KONTZERTUAREN inguruan EAE eta Madrilgo gobernuaren auziak aurrera darrai eta erasoa gero eta gogorragoa izango bide da. Azken jardunean, Madrilgo Gobernuak Pertsona Fisikoen Errentaren Gaineko (PFEZ) zergaren artikulu bati (kanpoan bizi diren zergadunei dagokiona) elegitea jarri dio EAEko Auzitegi Nagusian. Horrez gain, Madrilek Arabako Foru Aldundiaren 1999ko aurrekontuen aurka egin du (Arabako PPk onartu egin zituen eta araudi fiskal berriaren gaian abstenitu egin zen). Datorren maiatzaren 4an, bestetik, Europako Justizia Auzitegi Nagusiak euskal kontzertuaz erabakiko du Luxenburgon. Ebazpena ez da bete beharrekoa baina garrantzi handia izango du euskal kontzertuari etorkizunerako.
LIZARRA-GARAZIKOAK KALERA«Bakea eraikitzen. Euskal Herriak du hitza» lelopean, Lizarra-Garaziko indarrek mobilizaziora deitu dute euskal gizartea. Iragan ostiralean konzentrazioak egin ziren Euskal Herriko herrietan eta datorren 10erako manifestazioa deitu da Bilbon. Bi egun beranduago, apirilaren 12an, ordubeteko lanuztea –12etatik ordubatera– deitu da Euskal Herri osoan. Madrilgo azken ekimena medio eta, batez ere, Jaime Mayor Oreja buru Espainiako Gobernuaren jarrera geldikorraren erantzun gisa deitu dira mobilizazioak.
AAB-EN ISUNAKAMNISTIAREN Aldeko Batzordeek deitutako legez kanpoko ekitaldietan partehartzeagati, 134,2 milioi pezeta (5,36 milioi libera, 0,8 milioi euro) zor dituzte kontzentrazio horietan arduradun gisa agertutako herritarrek. Alabaina, Javier Balzak zuzentzen duen departamenduak isunak bertan behera utz ditzakeela dio zurrumurruak, Balzak berak halakorik ukatu badu ere.
IKERKETA TALDEKOAK ASKEMARTXOAREN 25ean Madrilgo Entzutegi Nazionalean Baltasar Garzon epailearen aurrean deklaratu ondoren, Pepe Reiren «Egin»eko ikerketa taldeko zazpi kide aske geratu zen inongo kargu hartze barik.
ERAIKIKASI KANPAINAELKARRI erakundeak Eraikikasi kanpaina jarri du abian «bake prozesuan parte hartze soziala bultzatu eta herritarren ekarpenak ezagutzera emateko». «Erraztu, elkarlanean aritu, ez baztertu eta demokrazian sakondu» dira Elkarrik kanpaina hau bideratzeko erabiliko dituen lau oinarri nagusiak. Lau lelo hauek bake prozesu batean duten garrantziaz ohartarazi nahi ditu herritarrak, bide batez, bizi dugun unearekiko hausnarketara bultzatuz.
IRRATI LIZENTZIEN BANAKETANAFARROAN iaz egin zen irrati lizentzien banaketa ikertzen ari den batzordea bere lanaren amaierara iristen ari da eta ez dirudi UPNk egindako banaketa ontzat emango denik. PSNk lizentzien banaketarako lehiaketaren errepikapena eskatzen du; CDNk, aldiz, –EAk bezala– Jose Ignacio Palacios Nafarroako Gobernuko Herri lanetarako kontseilariaren dimisioa eskatzen du. HBk lizentzia Euskalerria Irratiari eman dakion eskatuko du, lehiaketan lizentzia Irrati honi zegokiolako.