"Azken asteetan adi jarraitu diogu 'Osasuna auzia'ren inguruan gertatutako guztiari", diote elkarteko kideek prentsa-oharrean (pdf). "Tamalez, ikusi dugu sortutako 'eskandalua' ez dela soilik partiduen erosketa eta diru maletinen aferetara mugatu. Aitzitik, Osasunako goi-agintariek, funtzionario publikoak eta Nafarroako herritarren hainbat ordezkari inplikatu dituzte trikimailu eta azpijoko horietan guztietan. Kontsumitzaile eta zergadunen elkartea garen neurrian, suminduta gaude. Nafarrak garenez, lotsatuta".

Kontuzen hitzetan, ustezko prebarikazio delitua egon daiteke azaleratu diren jardunen atzean. "Aipatutako pertsonen jarduna, Zigor kodeak delitu gisa hartzen ote duen argitu nahi dugu, jarraian azalduko dugunaren haritik: Zerga-bilketako araudiaren 49 eta 50. artikuluen arabera, zerga publikoen zorra atzeratzea, Ogasunarekin 53 milioi euro arteko zorra pilatu izana, soilik Nafarroako Gobernuarekin adostutako akordioen bitartez onar daiteke, eta akordio horiek, edozein mailegu bezala, berme batzuk bete behar dituzte, ordaindu gabeko diru-kopuruaren proportzioa kontuan hartuta. Non daude gobernu-akordio horiek? Legeak eskatzen dituen bermeak bete al ziren?"

Kontsumitzaile elkarteak dioenez, Nafarroako Gobernuak ezin die errua besteei bota. "Bere erabakiak izan dira, ez ogasuneko funtzionarioenak. Haiek izan dira, politikoak eta kargu politikoak. Eta azalpenak eman beharko dituzte 36,5 milioi euroko zorraren ordain hori atzeratzeagatik".