Atzo ireki zuten Etxera-gunea Bilboko Plaza Biribilean. Larri gaixo dauden presoen senide eta lagunen ekimena ostirala arte luzatuko da eta egun osoan egingo den kontzentrazioa izango da egitarauaren bizkarrezurra.

Jendartearen inplikazioa eta “konpromisoak biltzeko”  espazio fisikoa izango da Etxera-gunea; hitzaldi, liburu irakurketa eta ikuskizunen bidez eritasun larriak dituzten presoen egoera salatuko dute bertan.

Hiesa duen Ibon Iparragirre euskal presoak salaketa baten harira Bilboko epaitegi batean deklaratu behar zuen unean eman diote hasiera ekimenari, eta haren anaia Jon Kirru Iparragirrek hitz egin du lehenik. Bere esanetan “presoekin egiten ari direna oinarrizko giza eskubideen kontrako eraso larri bat da eta jendarte osoari dagokion kontua da horri aurre egitea”. Datorren asteetan ere mobilizazio gehiago egingo dituztela iragarri du.