Arabako Foru Aldundiak adin txikikoen kirol partidetan dagoen biolentziari aurre egiteko araudi berri bat ezartzen ari da. Gasteizko futbol partida horretan gertatutakoa arau hauste "oso larria" dela adierazi dute eta horren ondorioz, guraso batek 11.000 euroko isuna jaso dezake, eta kirol instalazioetan sartzeko aldi baterako debekua izango luke,  Diario Vascok zabaldu duenez. 10.001 eta 100.000 euro arteko isunak ezartzeko aukera ematen du araudi berriak.

Arabako Aldundiak kudeatzen duen bigarren kasua da hori, lehenengoa maiatzean izan zen. Horretan, 5.000 euroko isuna jaso dezake urratzaileak. Ana del Val Arabako Aldundiko Kirol eta Kulturaren diputatuaren arabera "zorrotzak" ari dira izaten: "Ez ditugu onartuko haurrei zuzenean eragiten dieten gertakaririk, edozein kirol-jarduera indarkeriarik gabeko giroan egiteko aukera izan behar dute". Iazko udatik hona kirol epaileek irainen aurrean partidak bertan behera uzteko edo pertsonak kanporatzeko aukera daukate.