Sei hilabeteko espetxe zigorra ezarri diote Tubacex enpresako langile bati, ertzain bat erasotzeagatik

  • Beatriz Ledo Languilla epaileak sei hilabeteko espetxe zigorra eta bi isun ekonomiko ezarri dizkio Tubacex enpresako grebalari bati, ertzain bati lesioak eragiteagatik 2021eko otsailaren 23an. Langileak iragarri du helegitea jarriko duela bere errugabetasuna defendatzeko eta bere abokatua lanean ari da jadanik horretan.

2021eko otsailaren 23an gertatutako istiluen irudia. Argazkia: Iñaki Montes

2023ko azaroaren 23an - 08:30
Azken eguneraketa: 11:02

Azaroaren 10ean izandako epaiketaren emaitza heldu zaio jadanik Tubacexeko grebalari bati eta ez da bere aldekoa izan. Hain zuzen, Beatriz Ledo Languilla epaileak sei hilabeteko kartzela zigorra ezarri dio beharginari, bere ustez frogatu baitute Ertzaintzaren 22166 agentea eraso zuela 2021eko otsailaren 23an. Ez da espetxera joan beharko, ez baitauka aurrekaririk, baina 180 euroko isuna eta 165 euroko kalte ordainei egin beharko die aurre grebalariak.

Langilea erabat desados agertu da epaiarekin eta helegitea aurkeztuko duela jakinarazi dio Aiaraldea Komunikabideari. Abokatuak berretsi dio hedabideari lanean ari dela dagoeneko errekurtsoan.

Froga bakarra langilearen aurka; ertzainaren hitzak

Akusatuak gertakarien bi lekuko eta egun horretako liskarrak eta oldarraldiak jasotzen zituen bideoa eraman zuen epaiketara, baina epaileak erabaki du 22166 agentearen deklarazioa nahikoa dela behargina zigortzeko -beste ertzainek ziurtatu zuten ez zutela erasoa ikusi-.

Are gehiago, Beatriz Ledo Languilla epaileak ertzainak epaiketan esan ez zituen adierazpenak txertatu ditu bere ondorioetan. Esaterako, jaso du "ostiko batek belaunean eta kolpe batek ukondoaren barruko partean" sortu zituztela lesioak, nahiz eta ertzainak ez zuen horrelakorik esan bere deklarazioan. Zehazki, 22166 agenteak aipatu zuen ez zuela oroitzen nola egin zion min langileak. Soilik argi zuela berak egin ziola eraso.

Halaber, epaileak ziurtatu du erasoa gertatu zela Ertzaintzaren oldarraldia baino lehen, poliziak horrelakorik ez bazuen adierazi ere. Hain zuzen, 22166 poliziak aipatu zuen oldarraldi baten erdian -goizeko lehenengoan, hain zuzen- gertatu zela erasoa.

Akusatuaren frogak eta adierazpenak bihurritu bera zigortzeko

22166 deklarazioekin izandako trataera eskuzabalarekin alderatuta, Ledo Languilla epaileak oso bestelako jarrera izan du defentsaren deklarazioekin eta frogekin.

Hasteko, bai akusatuaren zein lekukoen adierazpenak baliatu ditu soilik  salatua kokatzeko gertakarien erdian eta erruduntzat jotzeko. Lekukoek adierazi zuten akusatuak janzkera deigarria zuela -zapata zuriak- eta horri esker ezberdindu zutela eta ziurtatu ahal zutela ez zuela erasorik egin. Hala ere, adierazpen horiek baliatu ditu epaileak ertzainaren deklarazioa indartzeko eta akusatua identifikatzeko erasoaren egile gisa.

Horrez gain, epaileak onartzen du Ertzaintzaren oldarraldian akusatua ikusten dela alde batera egiten eta istiluetatik aldentzen, baina hori ez da nahikoa izan eta Beatriz Ledo Languillak uste du erasoa beste une batean gertatu zela, zehazki, grabatuta ez dagoena.

Ustezko erasoa ez dago grabatua, baina badago, eta ez da erasoa

22166 ez bazuen horrelakorik esan eta frogarik ez badago ere hori ondorioztatzeko, epailearen aburuz, Tubacexeko langilearen erasoa goizeko lehen oldarraldia baino lehen jazo zen, eta akusatuaren adierazpenak baliatu ditu horretarako Ledo Languillak.

