ARGIA.eus

2021eko abenduaren 02a

Indarkeria matxista bizi duen emakumea kaleratu dute etxetik

  • Azaroaren 25eko data zeraman Arrigorriagako emakume baten, haren alabaren eta biloben etxe kaleratze aginduak. Batu Elkarlaguntza Sareko kide da emakumea, eta sareak etxe kaleratzea gelditzeko deia egina zuen. Goizean goizetik herritar ugari elkartu da etxe-kaleratzea eragozteko eta Ertzaintzak horien aurka egin du. 12:00etan Etxebidek emakumeari mehatxu egin dio etxe kaleratzea geratuz gero, alternatibarik gabe geratuko zela. Egoera horren aurrean, emakumeak erabaki du etxeko giltzak entregatzea eta barruan erresistentzia egiten ari ziren pertsonek etxea utzi dute. Kaleratzea Emakumeen Kontrako Indarkeriaren Aurkako Nazioarteko Egunean deitzeak zeresana eman du, kaltetuak bizi duen egoeraren atzean indarkeria matxista baitago. Batuk salatu du etxe kaleratzea gauzatu dela Poliziaren, sistema judizialaren eta zerbitzu sozialen konplizitatearekin.

Amaia Lekunberri Ansola @amaialekunberri
2021eko azaroaren 25a
Argazkia: @amaialekunberri

Azaroaren 25eko data zeraman Batu Elkarlaguntza Sareko Joaquiren etxe kaleratze aginduak, eta kaleratzea gauzatu ez zedin, ostegunean Arrigorriagako Abusu auzoko Olatxu kaleko 3. zenbakira gerturatzeko deia egina zuen Batuk. Goizak argitu orduko erresistentzia abiatzeko asmoa zuten, eta hargatik, 08:30etarako jarri zuten hitzordua. Baina Ertzaintza ordu eta erdi lehenago joan da etxera, babesa ematekoa zen jende gehiena heltzear zela. Amaia Lekunberri ARGIAko kazetariak egin du jarraipena zuzenean bertatik:

Babesa ematera iritsitako lehen pertsonei oldartu egin zaie Ertzaintza, eta goizean zehar egon da bestelako tentsio unerik ere.

Poliziak hesitu egin du Olatxu kalea, protesta egitera hurbildutakoak Joaquiren atarira hurbiltzea galaraziz. Hala bada, atarian gertatzen zena bertatik bertara jarraitu ezinik, distantziatik aritu dira bertaratutakoak Joaquiri eta haren etxebizitzan erresistentzia egiten ari zirenei adore eta babes mezuak helarazten. Oihukatutako aldarrien artean entzun ahal izan dira klase borrokarekin, borroka feministarekin, elkar babesarekin eta herri boterearekin lotutako hainbat mezu, besteak beste. Azaroaren 25a izanik indarkeria matxista pairatu duen emakume bat kaleratzeko hautatutako eguna, emakumeen aurkako indarkeriari errefusa oso presente egon da; "patriarkatua eta kapitala, aliantza kriminala" edota "Joaqui, nik sinisten dizut" mezuak sarri aireratu dira, eta une batez bertan ziren emakumeei dei egin zaie protestaren lehen lerroa hartzera.

Euria eta hotza tarteko, luze joan da goiza batzorde judizialaren zain, babesa eskaintzera hurbildutakoek umoreari eutsi dioten arren kanta eta lelo artean. Keinu esperantzagarriak ere egon dira tarteko; adibidez, sarrailagilea iritsi denean, planto egin du, adieraziz berak ez duela etxe kaleratzeetan parte hartzen.

Batuko kideen nahia batzordearekin negoziaketari bidea ematea zen, kide batek ARGIAri azaldu dionez. Jakinarazi dute Joaquirentzat alternatiba lortua zutela eta kale gorrian geratzeko arriskua ekidina zutela, baina hala ere negoziatu nahi zutela egungo etxebizitzaren usufruktu eskubidea Joaquiren eskuetara pasatzea. Grabazioan azalpena osorik:
 

Negoziaketarako abagunerik ez da izan ordea. 12:00ak aldera jakinarazi da Etxebidek Joaquiri "mehatxu" egin diola etxe kaleratzea eragotziz gero, alternatibarik gabe geratuko zela esanaz. Egoera horren aurrean, emakumeak giltzak entregatzeko "erabakia hartu" du.

