Gizartea
Ingurumena
Politika
Ekonomia
Kultura
Euskara
Feminismoa
Hezkuntza
Nazioartea
Iritzia
larunbata 2024ko maiatzaren 04an
Bero-beroan
IUren kongresua, Ezker Batua eta Jaurlaritza
Hilaren 19an hasiko da Espainiako IUren kongresua, eta El Correo egunkarian zabaldu izan den arabera, Rosa Aguilar eta Francisco Frutosek, Ezker Batua (EB) Eusko Jaurlaritzatik atzeratzeko ahaleginak egingo dituzte. Informazio horien egiatasunik jakitea ez da erraza, nahiz eta halako zurrumurruak aspaldi ari diren. EBtik Jaurlaritza uzteko asmoa gezurtatu egin dute. Ezker Batuan oso barneratua dute IUren egitura federala eta, alde horretatik, argi dute EAEko erabakiak Ezker Batuak hartuko dituela eta ez beste inork. Javier Madrazo sendo dago bere zuzendaritzan, eta badirudi Gaspar LLamazaresek ordezkatzen duen sektoreak ere ez duela izango berebiziko arazorik beren lerroa aurrera ateratzeko.
Ikurriña berriz politikaren lehen planora.
Nafarroan Miguel Sanz lehendakariak iragarri duen ikurriñaren aurkako gurutzada berriaren ondorioz, udaletxe ugarik kendu dute ikurriña udal aretoetatik. Leitzan, Guardia Zibilarena izandako kuartelean ikurriña jarri zelako, Patxi Sanz alkatea auzitegietara eraman du Nafarroako Gobernuak. Atarrabian, esate batera, EAk, Aralarrek eta PSNk iragarri dute ikurriñak Nafarroako eta Espainiako banderekin batera jarrai dezan saiatuko direla. EAEn, bestalde, bertako Auzitegi Gorenak Ertzaintzaren Arkauteko egoitzan Espainiako banderak ikurriñarekin batera agertu behar duela ebatzi du. Herrizaingo Sailak helegitea aurkeztu du.
Nafarroako zerrenda abertzalea gabonetarako.
Diario de Noticias egunkariak iragarri du jada Nafarroako kultur arloko pertsona abertzale eta aurrerakoiak manifestu bat prestatzen ari direla martxoko hauteskunde orokorretarako zerrenda abertzale bateratua eskatzeko. Aralar, EA, EAJ eta Batzarrek, bestalde, badirudi gabonetarako operazioaren ezaugarri nagusiak ezagutarazteko moduan izango direla. Ikusi beharko da legez kanpo utzitako ezker abertzaleak nola ikusten duen operazioa, aipatu denez, zerrenda bateratuak neurri zorrotzak hartuko lituzkeelako Espainiako gobernuak zerrenda legez kanpo uzteko aitzakiarik izan ez dezan.
Bi botereen arteko talkaren irudia
Imagina zitekeen Juan Maria Atutxa, Gorka Knörr eta Kontxi Bilbao Eusko Legebiltzarreko agintariak ez zirela bakarrik joango epailearen aurrera, baina egun bizi den egoera politiko liskartsuan, hiru agintarien agerpena Madril eta euskal botereen arteko enfrentamendu politikoaren irudi esanguratsuenetakoa bihurtu da. Botere judizialak, EAEri dagokionez eta sinbolikoki bederen, ez du ordezkatzen zuzenbide estatuaren hiru botereetako bat, Madrilgo boterea bera baizik. Auziperatze luzea izango dela dirudi, bidean artxibatzen ez bada behintzat, eta egungo giroan hori ez da gertagarriena. Ezin da ahaztu, ordea, egoera honen guztiaren sustraia Alderdi Politikoen Legean dagoela, honen ondorioz agindu baitzen Eusko Legebiltzarrean Sozialista Abertzaleen Taldea desegitea. Bai auzi honek bai Kode Penalaren erreforma berriak, Eusko Legebiltzarrean datozen hilabeteetan mugimendu handiak izango direla iragartzen dute.
Kanaldude antenan 2004an
emititzen hasiko da berriz Aldudarrak bideo elkartea Kanaldude kanalean. Iazko urtearen amaieran sei astez izan ziren antenan eta oraingoan sei hilabetez antenan egotea dute helburu. Horretarako Aldudarrak bideo elkartekoak erreportaje eta saioak landuko dituzte azaroa bitarte eta 2004ko azaroan Kanaldude jarriko dute martxan berriz. Ekonomia, kultura eta gizarte gaien inguruko saioak prestatzeaz gain, telebistaren emisio baimenak lortzen ahaleginduko dira. Iaz Donibane Garazi inguruan ikus zitekeen bakarrik eta datorren urtean Nafarroa Behereko herri ahalik eta gehienetara heltzea dute xede.
