Kirolak 2015ean eman duenari so egitean, ezinbestekoa da bi auzi potolo horiei heltzea. Baita, tamalez, dopin salaketei –atletismoaren edota Urdaibai arraun taldearen ingurukoei–, sarri azaleratzen den matxismoari –Betisen futbol zelaian entzundakoak, emakumezko kirolari eta arbitroek jasan behar dituztenak, podiumeko nesken papera...– eta eskola kirolak fintzeke dituen kontuei, besteak beste.

Badira gauza positiboak, noski, eta horietako batzuei ere egin diegu tartea amaitzear den 2015ean: parekidetasunaren aldeko urratsak, euskal selekzioaren ofizialtasuna xede duen Jauzia plataformaren lana, txirrindularitza ardatz duen Gabiria Koparen lehendabiziko edizioa, erremontista gazteen bultzada eta abar.