Irango lider nagusi Ali Khameneik adierazi du herrialdeak gogor erantzungo diola Israelen erasoari, eta geroxeago jakin da Iranek 100 bat drone bideratu dituela Israelerantz. Israelek adierazi du drone horiek geldiarazten ari dela bere aire defentsa. Aipatu denez, lehen urrats batean Siriako lurraldetik egingo luke hori, eta Jordaniak ere adierazi ditu aire defentsa ari dela bere aire eremuan –Israelera bidean– sartzen ari diren droneen aurka egiten. Aurretik ere, Israelek hainbatetan egin die eraso Irango eremu nuklearrei

Israelek Iranen egindako aire erasoan dozenaka helburu nuklear eta militar kolpatu dituzte, baina gune horietako buru diren pertsonen aurkako erasoak ere bideratu dituzte eta, besteak beste, Guardia Iraultzaileko buru Hossein Salami jenerala eta hainbat ingeniari hil dituzte. Ostiraleko eraso honen barruan, Mosadek [Israelgo zerbitzu sekretua] Iranen infiltratutako agenteek sabotaje operazioak ere egin dituzte Irango aire defentsak eta misil guneak indargabetzeko, Barak Ravid CNNko kazetariaren arabera.

“Holokausto nuklearraren aurka”

Benjamin Netanyahu lehen ministro israeldarrak jakinarazi du hilabeteak daramatzatela eraso hau prestatzen eta Israelen helburua dela Iranek Israeli eraso egiteko dituen bi eremu garrantzitsuenak kolpatzea: arlo nuklearra eta ahalmen luzeko misilak.

Arlo nuklearrari dagokionez, aipatu du Israelek jarraitzen duela uranioa aberasteko programarekin, “nazioarteko aginte nuklearrak emandako aginduen aurka”, eta Israelek ezin duela “holokausto nuklearra” den mehatxu hori handitzen utzi. Horrez gain, hiru urtetan Israelek 10.000 misil balistiko ekoizteko ahalmena duela azpimarratu du eta orain hori saihestu ezik, datozen urteetan misil horietako askok Israel kolpatzeko karga nuklearra eraman dezaketela.

Marco Rubio: “Israelen aldebakarreko erasoa da”

Marco Rubio AEBetako estatu idazkariak berehala zabaldu du AEBek ez dutela erasoan parte hartu, nahiz eta analista gehienen ustez halako eraso handi bat bidera ezina litzateke AEBek berau egiteko erabateko kontrakotasuna erakutsiko balu.

Donald Trump AEBetako bere bigarren agintaldira iritsi denetik ari da negoziatzen Iranekin honek uranioa aberasteko bere programa nuklearra albora dezan. Arma nuklearrek uranio aberastua erabiltzen dute, baina uranio aberastuak badu ere erabilera zibila, esate baterako erreaktore nuklearretan, eta Iranek dio horretarako erabiltzen duela eta horretarako eskubidea duela.

Azken egunotan erasoaren mehatxua eta zurrumurrua indartsu egon da mahaiaren gainean eta The Guardianen irakurri daitekeenez, astelehen honetan bertan Trumpek eskatu ei zion Netanyahuri ez egiteko erasorik oraindik, gutxienez negoziazioak amaitu arte. Bestetik, baina, AEBetako armada egoeraren aurrean prestatzen aritu da eta Israeli lagundu dio bere Aire Ezkutu ospetsua eguneratzen eta gerra hegazkin eskuadroi oso bat bidali du eremura.

Ezaguna da Israel presio egiten ari zaiola AEBei Irani eraso egin diezaion, baina Trumpek orain arte Iranekiko negoziazioak hobetsi ditu, Iranen aurkako gerra handi batetik etekin gutxi aterako lukeelakoan. AEBek azken urte luzetan Afganistanen, Iraken edota Sirian izan dituen parte-hartzeekin oso kritiko agertu zen hauteskunde kanpainan, halakoetan berriz esku hartuko ez zuela aginduz, baina orain ez dago garbi nola jokatuko duen. Hori bai, argi dagoena da Israel edozein erasoren aurrean defendatuko duela.

Orain arte ikusi denagatik Israelen ahalmen militarra Iranekoaren oso gainetik dago eta lortzen du, oro har, handik bideratutako misilak eta droneak gelditzea. Era berean, Israelek Iranen aurka bideratutako erasorik handiena da hau, eta min handia eragin dio, baina iturri ugariren esanetan, ezingo du Iranen programa aire erasoz bakarrik geldiarazi, Iranek instalazio nuklearrak lur azpian metro askotara lurperatuta dituelako eta horietako asko gaur egun txikiak eta mugikorrak direlako.