INGRID BETANCOURT KOLONBIAKO LEHENDAKARIGAIA NON DA?


2002ko abenduaren 15an
Gobernua eta gerrillaren arteko negoziaketa eten zen biharamunetik falta da. Eta berataz dagoen berri bakarra bideo batek bildua da. Uztailaren 24an Kolonbiako FARC gerrillari taldeak bidali zien komunikabideei, eta bideoan Ingrid Betancourt senadore ohi eta azken bozketako lehendakarigaia bere eskuetan duela frogatzen du. Bera eta azken urteotan laguntzaile eta laguna izan duen Clara Rojas azaltzen dira bideoan.

Emakumea ezagutzen dutenek espero zuten moduan, kementsu agertu da Betancourt. Kolonbiako gobernuaren eta hango sistema politikoaren salaketa eginez ahots argiz: kanpainaren erdian bere bahiketa eragozteko agintariek ezer ez egin izana salatu du, eta Uribe lehendakaritzara eraman duten hauteskundeak zikinak izan direla ere bai. Bestalde, bideoa ikusiko duenari ere gerrillaz ohar argia egin dio: askatasunez mintzo dela dio Ingrid Betancourtek, baina posible dela bere mezua ukituta edo manipulatuta iristea. Eta hala gertatu da: teknikari adituek ohartarazi dute bideoak lau etenaldi dituela.


POLITIKAN HAURTZAROTIK.

Nor da ordea Ingrid Betancourt eta zergatik ezagutzen dute askoz gehiago frantsesek eta europar guztiek, normalean Hego Amerika hain ondo kontrolatzen dugun "espainolok" baino? Frantziako telebistan programa osoak eskaini dizkiote Betancourti, eta bere liburua frantsesez argitaratu da. Bera askatzeko kanpaina daraman talde nagusia ere frantsesa da.
Betancourten biografiak eskaintzen du horren esplikazioa. Haren aita Gabriel Betancourt Kolonbiako hezkuntza ministro izan zen eta Unescoren enbaxadore ere bai. Hori dela eta, ikasketak ere Parisen egin zituen alabak, Pariseko Sciences Po (Zientzia Politikoak) karrera famatua. Ingriden lehen senarra frantses diplomatikoa zen eta seme-alabak elebitasun horretan hezi ditu. Harengandik bereizi ondoren, gaurko senarra Juan Carlos Lecompte Perez du.
1961ean Bogotan sortua, aita bezala, ama ere emakume ezaguna zuen. Yolanda Pulecio, ama, senadore izatera eraman zuen kanpainan parte hartuz murgildu zen politikan Ingrid. Yolanda, Luis Carlos Galan lehendakarigaiaren laguntzailea zen. Eta 1990ean narkotrafikatzaileen eskumutilek kanpainako mitin batean Galan tirokatu zutenean, emakume horren besoetan hil omen zen.
"La rabia en el Corazon" («La rage au Coeur») liburuan dioenez, gertakizun hark markatu zuen betiko Ingrid. Eta hau Seychelle uharte paradisiakoak utzi (han diplomatiko lanetan ari zen orduan bere senarra) eta bi haurrak hartuta Kolonbiara itzuli zen, aitak esana baitzion gaztetan: "Kolonbiako haur bakar batek ere ezagutu ez dituen pribilejioak ezagutu dituzu, eta ordaina zor diozu aberriari". Galanen alderdi berarekin aurkeztu zen estreina, Alderdi Liberalarekin, eta 1994an, diputatu kargua eskuratu zuen.

HAMARKADA BATEKO IGOERA HARRIGARRIA.

1994an Ernesto Samperren aldeko kanpaina egin zuen, hau lehendakaritzara iritsi zedin. Baina laster bereizi zen alderdi horretatik: 1998an Oxigeno Verde talde politikoa antolatu zuen eta horrekin senadore lekua eskuratu.
Aurten burutu diren hauteskundeetarako Colombia Nueva hautagaitza osatu zuen, bera buru zela. Horretarako senadore postua utzi zuen, eta dimisioa aurkeztu zuen egunean, hala esan omen zien osoko bilkuran zeuden senadoreei: «Gaur nik dimitu dut, baina lehendakari izango naizenean, zuek denoi dimitiaraziko dizuet».
Ohikoa ez den bezalako kanpaina egin zuen bere aldetik. Batzuek oso mediatikoa eta beste batzuek populista deitu duten, baina, edozein modutan, beste hautagaien kanpainetatik oso ezberdina zen kanpaina. Munduko kazetariek azpimarratu zuten Kolonbiako herri eta auzo txiroenetaraino iristeko bere estilo lau eta zuzena, bi hautagai nagusien karabanetatik hain ezberdina. Eta bozketen aurreko zundaketek ere aukera onak eskaintzen zizkioten.
Baina hauteskunde kanpainaren erdi-erdian bahitu zuen FARCek. Bahiketa nola gertatu zen azpimarratzekoa da. Artean lehendakari zen Pastrana presidenteari -bere abioian San Vicente de Caguanera zihoala-eta- Betancourtek eskaria egin zion abioiz ez bazen helikopteroz haruntzaino joaten uzteko, kazetarien tartean, protokolo gehiago gabe. Ez zuen baimen hori lortu eta militarrek ez zioten segurtasunik bermatu herri hartarako bidean.

