Zergatik jaso dituzu Jordi Cruixart eta Jordi Sànchez-en erretratuak?

Kategoria horretan —preso politikoak— daudela uste dugulako, noski. Uste dut egokia litzatekeela Europako Kontseiluko Parlamentuko Biltzarrak ematen duen preso politikoaren definizioa elkarrizketa honetara ekartzea. Bost baldintza dira, eta bat betetzen bada preso politikotzat hartzen da. Oinarrizko giza eskubideak urratzea, zio politikoengatik atxilotzea beste ezein deliturik gabe, zigorrak areagotzea zio politikoengatik, motibazio politikoak eragindako atxiloketa diskriminatzailea eta, azkenik, atxiloketa motibazio politikoek bultzatutako jarraibide irregular baten ondorioa bada.

Informatu zara egiaz jakiteko Jordiak eta erretratuetako besteak preso politikoaren kategoria juridikoan sartzen direla? Nolakoa izan zen erretratu hauendako dokumentazio lana?

Prentsa alternatiboa eta sare sozialak fenomeno honen garapenari adi egon dira, eta epaiketa eta auzi penalei buruzko informazio pila bat argitaratu da, ia minuturo. Ez gara juristak eta ez dugu izan nahi. Errespetutik eta elkartasunetik ekiten dugu, proiektuaren publizitaterako hobekien egokitzen diren neurriak hartuta.

Zein da zure iritzia ARCOn otsailaren 21ean zure piezarekin gertatu zenari buruz?

Interesatzen zaidan artea bere garaiaren testigantza ematen duena da. Pieza honek eman du, eta lehenengo momentuen frustrazioa igaro ostean, gertatutakoa ondo deritzot, nire obra osatu dutelako eta euren burua biluztu dutelako. Orain borroka ez da nire lana berriro Arcon jartzea. Orain borroka da preso politikoak askatzea eta beraien etxeetara itzultzea. Garrantzitsuena da kultura arloko langileak jazartzeari utz dezatela. Garrantzitsuena da egoera honekin behingoz bukatzea.

Helga de Alvear, zure galeristak, esan du hitz egin zuela Ifemako zuzendariarekin, Eduardo López-Puertasekin, eta lana erretiratzea “ondo” iruditu zitzaiola. “Hau ez da nire etxea eta Ifemak ez badu eduki nahi kenduko dut. Nire etxean ez dit inork ezer kentzen”, esan zuen El País-en. Zer iritzi duzu?

Ezin diot Helgari errua bota kanpoko presioei men egin dielako. Denok gara ahul maila desberdinetan. Helgak esperientzia luzea duen arren, sekula ez du horrelakorik bizi. Jende oso agresiboa zegoen. Nik neuk mezu beldurgarriak jaso ditut. Oso gogorra izan da berarentzat. Ahal zuena egin zuen niri laguntzeko eta asko eskertzen diot. Horrenbeste oldarkortasun dagoen klima batek beldurra eragiten du halabeharrez.

Pentsatu duzu ea existitu daitekeen gatazkarik irudirako eskubidearen eta zure lan egiteko moduarekin ados ez dauden pertsonen bizipenak artelan bihurtzearen artean?

Lan hau errespetutik eta elkartasunetik egin da. Ez dira aurpegiak ikusten eta izenak ematen. Uste dut oso zuzena izan naizela horretan.

Oriol Junqueras preso politiko bat da?

Noski baietz. Nik oso argi ikusten dut.

Katalunia errepublika gisa Estatu independente bat izatea nahi duzu? Urriko erreferendumaren galdera da…

Ni Madrilekoa naiz. Hori katalanek erabaki beharko lukete. Hau ere argi ikusten dut.