Eusko Jaurlaritzak emandako datuen arabera, "Kultur jarduera pandemia hasieran %82,6 murriztu zen eta horrek eragin zuzena izan du enpleguan eta diru sarreretan". Pandemia hasieran kultur lanpostuen %43 galdu ziren eta "COVID-19-aren aurreko sasoiarekin alderatuta urteko diru-sarrerak %40,8 murriztu dira. 2021. honetan ere, kultura jarduerek, osasun egoerak hala behartuta, hainbat muga dituzte eta beraz, diru-sarrerak galtzea ekarriko du".

Diru-laguntzak eskatzeko baldintzak

Araba, Gipuzkoa eta Bizkaiko kulturgileek Jaurlaritzaren diru-laguntza hauek eskatzeko epea zabalik egongo da martxoaren 17tik apirilaren 16ra bitartean eta baldintza hauek bete beharko dituzte:

- 2020ko fakturazioan, gutxienez %70ean jarduera hauetakoren batekoa edo batzuetakoa izatea: arte eszenikoak, ikusizko arteak, arkeologia, ikus entzunezkoak, bertsolaritza, bitartekaritza edo kultura aholkularitza, liburua eta literatura, musika eta ondarea.

- Jarduera Ekonomikoen gaineko Zergan eta Gizarte Segurantzan alta emanda egotea, eta hala dagokionean, dagozkion erregistroetan, eskaera egiten den unean eta diru-laguntza justifikatzen den unean.

- Jardueraren edo helburu sozialaren xede honako jardueraren bat izatea: arte eszenikoak, ikusizko arteak, arkeologia, ikus entzunezkoak, bertsolaritza, bitartekaritza edo kultura aholkularitza, liburua eta literatura, musika eta ondarea.

- 2020ko fakturazioak %20ko edo gehiagoko murrizketa izatea 2019ko ekitaldiarekiko, COVID‐19 pandemiak eragindako krisiaren ondorioz.

- EAEn establezimendu iraunkorra izatea.

Onuradunak jasoko duen diru-laguntza, gehienez 2019-2020 urteen arteko fakturazio-aldearen %50era artekoa izango da, gehienez 30.000 eurokoa.

2020an 3,1 milioi euro bideratu zituen Jaurlaritzaren Kultura sailak

2020an Eusko Jaurlaritzako Kultura eta Hizkuntza Politika sailak 3,1 milioi euro bideratu zituen "kultura-sektorea laguntzeko COVID-19ak sortutako alarma-egoeraren eta bizi izan den osasun-larrialdiaren ondorioen aurrean", Jaurlaritzaren hitzen arabera. Gorka Bereziartuak artikulu honetan azaldu zuenez, "2,5 milioi euroko balioa duten laguntzak iragarri zituen Eusko Jaurlaritzak. EAJk eta PSEk Podemosekin adostutako EAEko aurrekontuetan aurreikusita zegoen diru-partida hori, izena aldatu diote COVID-19aren tiradizo komertziala baliatuz".

Honakoak izan ziren egoera arintzeko emandako laguntzak:

- Kultura-arloko langileei zuzendutako aholkularitza-zerbitzua martxan jartzera bideratu zituen 60.000 euro. Guztira 565 kontsulta erantzun zituen zerbitzuak.

- Kultur arloko profesionalei laguntzeko 441.000 euroko diru partida erabili zen. Guztira 104 profesionalek jaso zuten diru laguntza. 

- Kultura arloko mikropyme-en egoera arintzeko 413.000 euro erabili ziren eta guztira 74 mikropymek jaso zituzten laguntzak.

- Euskal Herriko Musika Bulegoa Elkartearekin batera zuzeneko arteen “Beste Bat!” zirkuitua garatzeko 487.000 euro erabili zituen Kultura sailak. Bi hilabetez 250 zuzeneko emanaldi eskaini zituzten.

- Durangoko Azokaren “Zu non, han DA!” ekimena martxan jartzeko 100.000 euroko diru laguntza bideratu zion Gerediaga Elkarteari, 32 musika taldek zuzeneko kontzertuak emateko eta azokako produktuak 141 liburu saltokira iristeko.

- Artium, Tabakalera eta Bilboko Arte Ederren Museoak elkarlanean eratutako bilduma partekatua erosteko 150.000 euro bideratu zituen Jaurlaritzak. Guztira 24 artistaren 42 artelan erosi dituzte.

- Itxialdiak eragindako ilustrazioekin kaleratutako Harrigarri eta Miragarri. Jostailuzko Entziklopedia Ilustratua liburuaren proiektura 105.000 euro bideratu ditu Jaurlaritzak. Guztira 20 ilustratzailek parte hartu dute ekimenean.

- Zinema-ekoizpengintza sektorea bultzatzeko 240.000 euroko diru partida erabili zuen. Konfinamenduaren inguruan fikziozko zazpi film labur sustatu dira horrekin.

- 100.000 euroko ezohiko partida bat bideratu zuen liburutegi publikoetara, liburuak erosteko zuzkidura handitzeko.

- Katalogazio eta digitalizazioan 50.000 euro inbertitu zituen EAEn argitaratutako diskoen karatulak katalogatu, digitalizatu eta aztertzeko. "Helburua Euskadiko Liburutegi Digitalari euskal kultura-ondarean garrantzi handia duen dokumentu-funts bat hornitzea izan da".