AEB

“Obamak gerra zikina legitimatu eta zabaldu du”


2013ko urriaren 19an - 00:00
Azken eguneraketa: 2014-03-25 09:12:03
Jeremy Scahill, 'Dirty wars' argitaratutako azken liburua eskuetan duela.

AEBetako Blackwater ejertzito mertzenarioaren polemika zabaldu zuen 2008an. Orain Gerra zikinak ( Dirty wars) izenburuarekin argitaratu du liburu berria eta titulu bereko pelikula-dokumentala aurkeztu dute. Bushek hasi eta Obamak legitimatu eta zabaldu duen amaigabeko gerra ulertu nahian, azken hamarkadan inork bere gain hartzen ez dituen ekintzek kolpatutako herrialdeetan ibili eta aurpegia jarri die biktimei.

Hona hemen, euskaraz itzulita, elkarrizketa:

2008an kontatu zenuen nola funtzionatzen zuen munduko ejertzito mertzenario indartsuenak.

Blackwaterekin gerra egiteko modu berri bat sortu zen, eta Irak izan zen laborategia. Bush iritzi publikoarekin eta herrialde demokratikoekin liskarrean aritzetik libratu zuen.

Eguna joan eta eguna etorri agertzen zinen Ipar Amerikako hedabideetan.

Kongresuak ikerketa bat irekitzea erabaki zuen arte. Orduan, Blackwaterreko agintariak, Eric Prince-k…

Kristau sutsua bera.

… Ihes egin zuen AEBetatik eta Arabiar Emirerrietara. Enpresak lau aldiz aldatu du izena ordutik, azkena Academi da.

Obamarekin gauzak hobetu dira?

Gauzak okertu egin dira. Orain ikertzen ari naizen JSOC (Operazio Berezietarako Aginte Bateratua) beste piztia bat da: AEBetako armada ofiziala, indar sekretua, Kongresuak euren gaineko kontrolik ez duen eta gainera baliabide guztiak eskura dituzten hiltzaile sofistikatuak.

Nondik lortzen dute finantzazioa?

Ezkutuko aurrekontuetatik. Ehundik gora herrialdetan dabiltza hilketa selektiboak egiten, misil eta droneekin (eskifaiarik gabeko hegazkin telegidatuak) erasoak egiten, zibilen kontrako sarraskiak eragiten eta jendea bahitzen. Bushen administrazioak sortu zituen milizia hauek, baina Bakearen Nobel sariduna da indar hauek legitimatu eta zabaltzen ari dena.

Broma dirudi.

Obamak mezu garbi bat bidali dio munduari: AEBentzako lege batzuk daude eta beste guztientzako beste batzuk.

Albo-kalteekin ohitu egin gara.

Deliturik egin ez duen jendea, AEBentzako mehatxu ez dena, nola definitu jende hori? Terroristak dira? Militanteak? Susmagarriak? AEBak euren identitatea ezagutzen ez duen jendea hiltzen ari da, horietarik gehienak zibilak.

Bestaldera begiratzen dugu, baina.

Behin baino gehiagotan gertatu da, Al Kaedako kide bat hiltzeko famili guztia eta bizilagunak hiltzea.

Non daude indar berezi klandestino horiek?

Baserik handiena Afganistanen daukate eta handik bidaltzen dituzte erasoak Pakistan, Iran eta Afrikako kontinentera. Obamak ONUren aurrean egindako bere azken hitzaldian argi esan zuen ejertzitoa erabiliko zuela energia baliabideak lortzeko duen eskubidea ezartzeko.

Bai itxura kaxkarra.

Inperialismo gordin-gordina. Indar horiek AEBen aliatuak diren herrialdeetan ere egin dituzte operazioak, euren gobernuei, AEBetako enbaxadoreari edo CIAri azalpenik eman gabe.

Presidenteari konturik ematen diote?

Bai. Munduak badaki Osama Bin Laden mertzenario hauek hil zutela. Ez dakitena da, ordea, urte horretan beste milaka eraso egin zituztela, eta Etxe Zuria kazetarien kontrako gerra egiten ari dela.

