Sexu erasoa leporatuta, gazte bat atxilotu dute Durangon
Erasotzaileak bortxatu egin duela salatu du adin txikiko emakumeak. 24 urteko gizona atxiloturik dago, epailearen aurretik igarotzeko zain.
Astelehen gauez jazo zen erasoa, Durangon. 24 urteko gizonak adin txikiko emakumea bortxatu zuen. Emakumeak salaketa jarri zuen, eta Ertzaintzak astearte gauez atxilotu zuen erasotzailea. Atxilo dago ordutik, epailearen aurretik igarotzeko zain.
Durangoko Udalak erasoa gaitzetsi du, eta eraso matxisten aurkako protokoloa aktibatu duela jakinarazi: “Nazkatuta gaude horrelako berriez, eta, kasu honetan, Durangon gertaturik, udalak eskain ditzakeen errekurtso eta babes guztiak eskainiko dizkiogu biktimari”.
Mugimendu Feministak ere agertu du bere gaitzespena. DAFAk (Durangoko Autodefentsa Feminista Asanbladak) autodefentsa feministaz erantzutera deitu du, eta mobilizazioa iragarri asteazkenean, 19:00etan, Pinondo Etxean.
PROTOKOLOA AKTIBATU DA!
Durangon emakume baten bortxaketa dela eta eman den atxiloketari erantzuteko kedada GAUR 19.00etan PINONDO ETXEAN!
Erantzun dezagun autodefentsa feministaz!
— Durangoko Autodefentsa Feminista Asanblada (@DAFAsanblada) November 13, 2019
