Eneko Goiaren iragarpenaren ondotik bolo-bolo ari zen hedabideetan Jon Insaustiren izena, eta aurreikuspenak bete egin dira. Ostiral goizean eman du izendapenaren berri Maria Eugenia Arrizabalaga GBBko lehendakariak Donostiako Zuloaga plazan, San Telmo museoaren ondoan, eta alderdiko ordezkaritza zabal batek lagunduta.

Intxausti 2015ean hasi zen zinegotzi moduan Donostiako Udalean eta 2018an hartu zuen bere gain Kulturako esparrua, Miren Azkarate euskaltzainaren eskutik. Goiak hilaren 16an emango du dimisioa eta, ondoren, beste osoko bilkura batean Insausti izendatu beharko dute. Tarte horretan, gaur egun alkateorde den Nekane Arzalluzek hartuko du aginte makila behin-behinekoz. Horrela, Intxausti Donostiako zazpigarren alkatea izango da, orain arteko guztiak gizonezkoak.

Insausti Donostian jaio zen 1989an eta 36 urte ditu. Enpresa Administrazio eta Zuzendaritzan lizentziatua da, Ikasle Kontseilu Zentraleko Kultura arduraduna izan zen EHUn, eta unibertsitate horretako Gobernu Kontseiluko kidea ere bai. Donostiako Udaleko webguneak azaltzen duenez, “Donostiako Club Vasco de Camping Elkarteko kidea da, mendian korrika egitea maite du, irakurketa, herri lasterketetan parte hartzea, danborradan ateratzea, pintura, eta leku berrietatik ikastea”.