Behin erabaki hori hartuta, etxe barruan erresistentzia egiten ari zirenak kalera irten dira, eta gertatutakoaz irakurketa egin dute. Etxe kaleratzea Poliziaren, sistema judizialaren eta zerbitzu sozialen konplizitatearekin gauzatu dela salatu dute, eta borrokan jarraitzeko deia luzatu diete bertara hurbildutako guztiei.

Batuk konplizetzat seinalatutako horiek seinalatu ditu hainbat herritarrek ere etxe kaleratzearen aurrean egindako adierazpenetan. Azpimarratu da puntu moreekin berdintasunaren alde agertu ohi diren berberak direla azaroaren 25 batez indarkeria matxista pairatzen duen emakume bat etxe kaleratu dutenak.

Sustraiak indarkeria matxistan dituen etxe-kaleratzea

Abusuko Auzo Elkartearekin batera, elkarlaguntza sareak denbora darama Joaquiren egoera sozializatzen eta salatzen. Berriki sare sozialen bidez zabaldu dute kaltetuaren testigantza jasotzen duen bideoa, eta bertan azaltzen da Joaquiren egungo egoera, baita puntu horretara zerk eraman duen ere.

 

Joaquik 63 urte ditu, eta 78an ezkondu zen. Hasierako urteen ondotik gauzak okertzen hasita, senar ohiak zituen "kontsumo eta delituzko jarreren" aurrean etxebizitza segurtatu asmoz, akordio notarial bat sinatu zuen bikoteak 97an. Joaquik azaldu duenez, bikotekide zuenak konbentzitu zuen horretarako. Akordioaren bidez eta gizonari "dirutza" ordainduta, Joaqui etxebizitzaren jabe bilakatu zen eta senar oiha etxearen usufruktu eskubidearekin geratu zen.

Batutik azpimarratu dutenez, "akordio hori guztiz bidegabea da, botere-harreman baten baitan eta ezjakintasun baldintzetan sinatutako akordioa baita". Izan ere, ezkon-bizitzak aurrera egin ahala, gizona tratu txarrak ematen hasi zitzaion, harik eta 2008an egoeraren aurrean planto egin eta etxetik ihes egin zuen arte, orduko hartan oraindik adin txikikoa zen alabarekin. "Ihes egin nuen arratsalde hartan, senarra nire bila ibili zen auzotik, laban handi bat gainean zeramala. Hortxe ulertu nuen egoera hura salatu behar nuela", azaldu du. Genero indarkeria leporatu zioten gizonari, eta bizkartzainekin bizi izan zen bi urtez Joaqui. Alabaina, behin genero indarkeria delitua preskribatuta, gizonak etxebizitzaren usufruktu eskubidea erabili du emakumearen aurka, Joaqui etxe kaleratu asmoz salaketa jarri baitu. Epaileak gizonaren alde egin du, eta etxe kaleratzea agindu azaroaren 25erako.

Etxe kaleratzea, Emakumeen Kontrako Indarkeriaren Aurkako Nazioarteko Egunean

Etxe kaleratzearen datak Emakumeen Kontrako Indarkeriaren Aurkako Nazioarteko Egunarekin bat egin izanak sinbolismoz janzten du egoera, emakumeen aurkako indarkeriaren hainbat ertz eta horien arteko elkargurutzaketa ageriko egiten baititu. Izan ere, bikote-harremanean pairatutako indarkeria matxistatik bizirik ateratzea lortu duen emakumea da Joaqui, baina gaur gaurkoz, segitzen du indarkeria matxista pairatzen: senar-ohiak bera etxe kaleratzeko temati dihardu, eta epaia ematerakoan justiziak ez ditu kontutan hartu gizonak emakumeari emandako tratu txarrak.

Zentzu horretan, Batuk ondoko irakurketa egin zuen: "Hainbeste urte igaro direnez, legeari begira, genero-indarkeriaren delitua preskribatu egin da. Alegia, Joaquiren senar ohia ez da tratu txar emaletzat hartzen, eta biktima, itxuraz, salbu dago. Legeak gertaera hori horren ausart eta injustuki alde batera uzten duen arren, Joaquik mehatxuak jasotzen jarraitzen du eta bere bizitza arriskuan dago".

