Paueko prefetak urte hasieran pasabide horietan kontrolak jartzeko agindua eman zuenean, “terrorismo islamiarra, drogak eta legez kanpoko inmigrazioa” aipatu zituen mugak ixteko arrazoi gisa. Harrez geroztik, Zuberoako zein Nafarroako bi bailaretako herritarrek hainbatetan eskatu dute mugak irekitzeko. Halaxe adierazi dute ARGIAra bidalitako agirian:

“Hiru bizi eremuetako herritarren arteko harreman kulturalak eta ekonomikoak baldintzatu dizkigute, eta oroz gainetik, familia arteko harremanak zangopilatuak izan dira. Frantziako Estatuaren ordezkari den Paueko prefetak lekuko herritarrak eta instituzioak mespretxatzen ditu. Ez dugu onartzen euskal herritarren arteko harremanak baldintzatzen eta oztopatzen dituen erabakia”.

Mobilizazioaren eragileek azaldu dutenez, iragan uztailean Zaraitzuko eta Erronkariko tokiko erakundeek idazkia bideratu zuten Nafarroako Gobernura, mugak irekitzeko egin beharreko eskaerak egin zitzan Frantziako Estatuko agintarien aurrean. Aztertuko zutela erantzun zieten Foru Gobernutik, baina, salatzen dutenez, mugak oraindik itxita daude.

Larraineko edo Iturzaetako portuan egindako bilkuran esan zutenez, mendateok libre ez iragan ahal izateak herritarren oinarrizko eskubideak urratzen ditu eta ez dute debekua errespetatuko. “Euskal Herrian gaindi ibiltzeko eskubidea" aldarrikatu dute eta, gainera, ekimena baliatu nahi dute “Erronkari, Zaraitzu eta Zuberoako herritarren, eragileen eta instituzioen arteko saretzea aldarrikatzeko. Harreman sareak birsortu eta elkarlana sustatzeko engaiamendua hartzen dugu”.