Migrazio eta Asilo Ituna Giza Eskubideen eta Europaren balioen «aurkakoa» dela salatu dute kolektiboek, eta eskuin muturraren agendak markatu duela.

Azaldu dutenez, dagoeneko ematen diren hainbat praktika «legeztatu eta zabaltzea» ekarriko du ituna onartzeak. Horien artean honakoak aipatu dituzte:

• Estatu kide bakoitzak «Hirugarren Herrialde Seguruen» zerrenda egingo du, eta horrek esan nahi du nazionalitate horiek dituzten pertsonek ezin izango dutela asilorik eskatu Batasuneko estatuetan.
• Berehalako kanporatzeak eta deportazioak legeztatuko dira eta Frontexek erabateko askatasuna izango du.
• Dublingo Itunaren epea luzatuko da, eta, beraz, oraindik egoera erregularizatu gabe duten pertsonen egoera are larriagoa izango da.
• 6 urtetik aurrerako umeak ahalko dituzte deportatu eta aurpegi eta hatz-marken azterketak egin.

Gogorarazi dute, gainera, Europako herrietara iristea lortzen duten pertsona migratuek desberdinkeria jasan behar dutela, eta forma askotako arrazakeria.

«Heriotza eta kanporatze politikak» amaitzea exijitu dute eta errespetua, berdintasuna eta duintasuna oinarri izango duten migrazio-politikak egitea.