Izan ere, salatuak aitortu zuen talka izan zuela poliziarekin. Beatriz Ledo Languillaren iritziz, grabatuta ez dagoen une horretan gertatu ziren erasoa eta lesioak. Arazoa da gertakari hori akusatuak berak erakutsi zuela epaiketan aurkeztutako bideoan. Zehazki, 00:09-00:14 segundotan ikusten da nola ertzain batek -ziurrenik 22166 agenteak, langilea kentzen duela errepidetik bultzaka.

Aldiz, epaileak argudiatzen du une hori ez dagoela grabatuta -egia ez dena- eta goizean zehar liskar gehiago egon zirela -ez dena zuzena ere, poliziaren lehenengo oldarraldiaren ondoren atxilotu baitzuten langilea, hau da, luzatu ziren hurrengo istiluetan ez zuen parte hartu eta lesioak, derrigorrez eta agentearen adierazpenak oinarri hartuta, lehen oldarraldian izan ziren-.

Horrela, defentsaren ekarpenei buelta emanda, Beatriz Ledo Languillak ondorioztatzen du: "Ez dago inolako frogarik hutsaltzeko, ezta zalantzan jartzeko akusatuak egun horretan 22166 agenteari eraso ziola, eta ukondoan eta belaunean lesioak eraginda".

Epailearen kontraesan nagusia

Tubacexeko langilearen abokatuak aurreikusi zuenez, bere berezoaren zigorrean kontraesan ikaragarria dago.

Izan ere, urriaren 11n epaiketa bertan behera geratu bazen, beste grebalari batek, akusazio larriagoak zituenak bere gain -zehazki, bi ertzain erasotzea eta lesio larriagoak eragitea- akordioa lortu zuen eta lau hilabeteko zigorra onartu zuen.

Hortaz, Leo Barañano defentsako abokatuak esan bezala, nola liteke akusazio arinagoak duen grebalari batek espetxe zigor luzeagoa izatea?

Eta are gehiago, 22166 ertzainaren hitz guztiak ontzat eman bazituen epaileak, zergatik ez zuen frogatutzat eman akusatuak bere erlojua kaltetu zuela eta, ondorioz, 300 euro ordaindu behar zizkiola?


Kanal honetatik interesatuko zaizu: Langile borroka
Nafarroako ikastoletako eta itunpeko ikastetxeetako langileek negoziatzen hasteko eskatu diote gobernuari

Nafarroako hezkuntza hitzarmen berria negoziatzea exijitu die Nafarroako Hezkuntza kontseilariari, Carlos Gimenori, Iruñean eginiko mobilizazioan. Langileek salatu dute Gimeno, patronalarekin bakarrik biltzen dela, eta ez dituela aintzat hartzen langileek negoziaziorako... [+]


Emakumeek baserria defendatu zutenekoa

1958an, emakume baserritarrek Donostiako Erdialdea hartu zuten, esnea saltzea galarazi zitzaiela salatu, eta baserritarren eskubideak aldarrikatzeko. Administrazioak esnearen esklusibotasuna Gurelesa enpresari eman zion, eta baserritarrek Bretxan saltzeari utzi behar izan... [+]


Osakidetzaren irtenbide bakarra lanaldia luzatzea dela kritikatu dute ELA, LAB eta CCOOk

Langileen plantilla egokia osatu beharrean, Osakidetzako profesionalei aparteko orduen bitartez ordaintzea gaitzetsi dute sindikatuek. Azken urteetan errepikatu diren arazoen aurrean zuzendaritzak izandako plangintzarik eza salatu dute.


Sinadura greban dauden ‘El Diario Vasco’-ko langileek grebara joko dute orain, soldata igoera eskatzeko

Ekainaren 19an, 20an eta 21ean greba dago deituta El Diario Vasco-ko langileen artean, hitzarmen kolektiboa eguneratzeko aurrerapausorik ez delako eman. Gainera, maiatzaren 30az geroztik sinadura greba egiten ari dira kazetariak: “Hori ezkutatzeko enpresak lehentasuna... [+]


Errenteriako Iztieta osasun zentroko “egoera prekarioa” salatu du ELAk

Hemezortzi mediku beharrean hamabi daude eta sei erizainek hamabiren lana egiten dute. “Lan gainkarga eta agenda neurrigabea handitu” egin dira, sindikatuak ohartarazi duenez, eta murrizketa gehiago etor daitezke etorkizunean.


Eguneraketa berriak daude