Zubietako erraustegi inguruetan kutsaduraren “igoera kezkagarria” aurkitu eta martxara deitu dute

  • Zubietako erraustegi inguruan laginak biltzen bost urte daramatza ToxicoWatch fundazioak, metal astunen, dioxinen, PCBen eta PFASen bila. Horiek guztiak ageri dira laginetan eta gainera kutsaduraren “igoera kezkagarria” aurkitu dutela jakinarazi du Errausketaren Aurkako Mugimenduak, astearte arratsaldean emandako prentsaurrekoan. Maiatzaren 18rako martxa deitu dute.

ARGIA CC By SA

2024ko maiatzaren 08an - 11:37
Azken eguneraketa: 17:31

Maiatzaren 23an analisien emaitzak zehatz aurkeztuko ditu ToxicoWatch fundazioak, Hernaniko Sandiusterrin, eta maiatzaren 27an aurkezpen teknikoagoa egingo du Usurbilgo Sutegi aretoan, baina datuen aurrerapena egin berri du Erraustegiaren Aurkako Mugimenduak. Bost urte daramatza Herbeheretako fundazioak laginak biltzen erraustegi inguruko uretan, erreketako sedimentuetan, lurretan, goroldioan eta zenbait landare hautatutan, baita inguruko zenbait familiak autokontsumorako dauzkaten oilategietako arrautzetan ere. Emaitza: “Landareetan igoera nabarmenak ikusten dira dioxinetan, PCBetan eta PFASetan. Adibidez, gorostien hostoetan ikusten da dioxinak eta PCBak bikoiztu egin direla. Goroldioan ere dioxina eta PCBen igoerak oso handiak dira. Lurpeko uretan metal astunen aztarnak (beruna, zinka, kobrea…) biderkatu egin dira. Aztertutako arrautzek berriz, dioxina eta PCB maila altuak dauzkate eta igoera oso nabarmenak ikusi dira, jangarriak izateko muga legalak gainditu dituzte”.

Mugimenduak gogoratu du PCB eta PFASak, “kutsatzaile eterno” gisa ere ezagunak, debekatu nahian edota horien kontrola legez arautzeko bidean direla Europa osoan.

Bestetik, maiatzeko egun horietan Zero Waste Europe (Europa Zero Zabor) federazioko kideak ere bertan izango direla aurreratu du Errausketaren Aurkako Mugimenduak. Europako hainbat erraustegik eragiten duten kutsadura ari da aztertzen ZWE.

"Hondakinak kudeatzeko badaude errausketa baino sistema hobe, garbiago eta merkeagoak, eta martxan dauzkagu hainbat herritan. Alferrikako erraustegi hau gelditu beharra daukagu"

Maiatzaren 18an, erraustegira martxa

11:00etan Lasarteko Okendo plazatik abiatuta, Zubietako erraustegiraino oinezko martxa deitu du Errausketaren Aurkako Mugimenduak, Donostia Bizirik, Eguzki eta Ekologistak Martxan elkarteen babesarekin. Agintariei eskatuko diete “geldi dezatela erraustegia, ez dezatela gehiago hondakinik erre, ez Zubietan, ez Añorgan, ez Bergaran eta ez inon. Hondakinak kudeatzeko badaude errausketa baino sistema hobe, garbiago eta merkeagoak, eta Gipuzkoan bertan martxan dauzkagu hainbat herritan. Alferrikako erraustegi hau gelditu beharra daukagu”, adierazi dute.

Hori bai, erraustegia martxan dagoen bitartean, "erraustegiaren arduradunen lehentasun izan behar du bermatzea bertatik ez dela zabaltzen ez dioxinarik, ez PCBrik, ez PFASik, ez metal astunik eta ez bestelako kutsatzailerik", eta horretarako emisio guztien kontrol jarraitua egitea premiazkoa dela dio mugimenduak. Are gehiago, kutsaduraren azterketa tekniko hauek ez lukete herri mugimendu baten ardura izan behar, kritikatu dute: "Aginte publikoei dagokie herritarren eta naturaren osasuna bermatzea, gardentasun osoz". Gipuzkoako Foru Aldundiari eta Eusko Jaurlaritzari eskatu diete daukaten informazioa eta dauzkaten datuak "gardentasun osoz erakutsi ditzatela".

Ikusi Errausketaren Aurkako Mugimenduak Zubietako frontoian egindako agerraldia

 


Kanal honetatik interesatuko zaizu: Gipuzkoako erraustegia
Zubietako erraustegia kudeatzen duen enpresari zigorra jartzeko eskatu du Nafarroako Gobernuak

Artaxoako Ecofert enpresara baimendu gabeko hondakinak eramateagatik, Zubietako Ekondakin enpresari zigor-espedientea abian jartzeko eskatu dio Nafarroako Gobernuak Eusko Jaurlaritzako Ingurumen Sailari. Jose Maria Aierdi Nafarroako Ingurumen kontseilariak jakinarazi duenez,... [+]


Erraustegiak lehen pozoiak erakutsi baldin baditu... zer egin?

Gipuzkoako erraustegiaren emisioen bost urteko jarraipenaren emaitzak aurkeztu ditu ToxicoWatch fundazioak. Emaitza kezkagarriak, bizidunei eta zehazki gizakiei osasun kalte larriak eragin diezazkieketen kutsatzaileez ari garelako. Emaitza nabarmenak, erraustegi berria eta ustez... [+]


Zubietako erraustegia martxan jarri zenetik, toxikoak asko handitu dira inguruko herrietan

Bost urtez aritu da laginak hartzen Toxicowatch erakundea erraustegiaren inguruko oiloen arrautzetan, goroldioan, zuhaitzetan, sedimenduetan eta ama esnean, besteak beste. 2019tik dioxina maila asko handitu da, baita metal astunak, PFASak eta beste gai oso kutsagarri batzuk ere... [+]


2024-05-20 | Usurbilgo Noaua
Erraustegia geratzeko protesta planta atariraino eraman dute

Zubietako erraustegia geratzeko Errausketaren Aurkako Mugimenduak deitutako oinezko martxan parte hartu dute larunbat goiz honetan.


2024-05-20 | Usurbilgo Noaua
“Itxi ezazue behingoz, alferrikako erraustegi zikin, arriskutsu eta garesti hau!”

Zubietako erraustegia ixteko eskaria atariraino eraman du Errausketaren Aurkako Mugimenduak larunbat honetan Lasarte-Oriatik abiatu duen oinezko martxan. Ertzaintzak sarbidea inguratua zuen atari horretan bertan plazaratu duen adierazpenean, erraustegia behingoz ixtea eskatu... [+]


Eguneraketa berriak daude