Azaldu hori.

Haien iritziz, segurtasun nazionaleko ekintzez prentsara filtratzen den historia ofiziala besterik ez dute ezagutu behar kazetariek. Gaur badakigu, Bin Ladenen kontrako operazioaz zabaldutako informazioaren erdia faltsua zela.

Prentsaren informatzaileak, izenik gabeko iturriak, espioitzat jotzen dira.

Bai, Edward Snowdenen kasuan bezalaxe. Kazetarien telefonoak kontrolatuta dauzkate, iturriak zein diren ezagutu nahi baitute, eta hori antidemokratikoa da.

Terrorismoaren kontrako borrokaren barruan denak balio du.

Etxe Zuriak Anuar el Aulaki erlijio musulmaneko iparramerikarra hiltzea erabaki zuen, tripulaziorik gabeko hegazkin baten bitartez Yemenen. Ez dut eztabaidatzen terrorista zen ala ez, baina atzerabiderik gabeko puntura iritsi gara: epaiketarik gabe bere herritarrak hiltzera ailegatu den herri bat, zeinaren presidenteak enperadore papera hartu eta esan dezakeen: “Pertsona honek hil beharra dago”.

16 urteko haren semea ere hil zuten.

Lehengusu nerabeekin jatetxe batean bazkaltzen ari zirela. Denak hil zituzten.

Eta zer diote iparramerikarrek?

Kiroletako ospakizun bat dirudi: denak balio du terrorismoaren kontrako gerra honetan. Ikusi besterik ez dago nola ospatu zen Bin Laden hil zuteneko eguna. Kargua hartu eta hiru egunera, Obamak agindu zuen zibilak hiltzea ekarri zuen eraso bat.

Ezkontzak eta hiletak bonbardatu dituzte.

Double taps deritzona egiten dute: helburu bat bonbardatu, eta larrialdietarako laguntza iristen denean berriz bonbardatzen dute, zaurituak laguntzera joaten direnak ere terroristatzat jotzen dituztelako. Hileta eta ezkontzekin ere berdina egiten dute, ez dute inor bizirik uzten.

Prebentzio gerra deitzen diote.

Buelta ekarriko du honek. Terrorismoarekin indartzen ari dira terrorismoa… nola deitu behar diogu bestela?

 

Estreinatuko den film-dokumentalaren trailerra:


Kanal honetatik interesatuko zaizu: AEB
AEBek Hamasi leporatu nahi diote su-etena ez adostearen errua

Hamasek akordio proposamenari egindako aldaketa batzuk “ez dira egingarriak”, AEBetako Estatu idazkariaren arabera. Israelek ere ez du ofizialki onartu proposamena, baina AEBek Hamas aurkezten dute oztopo bakar gisa.


Migrazioa oztopatzeko asmoz Mexiko eta AEB arteko muga ixtea erabaki du Bidenek

Migrazio politikaren gogortzea dakarren dekretua izenpetu du ekainaren 4an AEBetako presidente Joe Bidenek eta asteazken honetan sartu da indarrean neurria. Testu horrek dio egunean 2.500 zeharkatze ilegalen langa gaindituz gero (asteko batezbestekoa eginez), muga erabat itxiko... [+]


Mister Spanishen ehorzketa

Marfa (AEB), 1954. Texasko basamortuko herri horretako Blackwell lehen hezkuntzako eskolan haurrak zeremonia berezi batean parte hartzera behartu zituzten. Irakasleek paper zatiak banatu zizkieten eta bertan zera idazteko eskatu: “Ez dut espainieraz hitz egingo, ez... [+]


Arrakalak ari al dira sortzen AEBek Israeli emandako babesean?

Israelek Rafah-ra sartu eta eraso egiteko erabakia “kritikatu” egin dute AEBek, eta bidaltzekoak ziren azken arma kargamentua gelditu egin dute. Israelgo agintari batzuk mesfidati daude AEBen jarrerarekin. Hala ere, oraindik babes handia jasotzen du estatu sionistak... [+]


Eguneraketa berriak daude