Osakidetzako mahai sektoriala adostasunetik urrun

  • Osakidetzako Zuzendaritza Nagusiak deituta, 2016ko lehen mahai sektoriala bildu da otsailaren 17an. Lehen bilerak ordea, ez du fruitu askorik eman; LAB sindikatuak “hauteskunde usaina” hartu dio zuzendaritzaren proposamenari, eta ELAk salatu du Osakidetzak “negoziatzeko borondatea azaldu duela, baina konpromiso errealik gabe”. Aspalditik datorren gatazka konpontzeko aurrerapausorik ez, beraz.  


2016ko otsailaren 18an - 10:59
Osakidetzako sindikatuek deitutako mobilizazioa Gurutzetako ospitalearen aurrean, 2015eko apirilaren 23an (Arg.: Unai Brea).

Osakidetzak hamalau puntu jarri ditu mahai gainean; horien artean, soldatak %1 igotzea, urteko lanaldia 1.592 ordukoa izatea, eta norberaren kontuetarako sei baimen-egunak eta antzinatasunagatiko egun libreak berreskuratzeko aukera. LAB sindikatuak salatu duenez ordea, “puntu horiek Mahai Orokorrean onartuta zeuden, beraz, ez dira Osakidetzak emandakoak”.

Osakidetzak, bere aldetik, jakinarazi du aldi baterako kontratazioaren, langileak gehitzeko espedienteen eta 2016ko lan-eskaintza publikoaren inguruan negoziatzeko aukera aurkeztu duela. Sindikatuentzat, ordea, ez da nahikoa izan: LABen ustez, proposamenak “hauteskunde usaina” du, eta “ez dio erantzuten azken urteotako enplegu suntsiketari, langileen prekarizazioari edota lan zamei”.

ELA sindikatua ere iritzi berekoa da, eta exijitu du “azken urteetan galdutako 3.000 lanpostuen berreskurapena eta behin-behinekotasun tasaren jaitsiera erradikala”. Osakidetzak, ordea, adierazi du “ordezkapenak orain arte bezala egingo dituztela”, eta hurrengo EPEan jubilatuko diren langileen lanpostuak “bakarrik” eskainiko dituztela. “Horrek 2016an 900 lanpostuko deialdia egitea dakar, eta probak ez dira 2017 baino lehen izango”, salatu du ELAk.

Hori horrela, ELAk eskatu du 5.000 lanpostuko EPE bat, eta Osakidetzako langile kopuru erreala ezagutzea, “sindikatuok langileen benetako beharrak ezagutzeko”. Era berean, LABek eskatu du langileentzako lan-baldintzen akordio oso eta berri bat.

Osakidetzako Giza Baliabideetako Zuzendariak, Jose Maria Armentiak, negoziatzeko prestutasuna azaldu du: “Oraingo lehen mahai hau negoziazio-egutegi baten hasiera da. Espero dugu sindikatuek ere ager dezatela negoziatzeko borondate benetakoa eta arduratsua, akordioei bide emateko”.

ELAk salatu du ordea, negoziatzeko borondate faltaren adibide “argia” dela Urdulizko Ospitalea publikoa izateko langileekin zituzten asanbladak “debekatu” izana, eta adierazi dute sindikatuek mobilizazioekin aurrera jarraituko dutela. Donostiako Ospitalean dute lehen hitzordua, martxoaren 2an.

 


Kanal honetatik interesatuko zaizu: Osakidetzako gatazka
1.431 lanpostu sortzeak ez du Osakidetzaren plantilla handituko, ELA eta ESK sindikatuek salatu dutenez

Eusko Jaurlaritzak Osakidetzan iragarritako lanpostuak behin-behinean dauden langileen plazak formalizatzeko izanen direla esan dute ELA eta ESK sindikatuek.


Auzitegi Nagusiak berretsi du: geldirik jarraituko du Basurtuko bihotz kirurgiaren lekualdatzeak

Osakidetzak jarritako helegitea ez du onartu Euskadiko Auzitegi Nagusiak. Azaroan gelditu egin zuen Gurutzetara lekualdatze prozesua Arabako epaitegi batek.


2022-12-29 | Lide Iraola
Osakidetzako krisia
ESIko zerbitzuburuek bost eskakizun egin dizkiote zuzendaritzari

Zuzendaritza ospitale barruko kideez osatzea, mahai teknikoa osatzea langileen ordezkaritzarekin, "behetik gorako" lan ebaluazioa, langileen egonkortzea eta Onkologikoaren hitzarmen berriaren inguruan azalpenak jasotzea. Bost puntu horietan ardaztu dituzte... [+]


Sindikatuak protestara itzuliko dira, osasun sistema publikoaren alde

Osakidetzako sindikatu guztiek bat eginda, SATSEk, ELAk, LABek, SMEk, CCOOk eta UGTk deialdi bateratua egin dute abenduaren 22an zentro guztien atarian biltzeko. Opor garaiaren ondoren, protestak kalera eramatea ere aurreikusi dute.


Oposizioa haserre: nekagarria da Sagarduik galderarik ez erantzutea

Gidoi itxi-itxiarekin agertu da Osasun sailburua Legebiltzarrean, Donostia Ospitaleko egoeraren berri era xeheagoan ematera berez, baina galdera guztiak saihestu egin ditu. Oposizioko alderdi guztiek etengabe salatu dute lotsagarria eta larria dela jarrera hori izatea, eta... [+]


Eguneraketa berriak daude