Manuela Carmena, Madrilgo alkateak 1936ko altxamendu frankista, Gerra Zibila edota errepresio frankistaren gorespena iradoki dezaketen kaleen izenak aldatu nahi ditu. Kasu nabarmenenak Plaza de Arriba España, Pasaje del General Mola edota Caídos de la División Azuleko kaleen izenak dira, besteak beste.

Udal Gobernuak adierazi duenez auzotarrek erabakiko dituzte kale berrien izenak. Lehen alternatiba berdintasun politikak ezartzea da. Horretarako, Emilia Pardo Bazán idazlea edota Dolores Ibárruri “Pasionaria” emakumeak omentzea pentsatzen ari dira. Beste alternatiba auzo bakoitzeko auzotar ilustratuen izenak jartzea da, baina horrek, halabeharrez bertakoen inplikazioa behar du. Rita Maestre, Ahora Madrilgo bozeramaileak esan du irizpideak Legea “errespetatzea”, herritarrak izenen aldaketetan “parte hartzea” eta beraien “oniritzia” jasotzea direla.

Memoria Historikoaren Legea 2007ko abenduan sartu zen indarrean. Mandatuak helburu du bai Gerra Zibilean bai Frankismo garaian indarkeria eta jazarpena pairatu zutenen eskubideak errespetatzea. Hala ere, Madrilgo Udalak ez du inoiz legea bete eta jarrera horrengatik 2015eko otsailean Ana Botella, Madrilgo alkate ohia epaitegietan salatu zuten. Antonio Ortiz historialariak eta Memoria Historikoaren berreskurapenaren elkarteak egindako txostenaren arabera hiriburuko170 kale, monumentu eta plazek 1936ko estatu kolpean eta errepresio frankistan parte hartu zutenen izenak goraipatzen dituzte.