ARGIA.eus

2020ko abuztuaren 08a

Santiago zubian elkartu dira Frantziako Gobernuaren immigrazio politika deitoratzeko

  • Etorkinen eskubideen urraketak aztertzeko Ikerketa Batzorde bat osatzea eskatu diete Frantziako Parlamentariei etorkinak laguntzen dabiltzan hainbat elkartek. Hamarnaka lagun elkartu dira Irun eta Hendaia lotzen dituen Santiago zubian, Frantziako Gobernuaren immigrazio politika "gogorra eta arrazista" salatzeko.

Jenofa Berhokoirigoin @Jenofa_B
2019ko abenduaren 04a
Etorkinen eskubideen errespetua exijitzeko elkarretaratzea, Santiago zubian

Etorkinen eskubideen urraketak aztertzeko Ikerketa Batzorde bat osatzea eskatu diete Frantziako parlamentariei etorkinak laguntzen dabiltzan Cimade, Amnesty International, Mugarik Gabeko Medikuak, Munduko Medikuak eta Caritas egiturek. Eskaeraren berri eman dute Irun eta Hendaia lotzen dituen Santiago zubitik, baita Dunkerque, Menton eta Calais hirietatik. “Harrera ezean dago Frantzia, immigrazio politika geroz eta gogorragoa dauka Gobernuak”, Corinne Torre Mugarik Gabeko Medikuak egiturako ordezkariaren hitzetan. Pankartak eta banderolak esku artean, hamarnaka lagun batu dira Santiago zubian.

Irungo Harrera Sarekoak eta Ongi Etorri Errefuxiatuak plataformako kideak ere egon dira bertan, Frantziako Gobernuaren “politika arrazista” deitoratzen. Irungo Anaitze Agirre Larretak dioenez, Frantziako Gobernuaren politika ilegalak azkarki senti dituzte: “Frantziako Poliziak etorkinak Irun aldera bueltatzearena ez da fenomeno berria, baina azken aldi hauetan kanporaketa gehiago daude”. Gainera, kanporaketa hauek etorkinen eskubideak urratuz egiten direla nabarmentzen du: egin beharreko tramite legalak ez dituzte egiten.

Politika geroz eta gogorragoa

Frantziako Gobernuak immigrazio politika oraindik gogorragoa xede duela argi geratzen da azaro hastapenean aurkezturiko neurri berriei fidatuz gero. Besteak beste, 2021 urtetik aitzina kuotak jarriko ditu, lanaren esparruan dauden langile beharren araberakoa. Bestalde, gaur egun, eritasun geriza orokorra jaso dezake lehen egunetik babes politikoa eskatu duenak. Neurri horiei segi, lehen hiru hilabeteetan ezingo du jaso mediku-arta eta segipenik kitorik. Papergabeek edota geriza politikoa errefusatua izan zaienek sei hilabetez jasoko lukete eritasun geriza, gaur egun hamabi hilabetez daukatelarik eskubidea. Gainera, arta guztiak ez ditu estaliko, demagun, belauneko edota hankako operazioak ez ditu gehiago aseguru sozialak ordainduko. “Etorkinak hemen ez gelditzeko helburuarekin hartuak dituzte neurri horiek guztiak”, Torreren ustez.

Papergabeen kanpalekuen desegiteak eta atxikitze zentro berrien eraikitzeak ere dira Edouard Philippe Lehen Ministroak azaroan aurkeztu erabakien artean.

 

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!


Ongi Etorri Errefuxiatuak kanaletik interesatuko zaizu...

Azkenak
EGILEA
Argia buletina
Egunaren laburpena
zure e-postan
Eguneraketa berriak daude