Nafarroako Osasun Institutuak aurten COVID-19a dela eta igerileku publikoek eta bainu guneek bete beharko dituzten baldintzak argitaratu ditu. Nafarroan 11 dira bainu naturaleko guneak eta 327 igerilekuak, hauetatik 257 publikoak (gainerakoak etxadi bereko bizilagunentzako direnak).

Neurri esanguratsuena da aforoa %75ean mantendu ahalko dutela eta elkarrekin bizi ez diren pertsonen artean 1,5 metroko distantzia gorde beharko dela. Distantziarik gorde ezin denetan, maskara erabili beharko da. Igerilekuek gune bakoitzeko aforoak neurtzeko sistema ezarri beharko dute eta bai bainu eremuetan, bai jardueretan, gomendatzen da 25 pertsonako taldeak baino txikiagoak izatea, pertsonen pilaketak saihesteko.