2020ko uztailaren 13a
61 urteko preso lekeitiarrak maiatzaren 13an buruko isuria izan zuela argitaratu du Etxeratek. Orain Puerto-I kartzelako (Cadiz, Andaluzia) erizaindegian dagoela eta asteburuan familiaren bisita izan duela gehitu du.
Isuriaren ondorioz gorputzeko ezkerreko aldean kalteak jasan dituela adierazi du Etxeratek komunikatuan, batez ere hankan eta eskuan. Senideen ardura helarazi du Etxeratek, presoa etxetik urrun egoteaz gain, horrelako isuri baten kasuan zenbat eta arinago ospitaleratu hobea izaten baita pazientearen osasunerako.
Maiatzaren 21ean kartzelara bueltatu zen Atxurra, isuria izan eta zortzi egunera. Joan den asteburuan bi senideren bisita jaso du, 40 minutuz. Senitartekoek esandakoaren arabera, erizaindegian dago ingresatuta, eta bere egoera animikoa ona da.
Bere babes osoa helarazi nahi izan dio Etxeratek Atxurraren sendiari. Gaur egungo egoerak presoaren errealitatea zailtzen duela adierazi du, bi hilabetean familiako kideekin komunikaziorik izateko aukerarik izan ez duelako. Gehitu dute gurasoak nagusiak dituela presoak, eta oso zaila egiten zaiela 1.020 kilometroko bidaia egitea. 24 urte daramatza preso lekeitiarrak, lehen graduan.
Atxurraren eta gainontzeko presoen egoerari amaiera eman behar zaiola esaten bukatu du komunikatua Etxeratek; preso denen hurbilpena eta larriki gaixo dauden eta 65 urtetik gora dituzten presoen askatzea eskatu du. Elkarteak nabarmendu du Espainiako Estatuan kartzelaratutako euskal presoen %80a familiarengandik oso urrun dagoela, distantzia hori 400 eta 1.000 kilometro artekoa izanik.
Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.
Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!
