Emakumeak borrokan

Mundu mailako protesta kanpaina abian Mesopotamiako Hasankeyf herria ez urperatzeko eskatuz

  • Turkiaren menpeko Kurdistango Hasankeyf antzinako herria urperatuko du Turkiako Gobernuak proiektu hidroelektriko bat aurrera ateratzeko. Tigris ibaiaren altzoan, Mesopotamiaren bihotzean, milaka pertsona beren etxeetatik bota eta kurduen ondare arkeologiko baliotsua urpean geratuko dela salatzeko kanpaina abiatu zuten. Bestere artean, BBVA bankua proiektuan sartuta dagoela salatu dute.

Iņaut Gonzalez de Matauko @inautogdm
2019ko ekainaren 11
Hasankeyf herria Mesopotamian kokatuta dago eta mendietako kobazuloetan milaka urte dituzten arrastoak aurkitu izan dituzte.

Hasankeyf herrialdearen aldeko plataformak mundu osoan zehar elkartasun keinuak jaso ditu. Txile, Italia, Irak, Alemania, Katalunia, Euskal Herria… Denek adierazi dute kurduekiko elkartasuna; izan ere, leku arkeologikoki aberats batekin suntsitzeaz gain, proiektuak Turkiako Kurdistanen eta Irakeko hainbat eskualdetan ondorioak izango ditu.

Hasankeyf antzinako herriaz gain, beste hainbat herrixka urperatu nahi dituzte presa hidroelektriko hau dela eta. Kalkulu ezberdinen arabera, 40.000-78.000 artekoa izango da Ilisuko Presak lekualdatzera derrigortuko dituen pertsonen kopurua.

Presak urpean utziko lituzkeen herriak ikus daitezke infografia honetan.

Ilisuko Presaren proiektua Ipar Kurdistango Batman probintzian dago kokatuta. Hau, aldi berean, Tigris ibaiaren iturburua da, eta eragin larria izango du presak ibaiaren ibilbide guztian. Irak etengabeko basamortutze-arriskuan dagoen herrialdea da, eta Tigris ibaia bere biziraupenerako giltzarria da, bai biztanleria zein ekosistemari dagokionez. Presak, adibidez, hegoaldean mila kilometrora dauden zingirak asko erasango ditu.

BBVA tartean

BBVA Garanti banku turkiarraren erdiaren jabe da, Turkiako hirugarren banku nagusia dena. Proiektua Garanti eta Akbank banketxeek finantzatzen dute, erdibana. Hau dela eta, BBVAk proiektuaren laurdena finantzatzen du. Honek haserre handia eragin du Espainiar Estatuko eta Euskal Herriko talde ekologista eta internazionalistetan, eta banketxearen aukako eraso eta protestei ekin diete.

Kontserbazio Naturalerako Eremua

Hasankeyf Kontserbazio Naturalerako Eremu izendatu zuen Turkiak 1981ean, baina ez dira babes hori errespetatzen ari. Hau dela eta, bertako ekintzaile batzuek eremua UNESCOk gizateriaren ondare izendatzeko tramiteei ekin diete; haien esanetan, Hasankeyf eta inguruko Tigris Bailarak gizateriaren ondare izendatzeko hamar baldintzetatik bederatzi betetzen ditu.

 

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Kurdistan  |  Irak

Kurdistan kanaletik interesatuko zaizu...
Eguneraketa berriak daude