Euskal Pentsiodunen Mugimenduak azaroaren 9 honetan iragarri du mobilizazio berri bat antolatzen ari direla, Euskal Herriko sindikatu eta talde sozialekin batera, abenduaren hasierarako. Toledoko Itunak pentsioen inguruan onartutako gomendioen aurka eta ereduaren iraunkortasuna bermatuko duen sistema publiko baten alde mobilizatuko dira.

Abenduaren hasieran egingo den manifestazioaren edo mobilizazioaren aurretik, haien eskariei buruzko informazio-kanpaina sendoa egingo dute, eta ostera, mobilizazioarekin amaituko dute, sindikatuekin eta beste kolektibo sozial batzuekin batera. Hurrengo astelehenean iragarriko dituzte sindikatu eta eragile sozialekin lorturiko akordioak. Guztiaren berri emateko agerraldia egin dute Bilboko udalaren aurrean, astelehenero egiten duten elkarretaratzearen baitan.

Jon Fano pentsiodunen mugimenduko kideak pentsiodunen etorkizunari begira onartutako dokumentua kritikatu du. Bere ustetan, gomendio horiek "ez dute aurrerapausorik ematen gure eskaerei dagokienez, eta, gainera, aurreko gobernuek egindako erreformetan pentsioen arloan egindako murrizketak sendotzen ditu". Mugimenduaren arabera, "Gero eta gehiago ari dira finkatzen, sistemaren hirugarren hanka gisa, funts pribatuen sustapena eta defentsa, eta horrek benetako eredu publiko eta unibertsal bati kalte egiten dio".