Laura Perez, Carlos Couso –taldeko bozemailea–, Fanny Carrillo, eta Ruben Velascok agerraldian azaldu dutenez, taldeko beste hiruen kanporatzea eman da hauek taldearen izenaren aldaketaren aurka epaitegietan eman dituzten urratsengatik. Salaketa horretan Ainhoa Aznarezek protagonismoa berezia izan duela azaldu dute, bere kargua instituzioaren defentsan erabili beharrean berau interes pertsonaletan erabili duela salatuz. Mikel Bull –Nafarroako Ahal Duguko hurrengo hautagaia maiatzeko foru hauteskundeetan–, Tere Saez eta Ainhoa Aznarez dira kanporatuak.

Cousok azaldu du Lauraz Perez eta Eduardo Santosen arteko primarietan Madrildik "putxerazoa" eman zutela, Santosek 28 botoren aldearekin irabazi zuela, baina Perezen aldeko askoz gehiagori ez zietela utzi boto telematikoa ematen. Bere esanetan, jadanik ez dute ezer partekatzeko beste hiruekin.

Aznarezen lehendakaritza zintzilik

Nafarroako Ahal Dugutik kanporatua izan arte alderdiko idazkari nagusi izan zen Laura Perezek azaldu duenez kanporatzea aspaldi zegoen pentsatua, baina orain gauzatu da, aldaketaren gobernuaren ekimen garrantzitsuak eta aurrekontuak ez zangotrabatzeagatik. Ez dago garbi, ordea, zer gertatuko den, esate baterako, Ainhoa Aznarezen legebiltzarreko lehendakari karguarekin, legebiltzarreko araudiaren arabera, lehendakari izateko ezinbestekoa baita talde parlamentario bateko kide izatea.

Legebiltzarreko Mahaiak aztertu behar du orain auzia eta honek legebiltzarreko zerbitzu juridikoen aholkua eskatuko du. Mahaiak, azken finean, erabaki beharko du nola interpretatzen duen auzia eta onartzen duen kanporatze hau ala ez. Onartzen badu, Aznarezek lehendakaritza galduko luke eta ganberak beste lehendakari bat hautatu beharko luke. Perezek adierazi duenez, ez da arazorik izango horretarako, gobernua sostengatu duten lau alderdiek legebiltzarrean gehiengoa izaten jarraitzen dutelako.

Eduardu Santos Nafarroako Ahal Duguko idazkari nagusiak azaldu duenez, "lau transfuga hauek egin dutena guztiz onartezina da eta ez da posible haiek talde parlamentario bat zuzentzea". Ahal Dugutik kanporatutako lau parlamentarioak sarri agertu dira minduta besteek transfugak deitzen dituztelako, eta beti ukatu duten izaera hori, haiek hautatuak izan ziren printzipioekiko leialak direlako. "Transfuga da –esan du Perezek Pablo Iglesias aintzat hartuta– Vallecaseko zure pisutxoa utzi eta Galapagarreko etxetzarragatik aldatzea"

Urtarrilaren 8ra arte ez dago aurreikusita legebiltzarraren osoko bilkurarik eta seguruenik Legebiltzarreko Mahaiak orduan emango dio erantzuna gaiari.