Nazariori eta Zuloa liburu-dendari omenaldia egingo die Getxoko Komiki Azokak

  • Nazario komikigilea eta margolaria omenduko du binetaren munduaren urteroko jaialdiak. Horrez gainera, Gasteizko Zuloa liburu-dendari ere gorazarre egingo diote, haren ibilbideagatik eta komikiaren mundua zabaltzeko egindako lanagatik. Getxoko Komiki Azoka urriaren 19tik 21era arte izango da, leku bitan: Areetako Xake plazako karpan (saltokiak) eta Romo Kultur Etxean (jarduerak eta fanzine-gunea). Azokaren kartela Raquél Córcoles artistak egin du, Moderna de Pueblo pertsonaia ospetsuaren sortzaileak.

Hiruka .eus
2018ko urriaren 18a
Adin guztietako komikizaleak erakartzen ditu Getxoko azokak. (Arg: Getxoko Kultur Etxea)

Nazario Luque Vera (Castilleja del Campo, Sevilla, 1944) Espainiako komiki-munduko artista kontrakultural ospetsuenetako bat da. Sevillan Filosofia eta Letrak ikasi eta irakasle ibili ostean, 70eko hamarkadaren hasieran Bartzelonan finkatu zen, eta lehen urratsak eman zituen komiki underground-aren munduan. Bertan sortu zuen El Rrollo taldea, Javier Mariscal, Farry eta Pepichek artistek osatua, besteak beste; euren komikiak editatu eta banatu zituzten. Garai hartan argitaratu zituen San Reprimonio, Sábado sabadete eta Purita obrak, besteak beste. 1980ko hamarkadan El Víbora aldizkariagaz elkarlanean hasi zen, eta han argitaratu zituen bere komiki gehienak. Horien artean nabarmentzekoa da Anarcoma, 70eko eta 80ko hamarkadetako Bartzelona zitalean mugitzen den detektibe trabesti baten gainekoa.

Europako beste zenbait aldizkarigaz ere elkarlanean ibili zen, berbarako, Makoki argitalpenagaz. Azken horretan argitaratu zuen Alí Babá y los 40 maricones, bere lan gorentzat jotzen dena, eta horregaz amaitu zen bere ibilbidea komikiaren munduan. Une horretatik aurrera, pinturan ibili zen, 2008ra arte. Orain bere autobiografia zatika publikatzen eta argazkiak egiten dihardu.

Zuloa liburu-denda

Bere aldetik, Zuloa liburu-denda leku berezia da komikiaren munduan, Gasteizen eta Gasteiztik kanpo. 1987an ireki zuten liburu-denden kontzeptu berri baten ideal hori, hiriko proposamen kultural ezberdinek presentzia izango zuten lekua. 1998an Hedegile kaleko 21. zenbakira lekualdatu zuten, eta han egon da ordutik, Txintxu San Martínek eta Sara Elíasek zuzenduta. Komiki-munduan espezializatuta dago, eta kultur erreferentzia bat da, bai duen eskaintzagatik, bai bertan egiten diren jarduerengatik; izan ere, erakusketak eta komikien, liburuen eta diskoen aurkezpenak antolatzen dituzte bertan, besteak beste.  Ireki zutenetik, sari garrantzitsuak lortu izan ditu, adibidez, Hezkuntza eta Kultura Ministerioak 1989an Liburu-dendek egindako Kultur Hedapenerako Lan Onenari emandako Saria, eta Eusko Jaurlaritzaren Hiri-inguruneak Dinamizatzearen 2015 Saria.

Raquel Córcoles

Komiki Azokaren aurtengo kartela Raquel Córcolesek (Reus, 1985) egin du. Autore katalanak 2011n hasi zuen bere ibilbidea komikiaren munduan, El Jueves aldizkarian, eta Cuore, GQ eta El País argitalpenetan ibiltzen da elkarlanean, haren komikiak bertan argitaratzen baititu. Sortzaile lanak utzi zituenean, Carlos Carrerogaz batera buru-belarri heldu zion bere proiektu pertsonalari, Moderna de Pueblo-ri. Proiektu horretan gidoiak sortzen ditu, ilustrazioak egiten ditu eta edukiak zuzentzen ditu.  Haren blogeko pertsonaia 2010ean sortu zen, eta berehala fenomeno birala bihurtu zen. Hari esker lortu zuen Connecta’t al còmic izeneko beka, lehen eleberri grafikoa argitaratzeko aukera eman ziona: Soy de pueblo. Haren komikiak herritik hirira arrakasta bilatzera doan hogei urte inguruko neska baten ingurukoak dira, eta herriagaz konektatzeko helburua duten egoerak parodiatzen dituzte. Horren ostean beste hiru obra argitaratu ditu: Los capullos no regalan flores (2013), El cooltureta (2014) eta Idiotizadas: de cuento de hadas a empoderhadas (2017).

Jarduera ugari azokan

Getxoko Komiki Azoka komikizaleen topagunea izango da. 17. ekitaldi honetan gune bitan banatuko da. Batetik, Areetako Xake plazako karpan merkataritza-gunea egongo da. Bertan, 43 saltoki aurkitu ahal izango dituzte bisitariek, eta horietan egongo dira ordezkatuta, besteak beste, komiki-dendak, liburu-denda espezializatuak, argitaletxeak eta bederatzigarren arteagaz lotutako beste sektoreak.

Bestalde, Romo Kultur Etxeak jarduera-programa bizi-bizia hartuko du eta bertan, hiru egunez, nobedadeen aurkezpenak, berbaldiak, mahai-inguruak, proiekzioak eta tailerrak izango dira, besteak beste. Fanzineentzako gunea ere kokatuko dute bertan.

