“Europako armada baterantz jo beharko genuke, urrats handiak ari dira egiten azpiegitura militar bat eraikitzeko”. Hala mintzatu zen duela hilabete batzuk Izaskun Bilbao EAJko europarlamentaria. 2016an, “Ukrainako krisia” deiturikoan, bi hegazkin bonbaketari errusiar ibili ziren euskal kostaldearen gainean eta ordezkari jelkideak ahalegin handiagoa egin zuen armada europar baten sorrera bizkortzeko eta “eragozteko errusiarrek horrelako sarraldi gehiago egitea”.

Europak daukan Defentsa arloko Industria Garatzeko Programan parte hartzen duten euskal konpainien artean nagusi da Satlantis Microsats bizkaitarra. Leioako (Bizkaia) kuartel nagusia 2019ko otsailean inauguratu zuen Iñigo Urkullu lehendakariak. Konpainiak bere aurkezpenean dio ”satelitezko soluzioak” eskaintzen dituela, irtenbide satelitalak eskaintzen dituela “segurtasunaren arloko erronkei” erantzuteko. Zehazki, bere negozio ereduaren gako nagusitzat aipatzen ditu “itsasoaren eta mugen zainketak”. Bera da  gaur egun Nemo eta Optisse proiektuen burua; proiektu horiek 4 milioi euro eta 874.000 euro jaso dituzte, hurrenez hurren, eta Europako bijilantziarako funtsetatik .

EAEko dirulaguntza publikoak

EAEko administrazio publikoek milioiak gastatu dituzte Satlantis Microsats laguntzen. Adibidez, Bizkaiko Foru Aldundiak 959.999 euroko dirulaguntza eman dio enpresaren “Bizkargi” proiektuari; horren helburua da “bereizmen oso handiko lurreko behaketarako lehen satelite estandarizatu industrializagarria garatzea”. Satelite-konpainiaren beste ekimen batzuetarako dirua ere jarri du: 422.880 euro Kubekam proiekturako, 85.587 Stalan-Bat-erako, 52.642 Lamia-rako eta 30.000 ISM-erako.

Bestalde, Eusko Jaurlaritzak Hazitek programako laguntzen esparruan funts publikoak jarri ditu Satlantisen beste proiektuotan: Lur-1 (1.053.247 euro), Igela (118.102), Pegasso (56.000) eta Lur (54.807). Gainera, Eusko Jaurlaritzak enpresaren inFocus proiektuan inbertituko du.

Dirulaguntzen atala amaitzeko, Seed Capital Bizkaia erakunde publikoak 997.839 euro dauzka inbertituta konpainia honen akzioetan. Guztira, NATOren eta Errusiaren arteko gerra-arriskuaren beroaldi betean, Europako Armadari eta espazioaren konkistari egindako ekarpenak diru-kutxa publikoei kostako zaizkie lau milioi gehiago.

Bushentzat lan egindako presidentea

Satlantis Microsatseko akziodunen artean nabarmentzekoa da Everis aholkularitza-enpresa, lehendakari daukana Eduardo Serra Defentsa ministro ohia. Honek garrantzi berezia eduki du satelite-konpainiaren funtzionamenduan. Hordago-El Salto-k eskuratu ahal izan duen dokumentu baten arabera. Everiseko zuzendaritza-taldeak erabaki zuenean Satlantisen FIT Inversión enpresak zeuzkan akzio guztiak erostea, babesa eman zion aurrez Espainiako Defentsa Ministerioaren eta CNI Espainiako zerbitzu sekretuaren oniritzia jaso zuen bazkide industrial batek. Alde horretatik, isilpean Satlantis sendotuta dago Espainiako estatuan, protagonista nagusi moduan.

Bestalde, enpresak NATOrekin daukan harremana are sendoago dago joan den apiriletik: hilabete horretan Satlantis LLC jatorrizko enpresa iparramerikarrak presidente berri izendatu zuen Sean O’Keefe, George H. W. Bush lehendakari zela hainbat goi kargutan egona. O’Keefe  izana da, besteak beste, Presidentearen Aurrekontu Bulegoko zuzendariordea, Estatu Batuetako Itsas Armadako idazkaria baita Defentsa Departamentuko Chief Financial Officer ere.

Ricardo Martí Fluxá TEDAE Defentsa Enpresen Elkarteko presidenteak –ITP Aero euskal enpresako presidente ohi eta Segurtasuneko Estatu idazkari ohia ere badenak– goraipatu egin du Eusko Jaurlaritza armagintzari ematen ari zaion babesa.

Satlantis konpainiaren kontseilari ordezkaria den Juan Tomás Hernaniren iritziz, “Defentsari dagokionez Gerra Hotz berri batean gaude”. Horregatik, bere enpresak erabaki du Mendebaldeari laguntzea.

Nabari da hala dela, enpresaren bezeroetako bat Pentagonoa baita: Pentagonoa enpresa bizkaitarrarekin elkarlanean aritu da errazteko “espaziotik zelatatu eta gainbegiratzea petrolio-findegiak, petrolioa erauzteko plantak, gas- eta petrolio-hodi eta biltegiak, lurreko eta itsasoko aerosorgailuak, goi-tentsioko lineak eta zentral nuklearrak”. Hori posible izan da Satlantisen produktu izarra den “iSIM” kamera satelitalari esker.