Euskal Autonomia Erkidegoko (EAE) hiru lurralde historikoetako Batzar Nagusietan izaniko emaitzen irakurketak bi modutara burutu ditugu hasiera batean: Euskal Legebiltzarrerako azkeneko kontsultari begira nahiz 1995ean Batzar Nagusietarako izan ziren emaitzak kontuan harturik. Iazko urrian Euskal Autonomia Erkidegoan bildu ziren botoak eta ekain honetako 13ko botoak alderaturik, Euskal Herritarrok izan da boto gehiago bildu duen indar politiko bakarra: 5.583 boto hain justu. EAJ-EA koalizioak 54.169, PPk 39.947, IU-EBk 17.272, PSE-EEk 6.358 eta UAk 6.284 boto galdu dituzte bien bitartean. 1995eko eta oraingo datuen arteko konparaketa eta irakurketa bestelakoa da ordea. Alderdi galtzaileak IU-EB (-36.871), EAJ-EA koalizioa (-34.492), UA (-14.004) eta ICV-Gorordo (-12.129) izan dira. Irabazleak berriz, EH (+68.295), PP (+48.955) eta PSE-EE (+26.277) izaki. Bi irakurketetan erreparatuz gero, indar irabazle bakarra bi hauteskuendeotan Euskal Herritarrok izan da. Batzar Nagusietarako izaniko gorakadak indar berri honen espektatibak areago berritzen dituelarik.

Aurreko legealdian EAJk 20 batzarkide izan zituen eta EAk berriz 1. EAJ-EA koalizioak 16.029 galdu dituen arren, batzarkide kopuruari eutsi egin ahal izan dio. PSE-EE alderdiak batzarkide kopuru bera izanen du eta PPk batzarkide bat gehiago, bestalde. Kudeaketa politikoa egin ohi duten alderdi politikoen artean ez da funtsean deus aldatu. Oposizioan egoten ohituta daudenen artean berriz, EH da oso indartua atera dena: 5 batzarkide zituen eta 9 izanen ditu hurrengo legealdi honetan. IU-EBk 4 zituen eta bakarra izanen du berriz. ICV da kolpe gogogorrena jasan duena, Bizkaiko Batzar Nagusietatik desagertzen baita legealdi honetan. Jose Maria Gorordoren alderdiak 2 batzarkide zituen azkeneko hauteskunde hauek burutu arte. Ondo bidez, Josu Bergara jeltzalea ahaldun nagusia izanen da inolako oztoporik gabe. Lizarra-Garazi akordioaren partaide diren eta ez diren alderdien arteko binomioa 30 eta 20 batzarkide da.

Gipuzkoan ere ahaldun nagusi berak gidatuko du Foru Diputazioa: Roman Sudupe jeltzaleak. Hala izanik ere, kalkuluak ez dira EAJ-EA koalizio nazionalistarentzat onuragarriak izan. Aurreko legealdian baino hiru aulki gutxiago izanen dituzte Batzar Nagusi berriaren mahaian, alderdi espainolistek berriz, PP nahiz PSE-EEk, bana irabazi dutelarik. EHren gorakadak –hiru batzarkide gehiagorekin– konpentsatzen du euskal nazionalistek izaniko galera. EH agertzen da aro politiko berrian alderdi gakoa. Izanik ere, Euskal Herritarrok da lurralde historiko honetan, Lizarra-Garaziko indarren artean, hegemonia erakusten duen alderdi bakarra; IU-EB alderdia Gipuzkoako Batzar Nagusietatik desagertzen den bitartean.

Felix Ormazabal jeltzaleak, azkeneko bi legealdietan ahaldun nagusia izan ondoren, Arabako Batzar Nagusiko aulki gorena Ramon Rabanerari (PP) utzi behar izan dio. Ez EAJ-EAren arteko koalizioak ekar zezakeen botu gorakadak, ezta hauteskunde kanpainan erakutsitako jarrera posibilistak eman izan diote Felix Ormazabali berritzea espero zuen kargua. 19 batzarkide nazionalista izan ziren aurreko legealdian Arabako Batzarrean eta 16rekin konformatu beharko dira legealdi berrian. EH 4tik 6ra pasatzen da, eta, IU-EB berriz, 3tik 2ra jaisten da. Dena dela, kasu hoberenean ere, Lizarra-Garazi adierazpenaren alderdiek lurralde historiko honetan 24 biltzarkide besterik ez dituzte biltzen. Eta 51 batzarkidera bitartekoak –27– adierazpenaren kontrakoak dira ordea: PPk 16 erdietsi ditu; aurrekoan baino 5 gehiago. PSE-EEk berriz 9, hau da, 2 batzarkide gehiago. IUk 3 zituen eta 2 lortu ditu. Unidad Alavesa izan da beherakada handiena jasan duen alderdia. Alderdi Popularra da, berriz, honen porrotari etekin handiena atera diona. Aldi berean, ezkerrari erreparatzen badiogu, ezker joerako –PSE-EE eta IU-EB alderdi estatalisten eremua– batzarkide bat gehiago besterik ez da atera Araban.

Bizkaia, Gipuzkoa eta Araba lurralde historikoetan emaniko datu berriek nolabaiteko botu joera berria erakutsi digute Euskal Autonomia Erkidegoan, eta Lizarra-Garazi adierazpena gauzatu ondorengo aro berri honetan bi konstatazio berri nabarmendu ere: batetik, euskal abertzaleen eremuan ezker abertzalearen aukera den Euskal Herritarrok alderdiak protagonismoa berreskuratu duela EAJ-EAren kaltetan. Bestetik, abertzaleek Araban galduriko lidergoaren ondoren abertzaletasunak Euskal Autonomia Erkidegoaren barnean zuen hegemonia hautsi da. Araba da abertzaleek legealdi honetan gehien landu beharko duten lurraldea