628 ziurtagiri dagoeneko
Duela hiru urte ekin zion Euskararen Gizarte Erakundeen Kontseiluak Bai Euskarari ziurtagiriak banatzeari eta epe horretan 628 gizarte eragilek eskuratu dute. Xabier Mendigurenek adierazi zuenez, «bide onetik goazela esan dezakegu, hizkuntz normalizazioaren aldeko neurri eraginkorrak abian jartzen ari diren eragileak gero eta gehiago baitira». Arloka honakoak dira datuak: ekonomia arloko 334 eragilek eskuratu dute ziurtagiria, hezkuntzako 97k, komunikazioko 12k, gizarte zerbitzuetako 63k, gizarte bizitzako 111k eta udal eta mankomunitateetatik 12k.
Asteon astero
Telebistari buruzko astekaria sortu du Topagunea Euskara Elkarteen Federazioak. Durangoko Azokan aurkeztu berri den astekariak telebista gaiak izango ditu hizpide, kolorezko 44-48 orritan. Urtarriletik aurrera hasiko dira euskara hutsezko aldizkaria banatzen eta oraingoz 60.000 ale banatuko dituzte herri aldizkariak jasotzen dituztenen etxeetan, doan. Aurrera begira 100.000 ale kaleratzea dute helburu. Jasone Osoro da agerkari berriaren zuzendaria.
Asto-Masto eta Anton Abbadia sariak
Euskararen aldeko edo kontrako jarrerak saritzea dute helburu bai Asto-Mastok eta Anton Abbadiak. Lehena Iruñeko Zaldiko Maldiko kultur elkarteak banatzen du euskararen aurkako jarrera agertzen dutenak zigortu nahian. Aurtengoa Juan Cruz Alli CDN alderdiko buruari egokitu zaio, «urteetan euskararekin erakutsi duen jarrera zuriagatik». UPNrekin bat Nafarroako Gobernuan eta Iruñeko Udalan dagoenetik atzerako bidea egin izana eta euskararen aurka egitea egotzi diote. Gipuzkoako Foru Aldundiak urtero ematen duen Anton Abaddia saria Antzuolako Elay enpresak jasoko du, euskararen erabilera sustatzeko egindako lanagatik. Duela hamabi urte hasi zuen Elayk euskara plana eta langileen %90etik gora du euskalduna. Iaz Kontseiluaren «Lana eta zerbitzua euskaraz» ziurtagiria jaso zuen.
Irakurrienak
Matomo erabiliz
#1
Xabier Letona Biteri
#3
#4
Bilbo Hiria Irratia
#5
#6
Danele Sarriugarte Mochales
Azkenak
2024-05-06
Nagore Zaldua
Arrosarioa, sexu-estrategia aurrerakoiaren adierazle
Itsaso zabalean bada izaki lirdingatsu bat, gorputz gardenekoa, bitxi bezain ezezaguna. Aitzitik, ezin esan genezake ezohikoa denik, haren banaketan munduko itsaso gehienetara zabaltzen baita, Kantauri itsasoa barne. Batzuetan bakarka topatu daitezke, besteetan aldiz lepoko edo... [+]
2024-05-06
Jakoba Errekondo
Intsusa lore edariak
Edanari emateko prest? Uda atari hau aproposa da gero berokoak etortzean ez lehortzeko edariak destilatzeko. Hezetasunari eustea garrantzitsua da gorputzari bere onenean atxikitzeko, eta etxean sortutako mamarekin bada zer esanik ez.
2024-05-06
Garazi Zabaleta
Erlauntzako airea arnastearen onurak
Eladi Balerdi erlezainaren eta Jose Manuel Atxaga erleen zale sutsuaren arteko elkarlanetik egitasmo berritzailea sortu da duela gutxi. "Arnastu erlauntzaren airea" eta "Erleen sauna" jarduerak proposatu dituzte, konbentzituta baitaude onuragarri direla... [+]
2024-05-05
Jenofa Berhokoirigoin
Adimen artifizialaren esku utzi du palestinarren hilketa Israelek
Titularra irakurri eta baten batek pentsatuko du esajerazio bat dela, neurriz kanpoko orokortze bat egin duela kazetariak. Israelgo informazio zerbitzuetako sei langile ohien lekukotasunetan oinarrituriko 'Lavender': The AI machine directing Israel's bombing spree in... [+]
Eguneraketa berriak daude