Plana aurrera ateratzeko 281 milioi euro bideratuko dituzte 2013an diru-kutxa publikoetatik eta beste 733 milioi euro eremu pribatutik. Hori guztia, dena den, EAEko aurrekontuen onarpenaren baitan dago, Madrilekin eta Bruselarekin otzantasun handia erakutsi duten aurrekontuak, hain zuzen.

Lehenik eta behin, langabeziaren aurka borroka egiteko plan estrategikoa izanik, harrigarria da aurretik eragile sozialekin, patronalarekin, sindikatuekin, diputazioekin eta alderdi politikoekin landu gabe iragarri izana. Are harrigarriagoa da aurrekontuen onarpenaren menpeko plana izatea. Arrazoia dute uste dutenek plan honek marketin operazioa dirudiela, Gasteizko exekutiboak benetako egitasmo zehatzik ez duelako. Aurrera ateratzen ez bada, EAJk jada prestaturik dauka eskopeta ustezko arduradunei tiro egiteko: oposizioan dauden politikari eta sindikatuak.

Bigarrenik, bai EAJk eta bai bere Gobernuak ere, badakite langabezia EAEn estrukturala dela eta tapaki aringarriek ez dutela ezertarako balioko. Plan estrategiko bat behar da, baliabide ekonomiko handiagoak eta bestelako neurriak eskainiko dituen plana, lanaren banaketa kasu. EAJk AHT gisako obra faraonikoak babesten ditu, 4.200 milioi euro kostako direnak; eta krisi garaiotan, jeltzaleak prest dira obraren finantzaketa aurreratzeko. Garbi dago Urkullurentzat eta bere alderdiarentzat AHTk lehentasuna duela langabeziaren aurrean. Langabeziaren aurka, marketin operazioak!