Hori guztia kontutan izanik, Bilboko AZET Alde Zaharreko Etxebizitza Sindikatuak publiko egindako oharrean hala adierazi zuen: "Joaquiren etxea Euskal Herriko emakume langileon lubakia izango da datorren azaroaren 25ean" . Hala izan da.

Egoera ezagutzera ematearren, berriz erasotua

Are, pairatzen ari den indarkeria areagotu egin da kasua jendartera zabaldu ahala. Azaroaren 19an asanblada deitu zuten Abusun, auzokideei kasua ezagutzera eman eta egoera zein den azaldu asmoz, eta Batuk asteartean salatu zuenez, biharamunean bere aurkako pintaketan aurkitu zituen Joaquik. Postontzian bere izena ezabatu zuen norbaitek, eta alboan ondokoa idatzi: “Gaiztoa, gezurtia eta txibatoa izateagatik”. Erasoaren aurrean Poliziak agertutako jarrera gaitzetsi du elkarlaguntza sareak, gertakaria salatzeko biderik ez dela erantzun baitiete. “Eztabaidagarria eta paradoxikoa da oso, bi urtez bizkartzain gisa jardun zuten horiexek une hauetan bizkarra ematea, gure kidea babesgabe utziz”.

"Norbaitek bere egoera publikoki salatu eta ahotsa altxatzen duenean, eta arazoa auzokideekin zein elkarlaguntza sareekin elkarbanatzen duenean, isilarazi nahi dituzten indarrak altxatu egiten dira”, egin du irakurketa Batuk. Argi utzi nahi izan dute borroka horretan Joaqui ez dagoela bakarrik.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!


Etxegabetzeak kanaletik interesatuko zaizu...
Etxebizitza, auzi feminista

Bilboko txabolismoa du ikergai Iñigo López Simónek, eta fenomeno hura aztertzerakoan genero ikuspegia kontutan hartzearen garrantziaz mintzo zen berriki argitaratu dugun elkarrizketan. Gizonak ez bezala, sexuaren araberako lan banaketak emakumeak ia egun... [+]


2021-09-20 | ARGIA
70 urteko alargun donostiarraren etxegabetzea saihesteko deia egin du hainbat eragilek

Irailaren 21ean 11:00etan Caixabanken aurrean bilduko dira etxegabetzea salatzeko eta ekintza saihesteko pausoak eman daitezen presionatzeko. Kaleratzeak Stop, Alokairu Benta Berri eta Inquilinos Azora plataformak dira antolatzaileak. 70 urteko alargunak alokairuko bost kuota... [+]


Etxebizitza arazoa eta faxismoa
Etxe kaleratze estrajudizialetatik harago doan arazoa

Azken hilabeteetan, zeresana eman du etxe kaleratze estrajudizialak egiten dituzten enpresen artetik ospetsuena den eta eskuin muturrarekin lotura duen Desokupak, Bizkaitik birritan kontratatu baitituzte beren zerbitzuak. Testuinguru horretan, faxismoari pauso bakarra aurrera... [+]


2021-07-26 | ARGIA
Desokupa ultraeskuindarrek Gasteizen etxebizitza bat hustu duela salatu dute

Gasteizko Etxebizitza Sindikatuak salatu du Desokupa izeneko eta etxe kaleratzeak gauzatzen dituen enpresa Abetxuko auzoan izan dela astelehenean. Asteazkenean 18:00etan protesta deitu duet eta bertan informazio gehiagorekin prentsaurrekoa eskainiko dutela adierazi dute.


Carlosen etxegabetzea salatzeko Bilboko Gotzaindegia okupatu du Bilboko Maizterren Sindikatuak

Bilboko gotzainarekin bilera bat lortzeko asmoz eta etxegabetze agindua bertan behera geratu dadin Begoñako Basilikaren atzekaldean dagoen gotzaindegian sartu dira Maizterren Sindikatuko kideak astearte goizean, 11:00ak aldera.


Irakurrienak
Azken albisteak
Argia buletina
Egunaren laburpena
zure e-postan
Eguneraketa berriak daude