ELB sindikatuak azken orduko deia eginez, herritarrei eskatu die ostiral goizeko 06:00etarako mobilizatzea Frantziako agintariek hegazti guztiak sakrifikatu nahi dizkieten Domintxine, Gabadi eta Barkoxeko etxaldeen atarietan. Aurretik ELBk bilkura bat antolatuta zeukan goizeko 10:30etarako Donaixtiko plazan, baina deialdi berriak aditzera ematen du agintariek erabaki dutela egun sentiarekin jendarmeak sartzea etxaldeetan. ELBk prentsa ere kobidatu du lekuetan egotera, hiru etxaldeetan funtzionarioek kabalak hil ditzaketelakoan.
Azken egunotan ELB sindikatuak dei egin die Iparraldeko baserritar, kontsumitzaile eta hautetsiei mobilizatzera, gripearen kontrako neurritzat administrazioak Domintxine, Gabadi eta Barkoxeko hiru etxaldetako hegaztiak hil ez ditzan. Justu aste bete lehenago, joan den ostiralean (14) ehunka laborari, hautetsi eta herritarrek aurre egin zieten hiru etxaldeetako oilo eta antzarak hiltzera agintariek bidalitako funtzionarioei. Hegazti guztiak hiltzeko agindua bost departamendutako etxalde guztiei manatu zaienez, Ipar Euskal Herrikoen ezezkoak oihartzun handia eduki du Frantzia osoan, TF1 telebista kateak berri emankizunik ikusienean erakutsi duen erreportaje hau lekuko. Geroztik, asteazkenean (19) Pauetik bideo-konferentziaz mintzatu dira ELBko ordezkariak eta Frantziako Nekazaritza ministerioko funtzionarioak, baina negoziaketan aurrerabiderik lortu gabe. Elkarrizketa nola joan zen laburbildu die Euskal Irratiei ELBko idazkari nagusi Panpi Sainte Mariek: "Murru baten aitzinean ginen arrunt gogor ziren, betiko katexima atera digute behar direla ahateak hil".
Funtsean, ELBko nekazari txikien proposamenik ez dute onartu agintariek eta hiru baserrietako kabale guztiak hil behar dizutela berretsi diete. ELBkoek ez dute horrelakorik onartuko, ostiralerako deialdian jakinarazi dutenez: "Jendeari zain egoitea galdegiten diegu, noiz nahi agertzen ahal baitira orai.
Hementik harat ez bada deus pasatzen, mobilizazio masiboa deitzen dugu ostirale goizeko, 10:30etan Domintxineko plazan. Laborari, kontsumitzaile, herritar, hautetsi, denen sustengua galdegiten dugu".
[Albiste hau 22:00etan eguneratu da]
Azken urteetan errepikatzen den gaitza dute hegazti gripearena laborariek. Frantziako Estatuak bideratu aterabideak –hegazti guzien hilketa prebentiboak eta kabalak barnean atxikitzea– gogorki gaitzesten ditu ELB sindikatuak. Egoeraren larritasunaz ohartarazteko eta... [+]
Animalien osasunaz arduratzen den DDPP departamendu mailako zerbitzuak Pauen dituen bulegoak okupatu dituzte ekainaren 8an, ELBk eta Biarnoko Modef eta Confederation Paysanne sindikatuek ere. Poliziak kanporatu ditu.
ELBk berriz ere bere arrangurak agertarazi ditu hegazti gripeari begira. Euskal Herriko Laborarien Batasunak jakitera eman duenez, iragan hiru asteetan 70 kutsadura kasu aitortu dira Aturri arroko etxaldeetan, horietatik 50 Gersen, hemezortzi Landetan eta bi... [+]
Ehundik gora lagun elkartu dira Ilharren (Nafarroa Beherea) Bidarteberria etxaldearen aitzinean, zerbitzu sanitarioko ordezkariei bidea mozteko. Hegazti gripearen testuinguruan, 200 ahateren hiltzea oztopatzea lortu dute.
Kanpoan hazten diren hegaztiak hiltzea da Frantziako Gobernuak darabilen estrategia, hegazti gripeari aurre egiteko. Euskal Herriko Laborarien Batasunak (ELB) ohartarazi du estrategia hori antzua dela eta etxalde txikiek ez dituztela kudeaketa txarraren ondorioak pairatu behar... [+]