Azaroaren 1etik 3ra Durangon antolatuko dituzte Euskal Herriko V. Jardunaldi Feministak. Aurretik, baina, neska gazteen artean "saretu eta indartzeko, jardunaldietara elkarrekin joateko, azken urteetako ibilbideei begiratzeko, autodefentsa feministaren inguruan hausnartzeko, hezkuntzaren inguruan, sare sozialen inguruan, militantzia ereduaren inguruan, mugimendu feministaren subjektu politikoaren inguruan..." eztabaidatu nahi dute. Modu horretan, Euskal Herriko mugimendu feministak dituen erronka berriei ikuspegi propioz heldu nahi diete. 

Hego Euskal Herriko hiriburuetan aurkeztu dituzte topaketak. Azaldu duten moduan, hurrengo hilabetetan herrietan eta auzoetan aurrera eramateko prozesu parte hartzailea jarriko dute martxan; elkar ezagutu, saretu eta hainbat eduki landu ahal izateko. Horretarako hainbat baliabide zabalduko dituzte, besteak beste, eztabaidarako dossier bat.

Topaketen antolakuntzan parte hartzeko deia ere egin dute. Hainbat lantalde izango dira (komunikazioa, azpiegitura, diruzaintza, harremanak eta saretzea, egitaraua...) eta horien guztien bilera irekia ekainaren 7an egingo dute Gasteizen, Hala Bedi Irratian. neskagazteak.saldabadago@gmail.com helbide elektronikoa ere zabaldu dute.