JUAN Jose Ibarretxe Lehendakariak, Gipuzkoa eta Bizkaiko diputazioek eta Eudelek Bizitzaren eta askatasunaren aldeko adierazpena sinatu berri dute, Eusko Jaurlaritza osatzen duten EAJ, EA eta Ezker Batuaren sostenguarekin. Adierazpenak Batasuna udaletxeetatik baztertzeko ekimenik proposatzen ez duela eta, PPk ezezko borobila eman dio adierazpenari. PSE-EEk, aldiz, adierazpenean parte hartzeko aukerarik ez dutela izan salatu du eta horregatik ez dutela sinatu, beraientzat atea itxita dagoela azpimarratuz. Eusko Legebiltzarrean Ostiralean autogobernuari buruz egingo den osoko bilkuran izango da hurrengo termometroa eta bertan ikusiko dira indar politiko bakoitzak aurrera begira erakutsiko dituen kartetako batzuen nondik norakoak.

URRIKO hirugarren asteak Polizia Nazionalak egindako 10 atxiloketa eraman ditu berarekin. ETAren Donostia komandoa ia guztiz indargetu dutela aipatu dute polizi agintariek. Ez da zalantzarik azken hilabeteetan egiten ari diren atxiloketa ugariek behin eta berriz kolpatzen dutela erakunde armatuaren egitura; zalantzarik ez dagoen moduan ETAk behin eta berriro erakusten duela bere egitura berrosatzeko ahalmena. Sarekada desberdinen harira behin eta berriz aipatzen da ETA gero eta ahulago dagoela, eta pentsatzekoa da arrazoi izan dezaketela; denbora eta urteen iraganak, ostera, atentatuak eta atentatu saiakerak dakartzate behin eta berriro -Madrilgo urriaren 12koa moduakoak- eta horrek polizi jarduera hutsetan oinarritutako estrategiak agerian uzten ditu.

ELKARRIK Bake Konferentzian alderdien artean moderatzaile gisa arituko den zortzikotea ezagutarazi du dagoeneko. Honakoa da taldea: Sabino Aiestaran, EHUko Sikologia Sozialeko katedraduna; Victoria Camps, Bartzelonako Unibertsitate Autonomoko Etika katedraduna; Mariano Ferrer kazetaria; Juan Pablo Fusi historia katedraduna; Sylvia Gay, Lanaren Zuzenbidearen irakaslea EHUn; Ramon Mujika, Deustuko Unibertsitateko Zuzenbide irakaslea; Juan Manuel Sinde, industria injeniaria eta Jesus Valencia hezitzaile soziala. Zortzikotearen zeregina euskal gizartean egon daitezkeen gutxieneko akordioei buruz alderdiekin batera testu bat adostea da.

JUAN Jose Ibarretxe aspaldi ari da herri kontsultaren aipamena eginez, lehenago edo geroago gauzatu egingo direla aditzera emanez baldin eta PPk eta ETAk beren egungo jarduerak aldatzen ez badituzte. Xabier Arzalluzek, ETAri buruzko kontsulta bat izan daitekeela azpimarratu du, eta herritarrei zuzenean galde dakiekeela ETA desagertzeari buruz duten iritzia. Autogobernua dela eta, Arzalluzen ustez 15 urteko epea beharko da Euskal Herriak Europan behar duen lekua izateko.

HAUTESKUNDEETAKO emaitza txarren ondorioz ezker abertzaleko munduan konfiantza galdu izana onartu du Batasunak behin baino gehiagotan, eta azken hilabeteetan konfiantza hori berreskuratzeko ahaleginean murgildurik ari da. Ildo politikoari dagokionez, euskal herritar guztien eskubide zibil eta politikoak Euskal Herri osoan bete daitezen aldarrikatzen ari da, eskubide horien artean autodeterminazioarena nabarmenduz. Eskubide hau aldarrikatzeko datorren azaroaren 17rako manifestazioa deitu du Bilbon.

BAIONAN laborantza ganbara izatea eta Ipar Euskal Herriko nekazarien arazoei bertatik aurre egitea da ELBren aldarrikapen nagusienetakoa. Eskaerak gero eta sektore zabalagoen sostengua du Iparraldean eta hilaren 27an Baionan manifestazio zabala egingo da aldarrikapena gauzatu dadin eskatzeko.

NAFARROAKO aurrekontuen negoziazioa hasia da jada eta PSNk 51 gaiei buruzko negoziazio proposamena egin dio UPNri. Negoziazio gogorra espero da, eta akordiorik ez bada UPNk aurtengoak luzatuko ditu.