BAD jaialdiaren zortzigarren edizioan. Nexo Teatro eta Laressistens euskal taldeek aurrenekoz eskainiko dituzte euren ikuskizunak,
Hombre Arena (urriaren 29an) eta
Metidas en harina (azaroaren 4an), hurrenez-hurren. Jaialdia 0 Teatro (Zero) taldearen
Metáfora/?=0 obrak irekiko du. Informazio gehiago:
www.badbilbao.com.
Beldurrezko Zinema Astea
David Cronenberg zuzendari kanadarraren lana ekarriko du gogora Donostiako Fantasiazko eta Beldurrezko Zinema Astearen XVII. edizioak. Urriaren 28tik azaroaren 4ra bitartean haren film luze guztiak eskainiko dituzte,
Stereo (1969),
Optimes of the future (1970) eta
A history of violence (2005) tartean. Bestalde, animazio filmek tarte berezia izango dute aurtengo egitarauan. Hala, Aitor Arregik eta Iñigo Berasategik zuzendutako
Cristobal Molon euskarazko filma Kursaalean estreinatuko dute, haurrei zuzendutako emanaldi berezi batean.
Renaissance (Christian Volckman) urteko animazio film ederrenetakoa ikusteko aukera ere izango da. Informazio gehiago:
www.sansebastianhorrorfestival.com.
Tabua hizpide Galeuscan
Azaroaren 1etik 4ra bitartean egingo da Iruñean Galeusca, galizieraz, katalanez eta euskaraz lan egin eta argitaratzen duten idazleen topaketa. Aurten «tabua» gaia izango dute hizpide parte-hartzaileek. Besteak beste Ur Apalategi, Leire Bilbao, Angel Erro eta Markos Zapiain idazle euskaldunak; Isabel Clara-Simó, Nuria Albó, Teresa Bertran eta Carles Cortés katalanak eta Camilo Franco Iglesias, Bieito Iglesias, Xavier Queipo eta Isidro Novo galiziarrak ariko dira gai horri buruz solasean. Azaroaren 3an, Galeusca topaketaren baitan, hiru herrialdeetako ipuin kontalarien istorioak entzuteko parada izango da, Urdazubiko klaustroan goizez eta Elizondoko Arizkunea Kultur Etxean arratsaldez.
Nafarroako Euskal Kantu Txapelketa
Urriaren 31n amaituko da Nafarroako Euskal Kantu Txapelketan izena emateko epea. Parte hartu nahi duten hamabost urtetik gorako gazteek Euskal Kantuzaleen Elkartera (948141812) edo Esan Erran, Karrape, Aralar, Baleixe eta Euskalerria irratietara dei dezakete. Kantu Txapelketako finalerdiak azaroaren 4an eta 11n jokatuko dira, Elizondoko Lur aretoan eta Tafallako Kube aretoan, hurrenez hurren. Finala berriz, azaroaren 18an izango da Lekunberriko 31 aretoan. Hiru emanaldiak arratsaldeko 18:00etan hasiko dira.
Nafarroako Antzerki Eskolaren zikloa.
Hilaren 22an jarri zen abian Nafarroako Antzerki Eskolaren Udazkena 06 zikloa, Mofa & Befa konpainia galiziarraren Siempre Lejos izeneko ikuskizunarekin. Abenduaren 17ra bitartean umorea ardatz duten beste bederatzi emanaldi eskainiko dituzte, aurrenekoa Toda vía Teatro talde argentinarrak, urriaren 29an. Emanaldiak 20:00etan hasiko dira eta sarrerak 10 euro balio du. Aurten 60.000 euroko aurrekontua izan du antzerki zikloak.
Gure Artea 2006.
Abigail Lazkoz, Juan Perez Agirregoikoa eta Txuspo Poyo artistek irabazi dute 2006ko Gure Artea saria. Euren lanak, izena eman zuten 80 lagunen artean aukeratutako beste 13 artistenekin batera, Donostiako Koldo Mitxelena kulturunean izango dira ikusgai 2007ko urtarrilera bitartean. Argazkiak, marrazkiak, koadroak, bideoak eta instalazioak bildu dituen erakusketaren komisarioa Ismael Manterola EHUko irakasle eta arte kritikaria da. Hiru irabazleen lanak Gasteizko Artium museoan erakutsiko dituzte hurrengo urtean. Gure Artea sariak 1982az geroztik banatzen ditu Eusko Jaurlaritzako Kultura Sailak.