2020ko urriaren 20a
Pilotabizi Pilotazaleen Elkarteak kaleratu duen oharrak laguntzen du Baiko enpresaren egungo gatazka pilota munduaren ikuspegi zabalagotik aztertzen. Elkarte honek kluben garrantzia nabarmendu du: "Klubak izan dira lehenago, orain badira eta gero ere izango dira enpresak pilotariz hornitzen dituztenak, nahiz eta abandonatuta egon, bai administrazio ia guztien aldetik, baita pilotaren kontura negozioa egiten duten enpresen aldetik ere. Errealitatea hau da: urtero klubak desagertzen ari dira, ez daukatelako nahiko diru laguntza ezta giza baliabiderik ere. Hala ere, aurrera jarraitzen dute kirol hau erakusten gero profesionaletara iritsiko diren gazteei". Eta eskaera hauek egin dizkie Baiko enpresari, Eskupilota Enpresen Ligari eta administrazioei.
Urriaren 10ean Amezketan dago izenpetua Pilotabizi elkartearen agiri zorrotza (behean dago osorik irakurgai).
Baikori eskatu dio elkarrizketa bidez egoera ekonomikoa konpondu dezala, horretarako enpresako pilotariek aukeratutako ordezkariekin eseriz. Eskiroz, Victor, Mariezkurrena eta Lasorekin elkarrizketak abiatzeko ere eskatu dio, "profesional izaten jarraitu dezaten".
Eskupilota Enpresen Liga Elkarteari eskatu dio "bertan behera utzi ditzala gaur martxan dauzkan txapelketak eta etorkizunekoak, parte-hartzaile guztiek beren kirol-mailaren araberako aukera berdintasuna izan dezaten". Salatu dutenez, "bestela ezingo litzateke kirola kontsideratu baizik eta bestelako interesen menpe legokeen zerbait". Honengatik guztiagatik, Ligari eskatu dio kirol txapelketa irekia antolatzeko, hau da, "Aspe eta Baiko enpresetakoa izatea ez dadila ezinbestekoa izan".
Pilotabizi elkarteak administrazioari eskatu dio plangintza estrategiko bat abiatu dezala pilota munduko eragileekin, eta ekarpen interesgarria egin dezaketen beste kiroletako eragileekin. Eskupilota Enpresen Liga Elkartearen kirol eredua "pilotaren esplotazioa" dela salatu du eta administrazioei eskatu die eredu horri buruzko gogeta sakona egin dezatela pilota eragileekin, "pilotaren etorkizuna bermatzeko" helburuarekin.
Pilota klubei eta federazioei beharrezko dituzten baliabide ekonomiko eta giza baliabideak emateko eskatu diote administrazioei, eta baita ere "formakuntza eskubideak kobratu ahal izateko behar den egitura juridikoa osatzen has daitezela".
Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.
Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!