Ohi denez, artista ospetsuek bisitatuko dute Getxo, horietako batzuk nazioartean sona handia daukatenak, eta berbaldietan eta aurkezpenetan parte hartuko dute; sinadura-saioak ere egingo dituzte, zaleek gustukoen dituzten egileak ezagutzeko aukera izan dezaten. Sinatze-txandak Romo Kultur Etxean zein karpako saltokietan izango dira.

Aurtengo gonbidatuen artean nabarmendu behar dira, berbarako, Jason Lutes, Camille Jourdy, Marcos Martín, Natacha Bustos, Mamen Moreu, David Rubín, Anabel Colazo, Javier Pulido, Raquel Alzate. Horiekaz batera, beste komikigile askok ere parte hartuko dute. Esaterako, Javier Rodríguez, Javier Pulido, Raquel Alzate, Rayco Pulido, Paco Alcácer, Elisa McCausland, Josep Busquet  eta Jordi Bayarri. Egile gonbidatuen artean Nazario aipatu behar da bereziki, Espainiako underground komikiaren adierazle nagusietariko bat, hain zuzen ere. Gasteizko Zuloa liburu-dendagaz batera, omenaldia egingo zaio Getxon.

Komiki-erakusketak ere ez dira faltako. Hala, Bizkaia Zubian David Leoneren Caóstica izeneko erakusketa egongo da eta Romo Kultur Etxean, berriz, Marcos Martínen lanak izango dira ikusbide. Azokako karparen inguruan, Asisko egileri dedikatutako erakusketa egongo da eta, azkenik, Algortako Torrene Aretoan euskal komikiaren historia 1975etik gaur egun arte ezagutu ahal izango dugu.

 

Albiste honen zati bat Hiruka.eus-ek argitaratu du eta CC-by-sa lizentziari esker ekarri dugu ARGIAra.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Komikia  |  Getxo  |  Liburu dendak  |  Liburugintza

Komikia kanaletik interesatuko zaizu...
Komikia leku bila, hitza nagusi den kulturan

Durangoko Azokak euskal kulturaren mundutxoa elkartzen duen egunotan, liburuak, liburuak eta liburuak izango ditugu hizketarako gai, letrak, letrak eta letrak. Eta irudiak zer? Loraldi txiki bat gertatzen ari da euskarazko komikigintzan edo, zabalago esateko, literatura grafikoaren alorrean. Aurtengo zenbait nobedade interesgarri aipatu nahi ditugu ondorengo lerroetan, hizkiak bakarrik erabiliz, hori bai.


2018-11-26 | Hala Bedi
Asisko Urmeneta. Marrazkilaria.
"Ez dugu botererik, Espainiak eta Frantziak kudeatzen dute gure irla"

Eusklabo Alaiak izeneko komikia aurkeztu du Asisko Urmenetak, Intzura Handia uhartean kokatutako istorioa kontatzen duena. Asisko bera izan dugu gaur Hizpidean, eta komikiaz hitz egiten hasita, Euskal Herriaren egoera nazionalaz hausnarketa batzuk banatu dizkigu.


Zerocalcareren 'Hondamuinean': zer gertatzen zaio komikigile famatuari bere lagun proletarioengana itzultzean?

Zerocalcare komikigile italiarraren Hondamuinean argitaratu du Farmazia Beltza editorialak. Koldo Izagirrek egin du italieratik euskararako itzulpena eta Donostiako Komikigunean egin duten aurkezpenean nabarmendu dutenez, gaztelaniaz baino lehenago eta ia frantsesezko bertsioarekin batera irakurri ahal izango da euskaraz lan hau, 1980ko hamarkadan jaiotako gazteen erretratu gordina eskaintzen duena.


'Kili-kili'-tik 'Argia'-ra: 'Gogor' diskoaren 50 urteak

Melaminazko mahaien egur iluna hautsak hartuta dago Kili-kili aldizkariaren Bilboko Goienkaleko erredakzio zaharrean. Armairu baten barruan, alanbre oxidatuz itxitako 40x40 cm inguruko kaxatan sartuta aurkitu dugu altxorra: Gogor diskoak.

Duela 50 urte Derioko seminarioko itxialdia egin zuten abadeek grabatu zuten diskoa, borroka luze hark iraun bitartean abesten zituzten doinuekin. Baionako Agorila zigiluak argitaratua –2012 CDan berrargitaratu zuen–, frankismoaren kontrako... [+]


2018-08-09 | Zabalik elkartea
Eusklabo alaiak
MULTIMEDIA - solasaldia

Asisko Urmenetak sortu duen azken komikia parodia satirikoa da. Intzura Handia uhartean kokatu du istorioa, Euskal Herriaren erdigunean dagoen Bidasoa ibaiaren bokalean. Bertan bizi dira Defoeren pertsonaiak. Robinson Crusoe nagusituko da irlaz eta birbataiatu egingo du Faisan(e)s Island gisa. Haren aurkezpena egin zuen Donapaleu uztailean.


Koma baten indarra

Alemania, 1870. Erich von Wolf kimikariak hosto berdeko barazkiak aztertu zituen, bakoitzak zenbat burdina zeukan ondorioztatzeko. Ikerketaren emaitzak koaderno batean idatzi zituen eta zerrenda horretan espinakak garbi nabarmendu ziren: 100 gramo espinakatan 35 miligramo burdina zeuden; burdin iturri oparotzat ditugun dilistetan, aldiz, 8 miligramo inguruan dabil. Egin kontu!


Azkenak
EGILEA
Eguneraketa berriak daude