Herri hori bake negoziaketen garaian FARCei izendatutako lurraldearen barruan zegoen, eta bertako alkate Néstor Leon Ramírez, Betancourten Verde Oxígeno taldekoa zen. Kanpaina garaian San Vicentera joango zela hitz emana zien bertako biztanleei, eta hauek gainera une larriak ari ziren pasatzen, otsail horretako 20tik negoziaketak etenda zeudelako.

Gauzak horrela, autoz abiatu zen Betancourt lehendakarigaia San Vicente de Caguanera, eskoltarik eta militarrik gabe, otsailaren 22an. Eta bidean galdu zen bere arrastoa... maiatzean grabatu eta uztailean FARCek Canal Uno telebistako kazetariei iritsiarazi zien bideoa arte.

GERRILLAREN ETA NARKOTRAFIKOAREN ERDIAN LEKURIK BAI?

Ingrid Betancourten liburuaren bi kapitulu Interneten daude, lehena eta azkena. Irakurtzekoak dira.
Politikari batek bere arrazoiak agertu nahi dituenean, irakurle eszeptikoak badu mesfidati begiratzeko arrazoirik.
Baina anekdota eta pasarte biografikoetan hartzen zaio pertsonari (eta bere inguruari) neurria. Eta bere liburuan badu bat latza Betancourtek: gizon doteore bat agertu zitzaion Parlamentuko bulegoan, 1996an, eta honen mehatxuak jaso zituenrko elkarrizketa Interneten dago. Hona bisitari bitxiaren esaldi bat: «Ez, ez da mehatxua. Ez naiz zu beldurtzera etorri, ohartaraztera baizik. Jakin behar duzu arriskuan zaudela, zure familia arriskuan dagoela. Zutaz kontratu bat sinatu duten jendeen izenean etorri naiz. Alde egiteko aholkua eman nahi dizute. Argi mintzatuko naiz: sikarioak jadanik ordainduta daude». Eta ondoren diputatua korrika ageri da, bere haurrak eskolatik atera, abioian sartu eta senar ohiari eramateko.
Emakume honi eta munduan dituen jarraitzaileei sinestekotan, istorio epiko baten aurrean gaude. Beste batzuk, Alain Devalpo izeneko kazetaria kasu, askoz kritikoagoak dira beren epaian. Eta askok Jeanne D'Arc heroia ikusten duten lekuan berak Juana La Loca ikusten du. "Bere adimena, bere xarma, eta probokazio mediatikorako duen zaletasuna", azpimarratu ditu Ingrid Betancourtengan «Le Monde»ko korrespontsalak.
Edonola ere, XXI. menderako lider berri bat... bizirik uzten badute

http://www.argia.eus/nethurbil helbidean, gai honi buruzko informazio gehiago eta Interneteko loturak.


Azkenak
2024-03-31 | Julen Azpitarte
Zinearen historiako film-kontzerturik “onena”

Oscar sari andana jaso zuen The Silence of the Lambs (1991) thriller-a zuzendu zuen Jonathan Demme (1944-2017) zinegile estatubatuarrak estreinatu zuen zineak inoiz eman duen kontzerturik onena: 1970eko hamarkadaren erdialdean New Yorken eratutako Talking Heads taldearen Stop... [+]


"Enpresa pribatuen esku utzi da segurtasun publikoaren norabidea"

Ertzaintzaren azken hamarkadako bilakaera teknologikoa aztertu du bere liburu berrian Ahoztar Zelaieta ikerketa kazetari, kriminologo eta ARGIAko kolaboratzaileak. Segurtasunaren industria ikertu eta Ertzaintzarekin duen lotura plazaratu du, La Ertzaintza que viene... [+]


Campi Bisenzioko GKN fabrikan batu dituzte langile borroka eta ekologismoa

2021eko uztailaren 9an jaso zuten kanporatze abisua Campi Bisenzioko GKN lantegiko 422 langileek. Biharamunean berean abiatu zuten fabrikaren okupazioa eta orduz geroztik bertatik dabiltza borrokan, deslokalizazioaren aurkako borroka zena bestelako industria eredu baten aldeko... [+]


Judith Bilelo Biachó
"Erakundeek ez digute lagunduko, guk geure hizkuntzan hitz egitea lortzen ez badugu"

Judith Bilelo Biachó gure artean izan zen iragan udazkenean, Garabideren Aditu programaren karietara. Ekuatore Ginean jaioa (Malabo, Bioko, 1975), bubi etniako kide da, bubiera hiztun eta hizkuntzaren aldeko militantea. Iraganaz bezainbat mintzo da orainaz, geroari... [+]


Eguneraketa berriak daude