Oasiko Kronikak 6: Dena gezurra da, saio hau izan ezik!
Koronabirusaren kontu gutzia Txinaren errua al da? Nostradamusek iragarri al zuen pandemia hau orain dela 500 urte? Maskarak erabiltzea alferrik da? Espainiako gobernuak gure telefono deiak espiatuko ote ditu? Egun hauetan zabaldu diren zurrumurru eta zalantza guztiak banaka banaka aztertu ditugu Oasiko Kronikak saioaren seigarren atalean.
Azkenaldian zalantza asko eragin ditu koronabirusak, txutxumutxu, gezur erdi, erdi egia asko zabaldu dira sare sozialetan, eta zer sinetsi ez dakigula gabiltza denok. Horregatik, gure hiru adituengana jo dugu eta zabaldu den zurrumurru bakoitza sakon aztertu eta objektibotasunez esan dugu egia edo gezurra den.
Aurrekoetan bezala, tertuliaz gain, dozena erdi atal gehiagok osatu dute emankizuna: Albisteak, Teoren abenturak eta kalentura, Aita ernegatua, Erantzungailua: Nor izango da koronabirusaren hurrengo biktima?, eta Ruper Ordorikaren kanta hautatua.
Gogoratu, bestalde, Telegram kanala ere sortu dute irratsaioko kideek. Apurka-apurka podcastaren ildo editorialarekin bat datorren edukia zabalduko dute bertan, nahi duen ororentzat aho-gozagarri.
Bidali zure apustua
Esan nor izango den, zure ustez, koronobirusaren hurrengo biktima. Grabatu mugikorrez zure erantzuna eta bidali mezua: 669 36 29 82 zenbakira Telegram edo WhatsApp bidez edo beranduegi@argia.eus helbidera e-postaz.
Iritsi da ikasturte honetako azken saioa, eta dudarik gabe, denetan ondoen entzuten dena. EAEko hauteskundeak izan berri, transmedia ariketa bat egin dugu eta zeuen esku dago erabakitzea nork irabazi dituen hauteskundeak, hortik aurrerakoa utzi guri.
Ipar Euskal Herriko bozen analisi politikoa, EAEko kanpainaren nondik norakoak, Dusko Ivanovichen sobietar mototsaren indarra, eta nola ez, Julian Iantzik oparitu digun polemikatxoa; hau guztia Euskadiko Orkestra Sinfonikoak girotuta.
Geuk ere ez genuen uste umorezko saio batean euskara batuaz hitz egingo genuenik, baina euskaldun “natulen” eta Bilbo jendearen arteko eztabaidak askorako eman digu.
Eta koronabirusaren kontu hau guztia konspiranoia bat balitz, zer? Gu ere pandemia honen atzean Bill Gates eta bere bertso eskola daudenaren ustekoak bihurtu gara. Entzun Oasiko Kronikak irratsaioa eta ulertuko duzue zergatik.
Kolonialisten estatuak eraisten ari dira munduan eta Oasiko Kronikak irratsaioan pentsatu dugu Euskal Herriko plazei begira jartzea, estatugintza zaleak baikara hemen ere. Hori bai, guk euskaraz eta herri gisa egiten dugu, ez besteek bezala.
Sexuaz, maitasunaz eta Murgaren sabeleko tximeletez aritu gara aste honetako Oasiko Kronikak irratsaioan. Osasun sailburua maskararen atzean zerbait ezkutatzen ari zaigunaren susmoa dugu.
Heroinaren itzulerak nostalgiko jarri gaitu eta atzera begirakoa da aste honetako Oasiko Kronikak irratsaioa. 80ko hamarkadaren onenaz aritu gara, politikariek Europan bezala dimititzen duten garai triste hauetan, badugu eta zer berreskuratu.